ដោយៈ ប៊ី
បាងកកៈ បន្ទាប់ពីពន្យាពេលសាងសង់កគម្រោងថ្មីៗកាលពីឆ្នាំមុន ក្រុមហ៊ុនអភិវឌ្ឍន៍ Ananda Development ដែលបានចុះបញ្ជីនៅផ្សារហ៊ុនថៃ នឹងត្រូវបើកដំណើរសាងសង់គម្រោងខុនដូចំនួន៥ នៅទីក្រុងបាងកក ដែលមានតម្លៃសរុប២៤,៤ពាន់លានបាត (ជាង៨១២លានដុល្លារអាមេរិក) នៅឆ្នាំ២០២១។ នេះបើយោងតាមការចេញផ្សាយរបស់កាសែតបាងកកប៉ុស្តិ៍កាលពីសប្តាហ៍មុន។
លោក Chanond Ruangkritya ប្រធាន និងជានាយកប្រតិបត្តិក្រុមហ៊ុន Ananda Development បាននិយាយថា ការរៀបចំនគរូបនីយកម្ម និងការរស់នៅខុនដូក្បែរស្ថានីយឆ្លងកាត់ដ៏ធំមួយនឹងនៅតែជានិន្នាការសម្រាប់អ្នករស់នៅ បើទោះបីជាការផ្ទុះឡើងនៃជំងឺកូវីដ១៩ ដែលបានផ្លាស់ប្តូរឥរិយាបថអតិថិជនទៅរស់នៅក្នុងលំនៅដ្ឋានដែលមានកម្ពស់ទាបក៏ដោយ។
លោកបានមានប្រសាសន៍ថា “យើងមិនដឹងថានៅពេលណាការរីករាលដាលនៃជំងឺរាតត្បាតនឹងបញ្ចប់ ហើយថាតើវាប៉ះពាល់ដល់ជំនឿរបស់យើងលើរៀបចំនគរូបនីយកម្ម និងគំរូអាជីវកម្មរបស់យើង ដោយផ្តោតលើខុនដូដែរឬទេ។ ទោះបីជាមានការផ្គត់ផ្គង់ច្រើននៅក្នុងទីផ្សារក្តី ខុនដូក៏មិនមានស្ថានភាពអាក្រក់ដូចមនុស្សជាច្រើនគិតដែរ”។
យោងតាមមជ្ឈមណ្ឌលព័ត៌មានអចលនទ្រព្យបានឲ្យដឹងថា គិតត្រឹមចុងឆ្នាំ២០២០ បរិមាណលំនៅដ្ឋានដែលមិនទាន់លក់ចេញនៅទីក្រុងបាងកក និងខេត្តធំៗចំនួន២៦ មានចំនួនសរុប៣១៩.៥២៧យូនីត ដែលមានតម្លៃសរុប១ទ្រីលានបាត កើនឡើងពី៣០១.០៩៨យូនីតនៅចុងឆ្នាំ២០១៩។
នៅក្នុងចំណោមលំនៅដ្ឋានសរុបនៅឆ្នាំ២០២០ ដែលមិនទាន់បានលក់ចេញ គឺក្នុងនោះមានខុនដូ១៣១.០០៦យូនីត កើនឡើងពី១១០.៥៣៧យូនីត ហើយរំពឹងថានឹងកើនឡើងដល់១៥២.៦៨២នៅចុងឆ្នាំ ២០២១ ។
លោក Chanond បាននិយាយថា នៅឯទីក្រុងបាងកក ចំនួនខុនដូ ដែលមិនទាន់បានលក់មានចំនួន ១០០.០៥៥យូនីត ដែលមានតម្លៃសរុប៣៨២,៦៦ពាន់លានបាត ត្រូវចំណាយពេល៣ ទៅ៦ឆ្នាំ ដើម្បីលក់ចេញអស់។
ដោយមិនមានគម្រោងថ្មីៗបានចាប់ផ្តើមកាលពីឆ្នាំមុន ក្រុមហ៊ុន Ananda បានលក់លំនៅដ្ឋានបានប្រមាណ១៧,៥ ពាន់លានបាត ក្នុងនោះទឹកប្រាក់ប្រមាណ១៥,១ពាន់លានបាតពីការលក់ខុនដូ ស្មើនឹង៨៦ភាគរយនៃការលក់លំនៅដ្ឋានសរុបរបស់ខ្លួន។
ការលក់គម្រោងលំនៅដ្ឋានរបស់ក្រុមហ៊ុននេះក្នុងឆ្នាំ២០២០ សម្រេចបានទំហំទឹកប្រាក់១៦,៨ពាន់លានបាត ដែលខ្ពស់ជាងគោលដៅលក់របស់ខ្លួន ខណៈការលក់ក្នុងឆ្នាំ២០១៩ សម្រេចបាន២៦,៦៥ពាន់លានបាត។
គម្រោងខុនដូថ្មីទាំង៥នេះរបស់ក្រុមហ៊ុននឹងមានទីតាំងស្ថិតនៅតំបន់ Saphan Khwai តំបន់ Sam Yan តំបន់ Thong Lor តំបន់ Sukhumvit Soi 38 និងតំបន់ Lam Salee ។
ក្រុមហ៊ុននេះរំពឹងថា ការលក់គម្រោងទាំង៥នេះ នឹងសម្រេចបានទំហំទឹកប្រាក់១៨,៥៧ពាន់លានបាតគិតត្រឹមនៅចុងឆ្នាំ២០២១៕
