ដោយ ដែន ចែងចាំង
ភ្នំពេញ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានអះអាងថា ការអភិវឌ្ឍទីផ្សារមូលបត្ររដ្ឋ ពិតជាមានសារៈសំខាន់ក្នុងការអភិវឌ្ឍទីផ្សារហិរញ្ញវត្ថុ ដើម្បីទ្រទ្រង់ដល់កំនើនសេដ្ឋកិច្ច និងជាឧបករណ៍វិនិយោគដែលមានហានិភ័យទាប សម្រាប់វិនិយោគិន។
អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុលោក រស់ សីលវ៉ា បានលើកឡើងក្នុង “សិក្ខាសាលាស្តីពីការអភិវឌ្ឍទីផ្សារមូលបត្ររដ្ឋនៅកម្ពុជា”កាលពីថ្ងៃទី២៦ ខែតុលា ឆ្នាំ២០១៨កន្លងមកថា ការអភិវឌ្ឍទីផ្សារមូលបត្ររដ្ឋនៅកម្ពុជា ត្រូវបានគិតគូរដោយរដ្ឋាភិបាលតាំងពីដើមឆ្នាំ២០០០ ដោយសម្រេចបាន “ច្បាប់ស្តីពីមូលបត្ររដ្ឋ” ក្នុងឆ្នាំ២០០៧ ប៉ុន្តែដោយសារតែស្ថានភាពសេដ្ឋកិច្ច លក្ខខណ្ឌហិរញ្ញប្បទាន និងកម្រិតនៃការអភិវឌ្ឍទីផ្សារហិរញ្ញវត្ថុមិនទាន់អំណោយផល ទើបរាជរដ្ឋាភិបាលកម្ពុជាមិនទាន់សម្រេចបោះផ្សាយលក់មូលបត្ររដ្ឋនៅឡើយ តែក្នុងរយៈពេលដ៏ខ្លីខាងមុខនេះ នៅពេលស្ថានភាពសេដ្ឋកិច្ចមានលក្ខណៈអំណោយផល រាជរដ្ឋាភិបាលនឹងសម្រេចបោះផ្សាយមូលបត្ររដ្ឋ ដើម្បីកៀរគរហិរញ្ញប្បទាន បំពេញឱនភាពថវិការដ្ឋ ដើម្បីគាំទ្រដល់ការអភិវឌ្ឍទីផ្សារហិរញ្ញវត្ថុ។
លោកបន្តថា តាមរយៈការបោះផ្សាយមូលបត្ររដ្ឋ ជារូបិយវត្ថុក្នុងស្រុក រាជរដ្ឋាភិបាល អាចកាត់បន្ថយការពឹងផ្អែកលើកម្ចីជារូបិយវត្ថុបរទេស និងកាត់បន្ថយការប្រឈមនឹងហានិភ័យនៃអត្រាប្តូរប្រាក់ ដែលជាឫសគល់នៃវិបត្តិហិរញ្ញវត្ថុជាច្រើន នៅក្នុងវិបត្តិសាស្ត្រដូចជា វិបត្តិហិរញ្ញវត្ថុនៅអាមេរិកឡាទីនកាលឆ្នាំ១៩៩៤ និងនៅអាស៊ី ឆ្នាំ១៩៩៧ ជាដើម ក្នុងនោះទីផ្សារមូលបត្ររដ្ឋ អាចផ្តល់ភាពបត់បែន និងឯករាជ្យភាពដល់ធនាគារកណ្តាល ក្នុងការអនុវត្តគោលនយោបាយរូបិយវត្ថុផងដែរ។
លោករស់ សីលវ៉ាបានបន្តថា ការអភិវឌ្ឍទីផ្សារមូលបត្ររដ្ឋ ពិតជាមានសារៈសំខាន់ ក្នុងការអភិវឌ្ឍទីផ្សារហិរញ្ញវត្ថុដើម្បីទ្រទ្រង់ដល់កំណើនសេដ្ឋកិច្ច។ មូលបត្ររដ្ឋ មិនត្រឹមតែជាមធ្យោបាយសម្រាប់រាជរដ្ឋាភិបាល ក្នុងការកៀរគរហិរញ្ញប្បទានជារូបិយវត្ថុក្នុងស្រុក ដើម្បីបំពេញឱនភាពថវិការដ្ឋប៉ុណ្ណោះទេ គឺជាឧបករណ៍វិនិយោគដែលមានហានិភ័យទាប សម្រាប់វិនិយោគិនផងដែរ៕
