ដោយ វុត្ថា
ភ្នំពេញ៖ ធនាគារនៅក្នុងប្រទេសមីយ៉ាន់ម៉ា បានសហការជាមួយនឹងអ្នកអភិឌ្ឍន៍ និងអ្នកសាងសង់លំនៅដ្ឋាន ផ្តល់ភាពងាយស្រួលសម្រាប់ប្រាក់កម្ចី ដល់អ្នកមានបំណងក្នុងការទិញលំនៅដ្ឋានធ្វើជាកម្មសិទ្ធិផ្ទាល់ខ្លួន និងដើម្បីធ្វើអោយទីផ្សារលំនៅដ្ឋាននៅក្នុងប្រទេសនេះមានសន្ទុះឡើងវិញ។
យោងតាមការចុះផ្សាយរបស់កាសែត Myanmar Times បានឲ្យដឹងថា ប្រជាពលរដ្ឋ ដែលមានបំណងទិញលំនៅដ្ឋានធ្វើជាកម្មសិទ្ធិ មិនមានលទ្ធភាពកាន់លុយក្នុងដៃទៅទិញនោះទេ ខណៈកំណើនអ្នកស្វែងរកទិញលំនៅឋានកាន់តែកើនឡើង ។ ដូច្នេះហើយបានជាធនាគារនៅក្នុងប្រទេសមួយនេះ បង្កភាពងាយស្រួលក្នុងការផ្តល់ប្រាក់កម្ចីក្នុងពេលវេលាសមស្របបំផុត ដោយបានផ្តល់ការបង់រំលោះ រយៈពេល១៥ សម្រាប់ការទិញលំនៅដ្ឋានផ្ទះល្វែង និង២៥ឆ្នាំសម្រាប់ការទិញខុនដូ តែត្រូវបង់៣០ភាគរយមុនទៅធនាគារ។ បន្ទាប់ពីបង់រួចចំនួនពីរទៅបួនសប្តាហ៍ អ្នកទិញទាំងនោះនឹងអាចរើទៅរស់នៅបានក្នុងផ្ទះនោះបាន។
លោក U Kaung Thu Vin ស្ថាបនិកគេហទំព័ត៌អចលនទ្រព្យ ក្នុងស្រុកមួយបានប្រាប់កាសែត Myanmar Times ថា ធនាគារមួយចំនួនទៀត ធ្វើជាតំណាងអ្នកទិញលំនៅឋាន ដោយរៀបចំឯកសារចំពាក់ព័ន្ធក្នុងការចំណាយផ្សេងៗ ដាក់ជូនទៅក្រុមហ៊ុនសាងសង់។
លោកបញ្ជាក់ថា “កាលពីមុនប្រសិនបើអ្នកណាម្នាក់ចង់ទិញលំនៅដ្ឋាននោះ ត្រូវបង្ហាញឯកសារពាក់ព័ន្ធផ្សេងៗ រួមជាមួយនឹងប្រាក់បៀវត្សរបស់ខ្លួន ទើបអាចទិញលំនៅដ្ឋានបានតែនៅពេលនេះមិនដូច្នោះទេ។លោកបន្តថា “អ្នកទិញលំនៅដ្ឋានគ្រាន់តែយកឯកសារបញ្ជាក់បៀវត្សរបស់ខ្លួន ទៅធនាគារដែលទទួលបានចាប់ពី២៥០ដុល្លារឡើង អ្នកនឹងទទួលបានលំនៅដ្ឋាដែលជាកម្មសិទ្ធិរបស់ខ្លួនភ្លាម។
លោកបញ្ជាក់ថា ធនាគារដើរតួយ៉ាងសំខាន់ ក្នុងការជម្រុញអោយវិស័យអចលនទ្រព្យ និងសេដ្ឋកិច្ចជាតិអោយដើរទៅមុខ ព្រោះថាប្រជាពលរដ្ឋកម្រមានលុយទាំងដុលទៅទិញលំនៅដ្ឋានណាស់ ហើយភាគច្រើនប្រជាពលរដ្ឋទិញលំនៅដ្ឋាន ដោយការបង់រំលោះទៅធនគារ៕
