ដោយ ៖ រ៉ាណេត
ភ្នំពេញ៖ បើទោះបីគម្រោងសាងសង់ស្ពានពីតំបន់ជ្រោយចង្វារឆ្ពោះទៅកាន់តំបន់អរិយក្សត្រមិនទាន់ចេញជារូបរាងក៏ដោយ ក៏បច្ចុប្បន្នដីធ្លីនៅក្នុងនៅក្នុតំបន់នេះនៅតែមានតម្រូវការខ្ពស់ពីក្រុមអ្នកអភិវឌ្ឍន៍លំនៅឋាន បុរី និងឈ្មួញអចលនទ្រព្យផ្សេងៗជាច្រើន។
លោកស្រីតាំង ហួរ នាយិកាក្រុមហ៊ុនអចលនទ្រព្យ Amatak Property Service បានឱ្យដឹងកាលពីពេលថ្មីៗនេះថា តំបន់អរិយក្សត្រ មានអ្នកអភិវឌ្ឍន៍ និងឈ្មួញដីធ្លីជាច្រើនបានសម្រុកទៅកាន់តំបន់នេះដើម្បីស្វែងរកទិញដីធ្លីសម្រាប់អភិវឌ្ឍ និងទុកលក់យកចំណេញ ខណៈតម្លៃដីធ្លីនៅតំបន់នេះមានស្ថានភាពធូរថ្លៃ។
លោកស្រីតាំង ហួរបន្តឱ្យដឹងទៀតថា ភាគច្រើនដែលអ្នកស្វែងរកទិញដីនៅតំបន់នេះ គឺសម្រាប់ធ្វើការអភិវឌ្ឍន៍បុរី និងលំនៅឋាន និងមួយចំនួនទៀត គេទិញទុកលក់យកចំណេញ ដោយសារគម្រោងស្ពានឆ្លងកាត់ទន្លេ និងផ្លូវក្រវ៉ាត់ក្រុងបុកចូលទៅកាន់តំបន់នេះដែលជាហេតុធ្វើឱ្យមានការទាក់ទាញកាន់តែខ្លាំងលើការវិនិយោគដីធ្លី និងម្យ៉ាងតំបន់នេះ នៅជិតក្រុងភ្នំពេញ ។
លោកស្រីបញញជាក់ថា “សម្រាប់ដីធ្លីនៅតបន់នេះ លែងមានទំហំៗហើយ មានតែតូចៗ ព្រោះគេដើរប្រមូលទិញអស់ហើយ តែសម្រាប់តម្លៃវិញគឺទៅតាមទីតាំង និងកន្លែងដែលមានសក្តានុពល និង ជាប់គម្រោង តែយ៉ាងបច្ចុប្បន្ននេះ មានប្រជាជនរស់នៅច្រើននៅក្នុងតំបន់នេះ”។
លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal បានឱ្យដឹងដែរថា ដែនដីអរិយក្សត្រដែលស្ថិតនៅភាគខាងកើតនៃរាជធានីភ្នំពេញ គឺមានភាពល្អប្រសើរដែលទៅថ្ងៃអនាគតខាងមុខនេះ អាចក្លាយទៅជាទីក្រុងរណបថ្មីមួយទៀត ។
លោកឧកញ៉ា បន្តថា បច្ចុប្បន្នមានក្រុមហ៊ុនអភិវឌ្ឍន៍លំនៅឋាន កម្រិតមធ្យមមួយចំនួនកំពុងតែធ្វើកសកម្មភាពសាងសង់ នូវគម្រោងរបស់ខ្លួនដែលសកម្មភាពទំាងអស់នេះ បានជំរុញឱ្យមានតម្រូវការប្រើប្រាស់ដីធ្លី និងតម្លៃកើនឡើងជាបន្តបន្ទាប់ ជាពិសេសនៅតំបន់ទីប្រជុំជន។
លោកបញ្ជាក់ថា” អ្វីជាឧបសគ្គសម្រាប់តំបន់អរិយក្សត្រគឺរង់ចាំវត្តមានស្ពានចម្លងតភ្ជាប់ពីតំបន់ស្វាយជ្រុំមកកាន់តំបន់ជ្រោយចង្វារប៉ុណ្ណោះ” ។
កាលពីពេលកន្លងទៅ រដ្ឋាភិបាលបានបង្ហើបប្រាប់ឱ្យដឹងថា រដ្ឋាភិបាលនៃប្រទេសកូរ៉េបានយល់ព្រមក្នុងជួយសាងសង់ស្ពានតភ្ជាប់រវាងរាជធានីភ្នំពេញ និងខេត្តកណ្តាល ហើយតាមរយៈផែនការនៃការសាងសង់ស្ពាននេះ បានក្លាយជាចលករមួយក្នុងការរុញច្រានទីផ្សារអចលនទ្រព្យ ជាពិសេសដីធ្លីនៅតំបន់អរិក្សត្យនេះមានភាពរស់រវើក បើទោះបីមិនទាន់មានកាលបរិចេ្ចទជាក់លាក់ណាមួយក្នុងការសាងសង់ស្ពានទាំងនោះនៅឡើយ៕
