ដោយ:គង់ សូរិយា
ភ្នំពេញ: ដើម្បីចូលរួមទប់ស្កាត់ការឆ្លងរាលដាលនៃជំងឺកូវីដ១៩ ក្រសួងប្រៃសណីយ៍និងទូរគមនាគមន៍ បានអំពាវនាវឱ្យសាធារណជនចូលរួមអនុវត្តន៍ និងរម្លឹកឡើងវិញនូវអត្ថន័យអំពីពណ៌ ក្រោយស្កេន QR Code “ទប់ស្កាត់កូវីដ (Stop Covid) ដែលអាចប្រើជាសំណាញ់សុវត្ថិភាព ការពារទីតាំងអាជីវកម្មឱ្យដំណើរការជាធម្មតាតាមបែបគន្លងថ្មី។
នៅក្នុងរូបភាពផ្លូវការបង្ហាញដោយក្រសួងប្រៃសណីយ៍ និងទូរគមនាគមន៍ នៅរសៀលថ្ងៃទី៩ ខែមីនា ឆ្នាំ២០២១នេះ បានឱ្យដឹងថា ការស្កេន QR Code “ទប់ស្កាត់កូវីដ” ដើម្បីបានដឹងពីស្ថានភាពពាក់ព័ន្ធនឹងជំងឺកូវីដ១៩ របស់បុគ្គលមកដល់ទីតាំង តាមរយៈការបង្ហាញអត្ថន័យ នៃពណ៌ណាមួយលើអេក្រង់ក្រោយពេលស្កេន ដែលមានអត្ថន័យចំនួន៣យ៉ាងពីការស្កេននេះ។
ទី១ សម្រាប់ពណ៌បៃតង គឺបញ្ជាក់ពីស្ថានភាពធម្មតា បុគ្គលនោះមិនត្រូវបានកត់ត្រា ថាមានពាក់ព័ន្ធជាមួយអ្នកជំងឺកូវីដ១៩(អាចអនុញ្ញាតឱ្យបុគ្គលចូលដោយអនុវត្តតាមវិធានសុខាភិបាល)។ ទី២ ពណ៌លឿង គឺបញ្ជាក់ពីបុគ្គល ដែលបានប៉ះពាល់អ្នកជំងឺកូវីដ១៩ ដោយផ្ទាល់ ឬដោយប្រយោលក្នុងអំឡុងពេល១៤ថ្ងៃ ចុងក្រោយនិងមិនទាន់បញ្ចប់កាតព្វកិច្ចធ្វើចត្តាឡីស័ក (អាចសម្រេចមិនឱ្យបុគ្គលនោះចូល)។
ទី៣.ពណ៌ក្រហម បញ្ជាក់ពីស្ថានភាពហានិភ័យខ្ពស់ថា បុគ្គលនោះមានជំងឺកូវីដ១៩ (មិនត្រូវអនុញ្ញាតឱ្យបុគ្គលនោះចូលទីតាំងរបស់ខ្លួន។ ម្ចាស់ទីតាំងគួរចាត់បុគ្គលិកប្រចាំការរង់ចាំ ស្នើឱ្យអ្នកចូលទាំងអស់ត្រូវស្កេន ហើយពិនិត្យមើលពណ៌ក្រោយស្កេន មុនអនុញ្ញាតឱ្យចូលទីតាំងរបស់ខ្លួន។
បន្ទាប់ពីទទួលបានការអនុញ្ញាត របស់សម្តេចនាយករដ្ឋមន្ត្រីតេជោ ហ៊ុន សែន ឱ្យប្រើប្រាស់ប្រព័ន្ធ QR Code “ទប់ស្កាត់កូវីដ ក្នុងរយៈពេល១២ថ្ងៃមកនេះ ទីតាំងចុះឈ្មោះបង្កើត QR Code មានចំនួនជិត១០៩,៩២២កន្លែង និងមានបុគ្គលស្កេនតាមទីតាំងផ្សេង ៗជិត៥លានដង។
តាមរយៈការប្រើប្រាស់ប្រព័ន្ធនេះ អ្នកស្កេន អាចទទួលបានដំណឹងភ្លាមៗ ប្រសិន បើមានករណីពាក់ព័ន្ធនឹងជំងឺកូវីដ-១៩ ហើយម្ចាស់ទីតាំង អាចដឹងពីស្ថានភាពបុគ្គលម្នាក់ៗដែលទៅដល់ទីតាំងរបស់ខ្លួន៕
