ដោយ:សុខុម
បាងកក: ក្រុមហ៊ុនប្រេងឥន្ធនៈ និងអាជីវកម្មលក់រាយខ្នាតយក្សរបស់ថៃ PTT Oil and Retail Business (PTTOR) ដែលគេស្គាល់ថា PTT គ្រោងចំណាយដើមទុនរហូតដល់ប្រមាណ២,៥ពាន់លានដុល្លារអាមេរិក សម្រាប់ផែនការពង្រីកអាជីវកម្មស្នូលទាំង៣ របស់ខ្លួនពីឆ្នាំ២០២១ ដល់ឆ្នាំ២០២៥ ។ នេះបើយោងតាមការបញ្ជាក់របស់លោកស្រី Jiraphon Kawswat អគ្គនាយិកាស្ដីទីនៃក្រុមហ៊ុននេះ។
យោងតាមកាសែត The Nation ចុះផ្សាយកាលពីថ្ងៃទី២១ ខែមករា បានឱ្យដឹងថា ក្នុងចំណោមដើមទុនសរុប យ៉ាងច្រើនសន្ធឹកសន្ធាប់នេះ ចំនួន ៣៤,៦% នឹងត្រូវយកទៅវិនិយោគលើអាជីវកម្ម ប្រេងឥន្ធនៈ ២៨,៦ភាគរយ វិនិយោគលើអាជីវកម្មមិនមែនប្រេង និង ២១,៨ភាគរយ វិនិយោគលើអាជីវកម្មអន្តរជាតិរបស់ខ្លួន។ ហើយសល់ ១៥% ទៀតនឹងត្រូវវិនិយោគលើអាជីវកម្មផ្សេងៗទៀត និងលើការស្វែងរកឱកាសអាជីវកម្មថ្មី។
លោកស្រី Jiraphon Kawswat បានគូសបញ្ជាក់ថា សម្រាប់អាជីវកម្មប្រេងឥន្ធនៈរបស់ខ្លួន ក្រុមហ៊ុនមានគម្រោងបង្កើនស្ថានីយប្រេង PTT នៅក្នុងប្រទេសថៃ ពីចំនួន១.៩៨៦ស្ថានីយ ដល់ ៣.១០០ស្ថានីយ ត្រឹមឆ្នាំ២០២៥ ។
សម្រាប់អាជីវកម្មមិនមែនប្រេងឥន្ធនៈរបស់ខ្លួន ក្រុមហ៊ុនមានគម្រោងពង្រីកហាងកាហ្វេ Cafe Amazon ក្នុងប្រទេសថៃ ពីចំនួន ៣.១៨៦ សាខាដល់ ៥.៨០០សាខា។ សម្រាប់អាជីវកម្មអន្តរជាតិរបស់ខ្លួន ក្រុមហ៊ុននឹងផ្ដោតលើការពង្រីកស្ថានីយប្រេងឥន្ធនៈ និងសាខាហាងកាហ្វេ Cafe Amazon ក្នុងប្រទេសកម្ពុជា ឡាវ មីយ៉ាន់ម៉ា វៀតណាម និងហ្វីលីពីន។
ក្រុមហ៊ុនក៏នឹងបង្កើនសាខាហាងកាហ្វេ Cafe Amazon នៅក្នុងប្រទេសចិន បន្ថែមទៀតផងដែរ។ បច្ចុប្បន្នក្រុមហ៊ុន PTT មានស្ថានីយប្រេងឥន្ធនៈ រហូតដល់ទៅ៣២៩ស្ថានីយនៅក្នុងទីផ្សារបរទេស។
លោកស្រី Jiraphon Kawswat បានបន្ថែមទៀតថា ក្រុមហ៊ុនក៏នឹងបើកស្ថានីយបញ្ចូលថាមពលសម្រាប់រថយន្តអគ្គិសនី នៅលើផ្លូវសំខាន់ៗទូទាំងប្រទេសថៃ ផងដែរ។
បច្ចុប្បន្ន ក្រុមហ៊ុនកំពុងសាកលល្បងសេវាកម្មនេះ នៅតាមស្ថានីប្រេងឥន្ធនៈ PTT នៅ២៥ទីតាំងរបស់ខ្លួន៕
