ដោយៈ ម៉ាណេត
ភ្នំពេញៈ កម្ពុជាបង្ហាញឱកាសវិនិយោគជាច្រើន សម្រាប់ក្រុមហ៊ុន ដែលមានមូលដ្ឋាននៅប្រទេសសិង្ហបុរី និងដៃគូអន្តរជាតិ លើវិស័យដឹកជញ្ជូន ដោយសារបរិយាកាសពាណិជ្ជកម្មរស់រវើកនៅប្រទេសកម្ពុជា និងកំណើនសេដ្ឋកិច្ចក្នុងរយៈពេលមួយទសវត្សរ៍ចុងក្រោយនេះ។
ជាក់ស្តែង ក្រុមហ៊ុន BEST Inc., ផ្តល់ដំណោះស្រាយខ្សែសង្វាក់ផ្គត់ផ្គង់ឆ្លាតវៃឈានមុខគេ និងជាអ្នកផ្តល់សេវាកម្មដឹកជញ្ជួននៅប្រទេសចិន បានប្រកាសពង្រីកបន្ថែមទៀតរបស់ខ្លួនទៅកាន់អាស៊ីអាគ្នេយ៍ រួមមានកម្ពុជាផងដែរ។
បើទោះបីជាវិបត្តិកូវីដ១៩ មិនទាន់បង្ហាញភាពធូរស្បើយយ៉ាងក្តី ក្រុមហ៊ុន Flash Express របស់ថៃបានបង្ហាញមហិច្ឆតារបស់ខ្លួន ដោយប្រកាសថា ក្រុមហ៊ុនត្រៀមឈានជើងចូលទីកម្ពុជា មីយ៉ាន់ម៉ា និងវៀតណាម នៅ២០២២។
ក្រុមហ៊ុន Grab ដែលទីស្នាក់ការកណ្តាលនៅសឹង្ហបុរី ក៏បានប្រកាសពង្រីកសេវាកម្មដឹកជញ្ជួនម្ហូបអាហាររបស់ខ្លួន “GrabMart” ទៅក្នុងទីផ្សារកម្ពុជា និងបណ្តាប្រទេសចំនួន៧ នៅតំបន់អាស៊ីអាគ្នេយ៍។
ប្រធានក្រុមហ៊ុន YCH លោក Robert Yap មានប្រសាសន៍ថា ប្រទេសកម្ពុជាមានកំណើនផលិតផលក្នុងស្រុកសរុបខ្ពស់ ហើយមានសក្តានុពលសម្រាប់ការវិនិយោគនាពេលខាងមុខ។
លោកបានពន្យល់ថា “ហេដ្ឋារចនាសម្ព័ន្ធភស្តុភាររបស់ប្រទេសកម្ពុជាមិនទាន់មានការអភិវឌ្ឍគ្រប់គ្រាន់នៅឡើយទេនាពេលបច្ចុប្បន្ន នេះដែលជាហេតុមានការបង្កើតមជ្ឈមណ្ឌលចែកចាយរបស់ក្រុមហ៊ុនពហុជាតិជាច្រើនស្ថិតនៅក្នុងប្រទេសផ្សេងទៀតដូចជាថៃ ឬវៀតណាម”។
លោកបានថ្លែងថា “ដោយបានពិគ្រោះជាមួយអតិថិជនមួយចំនួនរបស់យើង ដែលកំពុងដំណើរការបណ្តាញផ្គត់ផ្គង់នៅអាស៊ាន ខ្ញុំគិតថាពួកគេនឹងដាក់បណ្តាញចែកចាយរបស់ពួកគេនៅក្នុងប្រទេសកម្ពុជា ប្រសិនបើប្រទេសនេះមានហេដ្ឋារចនាសម្ព័ន្ធអន្តរជាតិ។ ដូច្នេះនេះគឺជាឱកាសមួយ សម្រាប់ប្រទេសកម្ពុជាក្នុងការប្រកួតប្រជែងមួយនេះ”៕
