ឯកឧត្តមថោង ខុន រដ្ឋមន្ត្រីក្រសួងទេសចរណ៍ និងឯកឧត្តម Mevlut Cavsoglu រដ្ឋមន្ត្រី ការបរទេស តួកគី ក្រោមអធិបតីភាពដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តម Erdogan ប្រធានាធិបតីតួកគី បានចុះហត្តលេខា លើកិច្ចព្រមព្រៀងស្តីពីកិច្ចសហប្រត្តិបត្តិការណ៍លើវិស័យទេសចរណ៍ រវាងព្រះរាជាណាចក្រកម្ពុជា និងសាធារណរដ្ឋតួកគី ដោយក្នុងនោះតួកគី នឹងភ្ជាប់ជើងហោះហើរដឹកអ្នកដំណើរ ពីតួកគី មកកម្ពុជា ក្នុងពេលឆាប់ៗខាងមុខនេះ។
កិច្ចព្រមព្រៀងស្តីពីកិច្ចសហប្រតិបត្តិការទេសចរណ៍កម្ពុជា និងតួកគី ដែលបានចុះហត្ថលេខា នារសៀលថ្ងៃទី២២ ខែតុលា ឆ្នាំ២០១៨ នៅវិមានរដ្ឋាភិបាល ( Istanbul ) កន្លងមកនេះ បានគូសបញ្ជាក់ច្បាស់ពីការសម្របសម្រួលការធ្វើដំណើរ និងជំរុញការតភ្ជាប់តាមផ្លូវអាកាស ការសិក្សាទីផ្សារ និងផ្សព្វផ្សាយរួមគ្នា ការផ្លាស់ប្តូរព័ត៌មាន ទិន្នន័យ ស្ថិតិ និងឯកសារគោលនយោបាយ ច្បាប់ទេសចរណ៍ ការអភិវឌ្ឍមូលធនមនុស្ស និងការបណ្តុះបណ្តាលជំនាញវីជ្ជាជីវៈទេសចរណ៍ ការផ្លាស់ប្តូរទស្សនកិច្ចរវាងផ្នែកសាធារណៈ និងឯកជនក្នុងវិស័យទេសចរណ៍ដើម្បីបង្កើតបណ្តាញធុរកិច្ចទេសចរណ៍ និងគំរោងវិនិយោគទេសចរណ៍ និងចូលរួមរាល់ព្រឹត្តិការណ៍ សិក្ខាសាលា សន្និសីទ និងកិច្ចប្រជុំនានាទៅវិញទៅមក។
ក្រោយការចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការទេសចរណ៍នេះ និងក្រោយពេលដែលមានកិច្ចព្រមព្រៀងស្តីពីការមិនយកពន្ធត្រួតគ្នារវាងកម្ពុជានិង តួកគីហើយ កម្ពុជាសង្ឃឹមថានឹងបានទទូលក្រុមហ៊ុន Turkish Airlines ហោះហើរត្រង់ពីតួកគីមកកម្ពុជា នៅពេលដ៏ខ្លីខាងមុខនេះ។ បច្ចុប្បន្ន ក្រុមហ៊ុន Turkey Airlines បានធ្វើការហោះហើរត្រង់មកកម្ពុជា ប្រចាំសប្តាហ៍ក្នុងលក្ខណៈ ជា Cargo។
បច្ចុប្បន្ន Turkish Airlines បានភ្ជាប់ជើងហោះហើរត្រង់ពីទីក្រុងអ៊ីស្តានប៊ុលមកកាន់តំបន់អាស៊ានភាគច្រើនតាមរយៈជើងហោះហើរមកម៉ាឡេស៊ី (រយៈពេល ១០ម៉ោង ៣៥នាទី), មកបាកកក (រយៈពេល ០៩ម៉ោង៤៥នាទី), មកសិង្ហបុរី (រយៈពេល១១ម៉ោង), មកហូជីមីញ វៀតណាម (រយៈពេល១១ម៉ោង)។
គួររំលឹក ថាតួកគី និងកម្ពុជាបានភ្ជាប់ទំនាក់ទំនងនយោបាយការទូតតាំងពីឆ្នាំ ១៩៦៨មកម្ល៉េះ ហើយបានភ្ជាប់លើទំនាក់ទំនង នយោបាយការទូតឡើងវិញនៅថ្ងៃទី១៤ ខែមិថុនា ឆ្នាំ១៩៩៤ ហើយនៅថ្ងៃទី១ ខែវិច្ឆិកាឆ្នាំ២០១៣ សាធារណរដ្ឋតួកគី បានបើក ស្ថានឯកអគ្គរដ្ឋទូត របស់ខ្លួន នៅរាជធានីភ្នំពេញ។ បច្ចុប្បន្នកម្ពុជាមានស្ថាន ឯកអគ្គកុងស៊ុល កិត្តិយសចំនួនពីរ នៅសាធារណរដ្ឋតួកគី (រដ្ឋធានី អង់ការ៉ា និង ទីក្រុង អុីស្តមបូល)។កម្ពុជាគ្រោងនឹងបើកស្ថានឯកអគ្គរាជទូតរបស់ខ្លួន នៅទីក្រុងអង់ការ៉ានៅឆ្នាំ2019៕
