ដោយ ៖ រ៉ាណេត
ភ្នំពេញ ៖ ការទិញអចលនវត្ថុនៅពេលបច្ចុប្បន្នភាគច្រើនម្ចាស់គម្រោងតែងប្រើយុទ្ធវិធីនៃការបង់រំលោះ ដើម្បីអាចដណ្ដើមបាននូវចំណែកទីផ្សារ ដែលក្នុងមិនថាចំពោះប្រភេទដីឡូតិ៍ បណ្តុំលំនៅដ្ឋាន បុរី ឬគម្រោងខុនដូនោះទេ។ ប៉ុន្តែអ្វីដែលសំខាន់ និងត្រូវប្រុងប្រយ័ត្នខ្ពស់បំផុតសម្រាប់អតិថិជនគឺការពិនិត្យទៅលើរាល់ការរៀបចំឯកសារច្បាប់ឱ្យបានត្រឹមត្រូវជៀសវាងជួបហានិភ័យ ឬការខាតបង់ទ្រព្យ។
|ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា លោកឃាង ពុទ្ធី បានមានប្រសាសន៍ឱ្យដឹងនៅល្ងាចថ្ងៃទី១៣ ខែមករា ឆ្នាំ២០២១ថា ការផ្តល់លក្ខខណ្ឌងាយស្រួលដោយការបង់រំលោះទៅលើការទិញអចលនវត្ថុបានក្លាយទៅជាយុទ្ធសាស្ត្រដ៏ពេញនិយមរបស់ម្ចាស់គម្រោងដើម្បីអាចទទួលបានចំណែកទីផ្សារ ក៏ដូចជាជំរុញការលក់ឱ្យបានច្រើនក្នុងពេលដ៏ខ្លី។
លោកបន្តថា “ថ្វីត្បិតការទទួលបានលក្ខខណ្ឌបង់រំលោះទៅលើការទិញអចលនវត្ថុបានបង្កភាពងាយស្រួលដល់អ្នកដែលមានធនធានមិនគ្រប់គ្រាន់ ប៉ុន្តែមានបំណងចង់បានអចលនវត្ថុជាកម្មសិទ្ធិ ដូចជាទិញដីសម្រាប់សាងសង់លំនៅដ្ឋាន ការទិញលំនៅដ្ឋានសម្រាប់ស្នាក់នៅ ឬសម្រាប់វិនិយោគបន្ត ក៏ដូចជាការទិញគម្រោងខុនដូនៅក្នុងក្រុងជាដើម អតិថិជនទាំងអស់ត្រូវតែការយកចិត្តទុកដាក់ទៅលើឯកសារច្បាប់ដែលពាក់ព័ន្ធទៅនឹងគម្រោង ក៏ដូចជាឯកសារពាក់ព័ន្ធនឹងការទិញលក់” ។
លោកបានបញ្ជាក់ថា “ភាគច្រើនការខាតបង់តែងកើតមានឡើងចំពោះអ្នកដែលខ្វះការប្រុងប្រយ័ត្ន ដោយសំអាងថាអ្នកណែនាំទិញគម្រោងជាអ្នកធ្លាប់ស្គាល់គ្នា ឬទុកចិត្តទៅលើម្ចាស់គម្រោងជាដើម។ មុនពេលយើងសម្រេចចិត្តទិញផ្ទះ ទិញដីនៅក្នុងគម្រោងណាមួយត្រូវពិនិត្យមើលដំបូងគេគឺប័ណ្ណសម្គាល់ពីកម្មសិទ្ធិ តើម្ចាស់កម្មសិទ្ធិជាអ្នកណា មានទំហំប៉ុន្មាន មានទីតាំងនៅកន្លែងណាឱ្យបានច្បាស់ ហើយបើអាចគឺត្រូវចុះទៅឱ្យដល់ទីតាំងដើម្បីប្រាកដក្នុងចិត្តថាមិនមែនជាគម្រោងខ្យល់។
លោកថា អ្វីដែលសំខាន់បំផុតនោះគឺនៅពេលបង់ប្រាក់ ទាំងការបង់ប្រាកក់ ទាំងការបង់បង់ប្រាក់រំលោះប្រចាំខែ ចាំបាច់បំផុតត្រូវតែមានលិខិតស្នាមបញ្ជក់ពីការបង់ប្រាក់ លិខិតទទួលប្រាក់ ដោយមានការចុះបញ្ជីលេខវិក័យបត្រ និងមានប្រថាប់ត្រាក្រុមហ៊ុនត្រឹមត្រូវ ហើយអាចមានការដឹកឮដោយក្រុមអ្នកច្បាប់ ឬមេធាវីរឹតតែល្អ។ នៅពេលយើងមានការប្រុងប្រយ័ត្នកាន់តែខ្ពស់ ហានិភ័យក៏ត្រូវបានកាត់បន្ថយ ដូច្នេះការប្រុងប្រយ័ត្ននេះត្រូវតែទន្ទេញ និងត្រូវតែអនុវត្តជៀសវាងជួបការខាតបង់ដោយសារតែការធ្វេសប្រហែស៕
