ដោយៈសុជាតា
ភ្នំពេញៈ បើទោះបីស្ថិតក្នុងអំឡុងពេល ដែលសេដ្ឋកិច្ចពិភពលោកកំពុងប្រឈមនឹងវិបត្តិដោយសារវីរុស Covid-19 ក៏ដោយ អគារ Chip Mong Tower ដែលមានកម្ពស់៤៥ជាន់ សាងសង់បានសម្រេចបាន៨០ភាគរយ នៃតួអគារទាំងមូល ហើយគម្រោងអាគារនេះគ្រោងនឹងបញ្ចប់ និងដាក់ឱ្យដំណើរការក្នុងឆ្នាំ២០២២ខាងមុខ។
លោក Simon Dell អគ្គនាយករងជាន់ខ្ពស់ផ្នែកសណ្ឋាគារ និងបដិសណ្ឋារកិច្ចនៃក្រុមហ៊ុន ជីប ម៉ុង ឱ្យដឹងលើផេករបស់គំរោងនេះថា អគារ Chip Mong Tower ត្រូវបានសាងសង់លើផ្ទៃដីទំហំ៨០០០ម៉ែត្រការ៉េ ដែលមានតម្លៃ៥០លានដុល្លារ និងតួអគារទាំងមូលមានផ្ទៃជាង១០ម៉ឺនម៉ែត្រការ៉េ ត្រូវបានវិនិយោគក្នុងទំហំទឹកប្រាក់ប្រមាណ១៥០លានដុល្លារ និងមានកំពស់ចំនួន៤៥ជាន់។
អាគារនេះចំនួន២០ជាន់ នឹងប្រើប្រាស់ជាសណ្ឋាគារលំដាប់ផ្កាយ៣ Fairfield by Marriott Phnom Penh។ ១០ជាន់សម្រាប់ការិយាល័យ ៥ជាន់សម្រាប់មណ្ឌលផ្សារទំនើប ជីប ម៉ុង និង៩ជាន់សម្រាប់ចំណតរថយន្ត និងជាន់ក្រោមដី។
លោក Michael Vong នាយកផ្នែកមណ្ឌលផ្សារទំនើបរបស់ក្រុមហ៊ុន Chip Mong Retails បានបញ្ជាក់ថា មណ្ឌលផ្សារទំនើប ជីប ម៉ុង ដែលនឹងមានវត្តមានក្នុងអគារ Chip Mong Tower នឹងមានផលិតផលផ្សេងៗជាច្រើន ផ្សារទំនើប ភោជនីយដ្ឋាន ហាងកាហ្វេ និងពាណិជ្ជកម្ម យីហោល្បីៗថ្មីៗជាច្រើនទៀត ដែលនឹងផ្ដល់បទពិសោធន៍នៃការទិញទំនិញបែបថ្មី និងសម្បូរបែបជូនដល់អតិថិជនផងដែរ៕
