ដោយនៅ វឌ្ឍនា
ភ្នំពេញ៖ សាធារណរដ្ឋរ៉ូម៉ានីបានជម្រុញលើកទឹកចិត្តឲ្យប្រទេសទាំងពីរ (កម្ពុជា-រ៉ូម៉ានី) ធ្វើការសហការ និងស្វែងរកយន្តការនិងមធ្យោបាយនានា ក្នុងការលើកកម្ពស់កិច្ចសហប្រតិបត្តិពាណិជ្ជកម្ម វិនិយោគ និងសេដ្ឋកិច្ច ដើម្បីបង្កើនទំហំពាណិជ្ជកម្ម និងពង្រឹងទំនាក់ទំនងរវាងប្រទេសទាំងពីរ។
នៅក្នុងកិច្ចប្រជុំពិភាក្សាការងាររវាងមន្ត្រីជាន់ខ្ពស់ក្រសួងពាណិជ្ជកម្មដោយផ្តោតលម្អិតទៅលើការជំរុញកិច្ចសហប្រតិបត្តិការពាណិជ្ជកម្ម វិនិយោគ និងសេដ្ឋកិច្ច រវាងព្រះរាជាណាចក្រកម្ពុជា និងសាធារណរដ្ឋរ៉ូម៉ានីនៅថ្ងៃទី២០ ខែកុម្ភៈម្សិលមិញនេះ លោក Valeriu Arteni ភារៈធារីនៃស្ថានទូតសាធារណរដ្ឋរ៉ូម៉ានី ប្រចាំនៅព្រះរាជាណាចក្រកម្ពុជា ដែលមាននិវេសនដ្ឋាននៅទីក្រុងហាណូយ ប្រទេសវៀតណាមបានកោតសសើរចំពោះការអភិវឌ្ឍ និងកំណើនសេដ្ឋកិច្ចជារាល់រៀងឆ្នាំរបស់កម្ពុជាដែលមានការរីកចម្រើនយ៉ាងលឿនក្នុងរយៈពេលប៉ុន្មានឆ្នាំកន្លងមកនេះ ។
លោក Valeriu Arteni ក៏បានលើកឡើងពីការរៀបចំពិធីពិព័រណ៍អន្ដរជាតិរបស់រ៉ូម៉ានី ទៅលើទំនិញប្រើប្រាស់ចាំបាច់ប្រចាំថ្ងៃ ជាពិសេសទំនិញកសិកម្ម នៅពេលវេលាឆាប់ៗនាពេលខាងមុខនេះ ដោយនឹងអញ្ជើញភាគីកម្ពុជា ទៅចូលរួមពិធីពិព័រណ៍នេះ ក្នុងគោលបំណងឲ្យវិស័យឯកជនកម្ពុជា អាចមានឱកាសក្នុងការដាក់តាំងបង្ហាញផលិតផលរបស់ ខ្លួន ហើយនឹងរៀបចំការផ្គូរផ្គងអាជីវកម្មរវាងប្រទេសទាំងពីរផងដែរ។
លោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម បានថ្លែងអំណរគុណដ៏ជ្រាលជ្រៅចំពោះលោក Valeriu ដែលបានខិតខំពង្រឹងកិច្ចសហប្រតិបត្តិការរវាងកម្ពុជា និងរូម៉ានី ហើយក៏បានស្នើសុំឲ្យភាគីរូម៉ានី ផ្ញើលិខិតអញ្ជើញមកភាគីកម្ពុជាឲ្យបានឆាប់រហ័ស ដើម្បីកម្ពុជាមានពេលវេលាគ្រប់គ្រាន់ សម្រាប់រៀបចំនិងអញ្ជើញវិស័យឯកជន ឲ្យចូលកម្មវិធីពិព័រណ៍ឲ្យបានទាន់ពេលវេលា។
ជាមួយគ្នានោះ លោកស្រី ក៏បានអញ្ជើញភាគីរូម៉ានីឲ្យចូលរួមកម្មវិធីពិព័រណ៍របស់កម្ពុជា ដែលគ្រោងនឹងប្រព្រឹត្តទៅនៅចុងឆ្នាំ២០១៩ខាងមុខនេះផងដែរ៕
