ដោយ គង់ សូរិយា
ភ្នំពេញ៖ ថ្នាក់ដឹកនាំជាន់ខ្ពស់នៃធនាគារអភិវឌ្ឍន៍អាស៊ី (ADB) បានថ្លែងថា ក្រោមការខិតខំប្រឹងប្រែងរបស់រាជរដ្ឋា ភិបាល កម្ពុជាសម្រេចបាន និងគ្រប់គ្រងសេដ្ឋកិច្ចដោយរក្សាបាននូវចីរភាពនៃកំណើនក្នុងរង្វង់ ៧ភាគរយ នៅក្នុងរយៈ ពេល២ទសវត្សរ៍កន្លងមកនេះ។
លោក ស៊ីវ៉ាជី ក្សត្រាបាទី នាយកប្រតិបត្តិនៃប្រទេសជាសមាជិកផ្សេងៗ របស់ ADB បានមានប្រសាសន៍ក្នុងជំនួបជាមួយលោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី២០ កុម្ភៈកន្លងមកថា នៅក្នុងក្របខណ្ឌយុទ្ធសាស្រ្តភាពជាដៃគូ សម្រាប់ការអភិវឌ្ឍន៍កម្ពុជាឆ្នាំ ២០១៩-២០២៣ ADB នឹងបន្តគាំទ្ររាជរដ្ឋាភិបាលកម្ពុជា លើកិច្ចអភិវឌ្ឍន៍ស្របតាមយុទ្ធសាស្រ្តចតុកោណដំណាក់កាលទី៤ និងផែនការយុទ្ធសាស្រ្តអភិវឌ្ឍន៍ជាតិ ឆ្នាំ ២០១៩-២០២៣ ជាពិសេសគឺការផ្តោតលើការវិនិយោគ ដើម្បីបង្កើនទិន្នផលកសិកម្ម ការតភ្ជាប់ជនបទទៅទីប្រជុំជន ការផ្គត់ផ្គង់អគ្គិសនីដោយប្រើប្រាស់ថាមពលកកើតឡើងវិញ ការរៀបចំផែនការអភិវឌ្ឍន៍ទីក្រុង ការអភិវឌ្ឍន៍វិស័យអប់រំកម្រិតទុតិយភូមិការបណ្តុះបណ្តាលវិជ្ជាជីវៈ នឹងការធ្វើវិមជ្ឃការសេវាសាធារណៈ។
លោកបន្តថា “ADB នឹងបន្តគាំទ្រវិស័យធនធានមនុស្ស ការអភិវឌ្ឍវិស័យថាមពលដើម្បីកំណើនសេដ្ឋកិច្ចខ្ពស់ ការបង្កើនចំណេះដឹងវិស័យឧស្សាហកម្ម និងការរៀបចំហិរញ្ញវត្ថុ សាធារណៈប្រកបដោយបរិយាប័ន្ន”។ លោកបន្តថា “ក្នុងការអភិវឌ្ឍសេដ្ឋកិច្ច កម្ពុជាបានធ្វើយ៉ាងប្រសើរ ជាពិសេសការគ្រប់អតិផរណាឲ្យនៅកម្រិតទាប ការគ្រប់ថវិការបានរឹងមាំល្អ និងការគ្រប់គ្រងបំណុលប្រកប ដោយចីរភាព ព្រមទាំងសម្រេចបានគោលដៅសហសវត្សរ៍ មុនពេលកំណត់ជាដើម”។
ជាមួយគ្នានេះ ADB នឹងបន្តគាំទ្រការវិនិយោគលើវិស័យកសិកម្ម ការតភ្ជាប់ជនបទទៅទីប្រជុំជន ការផ្គត់ផ្គង់អគ្គិសនីដោយប្រើប្រាស់ថាមពលកកើតឡើងវិញ ការរៀបចំផែនការអភិវឌ្ឍន៍ទីក្រុង ការអភិវឌ្ឍន៍វិស័យអប់រំកម្រិតទុតិយភូមិ ការបណ្តុះបណ្តាលវិជ្ជាជីវៈ នឹងការធ្វើវិមជ្ឃការសេវាសាធារណៈ។
លោកបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងអំណរគុណចំពោះ ADB ដែលបានជួយជ្រោមជ្រែងដល់កម្ពុជា ទាំងហិរញ្ញប្បទានសហប្រតិបត្តិការ ចំណេះដឹងនិងចំណេះធ្វើ សម្រាប់វិស័យអទិភាព ដូចជា ហេដ្ឋារចនាសម្ព័ន្ធជារូបវន្ត ផ្លូវថ្នល់ ធារាសាស្រ្ត អគ្គិសនី ទឹកស្អាត វិស័យអប់រំ និងវិស័យសុខាភិបាល រួមជាមួយការចូលរួមចំណែក ក្នុងការជម្រុញកំណើនសេដ្ឋកិច្ចកម្ពុជា និងការកាត់បន្ថយភាពក្រីក្រប្រកបដោយប្រសិទ្ធភាព ។
លោកឧបនាយករដ្ឋមន្ត្រី បានបង្ហាញនូវការរៀបចំក្របខណ្ឌយុទ្ធសាស្រ្តភាព ជាដៃគូសម្រាប់អភិវឌ្ឍន៍កម្ពុជាឆ្នាំ ២០១៩-២០២៣ ត្រូវមានភាគីកម្ពុជាជាម្ចាស់ក្នុងការដឹកនាំជាយុទ្ធសាស្រ្ត គឺធ្វើឲ្យឆ្លើយតបទៅនឹងតម្រូវការអភិវឌ្ឍន៍ជាក់ស្តែងរបស់កម្ពុជាដូចជា វិស័យអប់រំបណ្តុះបណ្តាលបច្ចេកទេស និងវិជ្ជាជីវៈ គោលដៅអភិវឌ្ឍន៍ប្រកបដោយនិរន្តភាពរបស់កម្ពុជា ការអភិវឌ្ឍន៍សហគ្រាសធុនតូចនិងមធ្យម ការកែទម្រង់ហិរញ្ញវត្ថុសាធារណៈ ការពង្រីកអភិបាលកិច្ចល្អ និងការអនុវត្តន៍សេដ្ឋកិច្ចឌីជីថលជាដើម៕
