ដោយ៖សុផារី
ភ្នំពេញ៖ គម្រោងសាងសង់ស្ថានីយបញ្ជូន និងបង្គោលភ្លើងវ៉ុលខ្ពស់ឆ្លងសមុទ្រនៅក្នុងខេត្តកោះកុង ប្រទេសកម្ពុជា ត្រូវបានដាក់ឱ្យដំណើរការជាផ្លូវការ នៅថ្ងៃទី១០ ខែឧសភា ឆ្នាំ២០២២នេះ។
គម្រោងខាងលើត្រូវបានបញ្ចប់នៅដើមខែធ្នូ ឆ្នាំ២០២១ ហើយជាគម្រោងកិច្ចសហប្រតិបត្តិការរវាងទីភ្នាក់ងារអភិវឌ្ឍន៍អន្តរជាតិបារាំង ស្ថានទូតបារាំងប្រចាំកម្ពុជា និងក្រសួងរ៉ែ និងថាមពលកម្ពុជា។ គម្រោងនេះនឹងផ្តល់ការផ្គត់ផ្គង់អគ្គិសនីដល់ខេត្តចំនួនបី រួមមាន ខេត្តកោះកុង កំពង់ចាម និងក្រចេះ។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពល មានប្រសាសន៍ថា នេះជាគម្រោងទ្រង់ទ្រាយធំ រួមមានការសាងសង់បញ្ជូន និងបំប្លែងថាមពលអគ្គិសនី ២៣០kV និងការសាងសង់បង្គោលភ្លើងតង់ស្យុងខ្ពស់ចំនួន៤ដើម ដែលឆ្លងកាត់ដៃទន្លេនៃខេត្តនានា ក្នុងនោះបង្គោលចំនួន៣មានកម្ពស់១៦៨ម៉ែត្រ ដែលជាបង្គោលអគ្គិសនីខ្ពស់បំផុតក្នុងប្រទេសកម្ពុជា។
លោកបន្តថា បន្ទាប់ពីគម្រោងនេះត្រូវបានដាក់ឱ្យដំណើរការ វានឹងជួយបណ្តាញអគ្គិសនីនៃខេត្តកោះកុង ខេត្តកំពង់ចាម និងខេត្តក្រចេះក្នុងប្រទេសកម្ពុជា មានទំនាក់ទំនងគ្នាទៅវិញទៅមក បំពេញតម្រូវការផ្គត់ផ្គង់ថាមពល និងផ្តល់អត្ថប្រយោជន៍ដល់ប្រជាពលរដ្ឋកម្ពុជា។
លោកបានមានប្រសាសន៍ថា រដ្ឋាភិបាលកម្ពុជាបានប្តេជ្ញាចិត្តក្នុងការអភិវឌ្ឍន៍ និងពង្រឹងថាមពលជាតិ និងការបញ្ជូនថាមពល និងការប្រែក្លាយ សំដៅផ្តល់ប្រភពថាមពល និងការផ្គត់ផ្គង់ថាមពលគ្រប់គ្រាន់សម្រាប់កំណើនសេដ្ឋកិច្ច ពាណិជ្ជកម្ម ឧស្សាហកម្ម និងតម្រូវការអ្នកប្រើប្រាស់។
លោកបានបន្តថា ការអភិវឌ្ឍលើវិស័យថាមពលអគ្គិសនីខាងលើ គឺដើម្បីអភិវឌ្ឍន៍កម្ពុជា ឲ្យប្រែក្លាយទៅជាប្រទេសមួយមានការផ្គត់ផ្គង់អគ្គិសនីគ្រប់គ្រាន់ ចីរភាពអាចទុកចិត្តបានមានគុណភាព និងមានតម្លៃសមរម្យ សម្រាប់អ្នកប្រើប្រាស់គ្រប់ប្រភេទនៅគ្រប់ទីកន្លែងទូទាំងប្រទេស ដែលជាកត្តាចម្បង និងចាំបាច់បំផុត សម្រាប់គាំទ្រដល់ការអភិវឌ្ឍសេដ្ឋកិច្ចនិងសង្គមព្រមទាំងការផ្ដល់នូវសុខមាលភាព នៃការរស់នៅជូនប្រជាពលរដ្ឋ៕
