ដោយៈជេស៊ីកា
សៀមរាបៈ សម្តេចតេជោហ៊ុន សែន នាយករដ្ឋមន្រ្តីនៃកម្ពុជាបានបង្ហើបពីការរៀបចំទីក្រុងរណប ឬទីក្រុងតូចមួយ នៅក្បែរព្រលានយន្តហោះអន្តរជាតិថ្មី ស្ថិតក្នុងស្រុកសូត្រនិគម ខេត្តសៀមរាប។
សម្តេចបានមានប្រសាសន៍ ក្នុងពេលចុះពិនិត្យពីដំណើរការសាងសង់ព្រលានយន្តហោះថ្មីនេះ កាលពីថ្ងៃទី៣ មេសាកន្លងមកថា ព្រលានយន្តហោះអន្តរជាតិថ្មីនេះ នឹងបញ្ចប់ការសាងសង់នៅឆ្នាំ២០២៣ខាងមុខ ដែលសមត្ថភាពព្រលាននេះ នឹងអាចទទួលការចុះចតយន្តហោះធំៗ និងអាចហោះអន្តរទ្វីបបាន។
សម្តេចបន្តថា “ទន្ទឹងនឹងការដាក់ដំណើរការ ព្រលានយន្តហោះនេះ ក្រុងរណបថ្មីឬទីក្រុងតូចមួយ ដែលមានឋានៈស្មើនឹងស្រុកនឹងលេចរូបរាងនៅតំបន់នេះ”។ សម្តេចបន្តថា “ជាមួយគ្នានេះ សម្តេចក្រឡាហោមស ខេងនឹងពិនិត្យមើលដំណើរការរៀបចំទីក្រុងនេះ”។
ជាមួយគ្នានេះ សម្តេចតេជោក៏បានបង្ហើប ពីការកសាងផ្លូវហាយវេប្រវែង១៥គីឡូម៉ែត្រ ដែលគ្រោងចំណាយទឹកប្រាក់១១០លានដុល្លារ ដែលផ្លូវនេះ នឹងសាងសង់ចេញពីព្រលានយន្តហោះ មកកាន់ក្រុងសៀមរាបផងដែរ ដែលផ្លូវថ្មីនេះនឹងជួយសម្រួលចរាចរណ៍ ដល់ការធ្វើដំណើររបស់ភ្ញៀវជាតិ អន្តរជាតិ។
សម្តេចតេជោហ៊ុន សែនបានស្នើឲ្យលោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនដាក់សំណើរទៅមិត្តចិន ដោយសុំកញ្វប់ជំនួយឥតសំណង៕
