ចិននឹងផ្តល់វ៉ាក់សាំងកូវីដ-១៩ជាង១ពាន់លានដូសទៅប្រទេសជាមិត្តនៅត្រឹមដំណាច់ឆ្នាំ២០២១ ខណៈវ៉ាក់សាំងពីរមុខទៀតរង់ចាំ

ដោយៈសុខុម

ប៉េកាំង: រដ្ឋាភិបាលចិន អាចផ្គត់ផ្គង់វ៉ាក់សាំងកូវីដ-១៩ បានរហូតដល់ទៅជាង១ពាន់លានដូសទៅបរទេសក្នុងឆ្នាំ២០២១នេះ ហើយអាចបង្កើនការផ្គត់ផ្គង់បន្ថែមទៀតនៅឆ្នាំ២០២២។ នេះបើយោងតាមសារព័ត៌មាន The Edge Markets ចុះផ្សាយកាលពីថ្ងៃទី៤ មិថុនា។

កាសែត Global Times បានចុះផ្សាយថា វ៉ាក់សាំងចិនចំនួន២ទៀត ដែលផលិតដោយក្រុមហ៊ុនឱសថ CanSino Biologics និងវិទ្យាស្ថានផលិតផលជីវសាស្ត្រក្រុងវូហាន (Wuhan Institute of Biological Products) កំពុងរង់ចាំការអនុម័តទទួលស្គាល់ជាផ្លូវការពីអង្គការសុខភាពពិភពលោក (WHO)។

លោក Zheng Zhongwei នាយកមជ្ឈមណ្ឌលអភិវឌ្ឍន៍វិទ្យាសាស្ត្រវេជ្ជសាស្ត្រ និងបច្ចេកវិទ្យា (Development Center for Medical Science and Technology) នៃគណៈកម្មការជាតិសុខាភិបាល របស់ប្រទេសចិនបានទម្លាយឱ្យដឹងថា វ៉ាក់សាំងដែលផលិតដោយក្រុមហ៊ុន CanSino Biologics និងវិទ្យាស្ថានផលិតផលជីវសាស្ត្រ ក្រុងវូហាន កំពុងស្ថិតក្នុងបញ្ជីឈ្មោះវ៉ាក់សាំង ដែលរង់ចាំការអនុម័តទទួលស្គាល់ជាផ្លូវការ ពីអង្គការសុខភាពពិភពលោក។

លោកបានថ្លែងបែបនេះ ក្នុងវេទិកាអាស៊ីក្រុងប៉អៅ ឆ្នាំ២០២១ (2021 Boao Forum for Asia) នៅក្រុង Qingdao ខេត្តសានតុង ប្រទេសចិន កាលពីថ្ងៃពុធ ទី២មិថុនា កន្លងទៅ។

ការប្រកាសនេះ ធ្វើឡើងក្រោយពីអង្គការសុខភាពពិភពលោក បានអនុម័តទទួលស្គាល់វ៉ាក់សាំងស៊ីណូហ្វាម (Sinopharm) នៅថ្ងៃទី៧ ខែឧសភា និងទទួលស្គាល់វ៉ាក់សាំងស៊ីណូវ៉ាក់ (Sinovac) នៅថ្ងៃទី០១ ខែមិថុនា ឆ្នាំ២០២១ នេះ៕