ដោយៈរតនៈ
ភ្នំពេញៈ ប្រជាពលរដ្ឋមួយចំនួនធំទិញដីឡូតិ៍ ទុកលក់វិញដើម្បីលក់យកចំនេញ ប៉ុន្តែក៏មានប្រជាពលរដ្ឋមួយចំនួន មានលុយទិញដីហើយ តែមិនទាន់មានថវិកាសម្រាប់សាងសង់ផ្ទះ។ ចុះបើមានថវិកាសាងសង់ហើយ គួរសាងសង់បែបណាដើម្បីឲ្យសន្សំសំចៃ?។
អនុប្រធានសមាគមអ្នកអភិវឌ្ឍន៍ដីឡូត៍កម្ពុជា លោកឆម ចំរើន បានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២៦ ឧសភានេះថា ប្រសិនបើប្រជាពលរដ្ឋទិញដីឡូត៍ក្នុងតំបន់ ដែលអាចប្រកបអាជីវកម្មបាន គឺអាចសាងសង់ជាប្រភេទផ្ទះសម្រាប់លក់ដូឥវ៉ាន់ផ្សេង(Shop House)។ ប្រសិនបើសាងសង់សម្រាប់រស់នៅ ហើយជាដីនៅកណ្ដាលក្រុងនោះ គឺអាចសាងសង់ផ្ទះខ្ពស់ ដែលមានច្រើនជាន់ ព្រោះថា ដីនៅតំបន់នោះមានតម្លៃថ្លៃ។
លោកបន្តថា អ្នកដែលទិញដីឡូតិ៍ភាគច្រើន មិនបានសាងសង់ផ្ទះភ្លាមៗនោះទេទិញសម្រាប់ទុកចំណេញ។
តែបើទិញដើម្បីសាងសង់ផ្ទះ បើសិនជាធ្វើដោយខ្លួនឯងគឺចំណាយច្រើន ដោយសារតែមិនបានយល់ដឹង ពីការសាងសង់ច្បាស់លាស់ហើយចេះតែទិញសម្ភារៈសំណង់អាចពេលខ្លះច្រើនជ្រុល ពេលខ្លះតិចជ្រុល ព្រោះមិនមានជំនាញក្នុងការគណនា លុះដល់ពេលគិតពីចំណាយគឺច្រើនជាងធម្មតា។
មួយវិញទៀត ប្រសិនបើជួលជាងដោយខ្លួនឯង ដោយមិនមានអ្នកជំនាញនិងដឹងពីទីផ្សារតម្លៃជួលជាង អាចជួលមកថ្លៃ ហើយធ្វើដោយមិនមានប្រសិទ្ធិភាពទៀតផង។
លោក ឆម ចំរើនបានពន្យល់ថា ប្រសិនបើចង់សាងសង់ផ្ទះហើយ យើងគ្មានជំនាញនោះទេ គួរតែប្រគល់ផ្ដាច់ឲ្យអ្នកជំនាញសាងសង់វិញល្អជាង(ម៉ៅឲ្យអ្នកសាងសង់)ព្រោះអ្នកជំនាញអាចគណនាពីសំភារៈ ជាមួយគ្នានេះអ្នកជំនាញ គឺស្គាល់ជាងសាងសង់ដែលមានស្នាដៃល្អ ដែលអាចជួលក្នុងតម្លៃសមរម្យផងដែរ។
ជាមួយគ្នានេះលោកស្រី អាន សុធីតា អ្នកឯកទេសអចលនទ្រព្ ក៏បានលើកឡើងដែរថា ប្រសិនបើប្រជាពលរដ្ឋមានដីខ្លួនឯងហើយ គួរតែជ្រើសរើសវិស្វករជំនាញ ដើម្បីសាងសង់ជាជាងការជួលជាង ដែលមិនមានជំនាញច្បាស់លាស់មកសាងសង់ ព្រោះចង់ចំណេញដែលអាចឲ្យជួបហានីភ័យ។
លោកស្រីបន្តថា “យ៉ាងនេះក្តីសំណង់ដែលសាងសង់ខ្លួនឯង នឹងមិនរៀបរយដូចតាមបុរី ឬ ផ្ទះល្វែង ដែលគេសាងសង់ស្រាប់នោះទេ ព្រោះម្ចាស់ផ្ទះនិមួយៗស្រលាញ់ម៉ូតផ្ទះផ្សេងៗគ្នា ខណៈដែលមានដីឡូត៍ជាប់គ្នា”៕
