ដោយ ៖ រ៉ាណេត
ភ្នំពេញ ៖ រដ្ឋាភិបាលកម្ពុជាតែងខាតបង់ប្រាក់រាប់លានដុល្លារទៅលើការចំណាយដោះស្រាយសំណងលើសំណង់លំនៅដ្ឋានរំលោកចំណីផ្លូវមួយចំនួនរបស់ប្រជាពលរដ្ឋនៅពេលអនុវត្តគម្រោងធ្វើឱ្យប្រសើរឡើងនូវហេដ្ឋារចនាសម្ព័ន្ធផ្លូវថ្នល់នានានៅទូទាំងប្រទេស។ ជាមួយគ្នានេះ ដើម្បីបញ្ចៀសនូវបញ្ហាទាំងនេះ រដ្ឋាភិបាលបាននិងកំពុងរៀបចំអនុក្រឹត្យស្ដីពីការគ្រប់គ្រងលើការប្រើប្រាស់ដីចំណីផ្លូវ ខណៈគម្រោងអភិវឌ្ឍន៍ និងពង្រីកផ្លូវជាច្រើនមានភាពយឺតយ៉ាវដោយសារសំណង់រំលោភលើដីផ្លូវសាធារណៈទាំងអស់នេះ។
លោកលឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន បានឱ្យដឹងថានៅថ្ងៃទី២៣ ខែកុម្ភៈ ឆ្នាំ២០២១ថា បច្ចុប្បន្នពាក់ព័ន្ធទៅនឹងបញ្ហាដូចដែលបានលើកឡើងខាងលើ ក្រសួងកំពុងរៀបចំសេចក្តីព្រាងអនុក្រឹត្យស្តីពីការងារគ្រប់គ្រងដីចំណីផ្លូវថ្នល់ និងផ្លូវរថភ្លើង ក្នុងគោលបំណងលុបបំបាត់បាតុភាពការទន្ទ្រានយកដីចំណីផ្លូវទៅធ្វើការកសាងសំណង់ ឬដាំដំណាំផ្សេងៗ សំដៅទប់ស្កាត់ឧប្បទ្ទវហេតុគ្រោះ ថ្នាក់ចរាចរណ៍ និងការរក្សាសណ្តាប់ធ្នាប់សង្គមដែលតែងតែកើតមាននៅតាមបណ្ដាញផ្លូវ ក៏ដូចជាកាត់បន្ថយឧបសគ្គនានាដែលរាំងស្ទះដល់ការអភិវឌ្ឍផ្លូវ។
លោកបន្តឱ្យដឹងទៀតថា ក្រសួងសាធារណៈការ និងដឹកជញ្ជូនក៏មានគោលបំណងកាត់បន្ថយរាល់ការចំណាយរបស់រដ្ឋទៅលើការដោះស្រាយផលប៉ះពាល់ផ្ទះសំបែងប្រជាពលរដ្ឋដែលតាំងទីលំនៅតាមបណ្ដាញផ្លូវ បង្កលក្ខណៈងាយស្រួលដល់សមត្ថកិច្ចពាក់ព័ន្ធក្នុងការផ្ដល់ភាពស្របច្បាប់ដល់ប្រជាពលរដ្ឋដែលមានកម្មសិទ្ធិនៅតាមបណ្ដាញផ្លូវ និងធានាការអភិវឌ្ឍវិស័យហេដ្ឋារចនាសម្ព័ន្ធរូបវន្តប្រកបដោយនិរន្តរភាពនៅកម្ពុជា។
លោករដ្ឋលេខាធិការបានបញ្ជាក់ថា “សេចក្តីព្រាងអនុក្រឹត្យនេះបានកំណត់ឱ្យក្រសួងសាធារណការ និងដឹកជញ្ជូន មានសមត្ថកិច្ចក្នុងការគ្រប់គ្រង និងប្រើប្រាស់ដីចំណីផ្លូវជាតិ និងផ្លូវរថភ្លើងក្នុងការធ្វើផែនការ ការសិក្សាគម្រោងប្លង់អភិវឌ្ឍន៍ ផ្លូវជាតិ និងផ្លូវរថភ្លើង ឬផ្ដល់សេវាកម្មផ្សេងៗទៀត ដែលពាក់ព័ន្ធនឹងផ្លូវជាតិ និងផ្លូវរថភ្លើង ដើម្បីបម្រើផលប្រយោជន៍អ្នកប្រើប្រាស់ផ្លូវជាតិ និងផ្លូវរថភ្លើងឱ្យមានប្រសិទ្ធភាពខ្ពស់”។
នៅឆ្នាំ២០២១នេះ ក្រសួងសាធារណការ និងដឹកជញ្ជូន មានផែនការជំរុញការអភិវឌ្ឍវិស័យដឹកជញ្ជូនមានដូចជា បន្តស្តារ និងពង្រឹងគុណភាពផ្លូវជាតិលេខ៣១ លេខ៣៣ លេខ៤១ លេខ៤៨ លេខ៧១សេ និងលេខ៧ (ស្គន់-កំពង់ចាម និងកំពង់ចាម- ត្រពាំងផ្លុង)ពីប្រភេទផ្លូវក្រាលកៅស៊ូ២ ជាន់ (DBST) ទៅជាផ្លូវក្រាលបេតុងកៅស៊ូ (AC), ជំរុញការអនុវត្តគម្រោងសាងសង់ផ្លូវ ល្បឿនលឿនពីភ្នំពេញ-ក្រុងព្រះសីហនុ ដើម្បីបញ្ចប់នៅខែកញ្ញា ឆ្នាំ២០២២, បញ្ចប់ការចរចា និងរៀបចំកិច្ចព្រមព្រៀងសម្បទាន សម្រាប់ការសាងសង់ផ្លូវល្បឿនលឿនពីភ្នំពេញ-បាវិត, សិក្សា និងរៀបចំបំពាក់បន្ថែមនូវបរិក្ខារសុវត្ថិភាពចរាចរណ៍ និងរៀបចំបំពាក់កាមេរ៉ាចាប់ល្បឿននៅតាមផ្លូវជាតិ ផ្លូវខេត្ត និងតំបន់ទីប្រជុំជន ជាដើម៕
