ដោយ: គង់ លាងហួរ
អន្តរជាតិ: ក្រុមហ៊ុនប្រឹក្សាអចលនទ្រព្យ JLL រំពឹងថា សក្ដានុពលទីផ្សារអចលនទ្រព្យឧស្សាហកម្មនៅក្នុងរដ្ឋធានីហ្សាការតារបស់ប្រទេសឥណ្ឌូនេសុីនឹងផ្លាស់ប្តូរ ស្របពេលមានការបណ្តាក់ទុនរួមគ្នា ការទិញយកដី និងយុទ្ធសាស្រ្តអភិវឌ្ឍន៍ចម្រុះ។
ក្នុងនោះ ក្រុមហ៊ុនប្រឹក្សាអចលនទ្រព្យ JLL បានព្យាករណ៍ថា តំបន់ភាគខាងកើតរដ្ឋធានីហ្សាការតានឹងមានកំណើនតម្រូវការអចលនទ្រព្យឧស្សាហកម្ម ជាពិសេសពី វិស័យផលិតកម្ម និងរថយន្តអគ្គិសនី (EV) រហូតដល់ដំណាច់ឆ្នាំ២០២៥។
ការផ្គត់ផ្គង់អចលនទ្រព្យឧស្សាហកម្មថ្មីនៅរដ្ឋធានីនេះត្រូវបានគេព្យាករណ៍ថា នឹងកើនឡើងដល់ចំនួន០,៨លានម៉ែត្រការ៉េនៅឆ្នាំ២០២៧ខាងមុខ។ឥណ្ឌូនេសុីមានគោលបំណងទាក់ទាញលំហូរវិនិយោគផ្ទាល់ពីបរទេស (FDI) កាន់តែច្រើនចូលក្នុងវិស័យផលិតកម្ម។
យោងតាមរបាយការណ៍របស់ក្រុមហ៊ុនប្រឹក្សាអចលនទ្រព្យ JLL បានបញ្ជាក់ឱ្យដឹងបន្ថែមថា សួនឧស្សាហកម្មនឹងត្រូវបានកែលម្អឱ្យប្រសើរឡើងក្នុងគោលបំណងដើម្បីបំពេញតម្រូវការថ្មី។
ក្រុមហ៊ុនចិននានាបានស្វែងរកទីតាំងផលិតកម្ម ជាពិសេសការជួលរោងចក្រ ហើយឃ្លាំងទំនើបមួយចំនួនបានបំពេញតម្រូវការនេះប្រកបដោយជោគជ័យដោយផ្តល់នូវការកែតម្រូវ និងការកែប្រែចាំបាច់ដើម្បីបំពេញតាមតម្រូវការរបស់ក្រុមហ៊ុនទាំងនេះ។
តំបន់ភាគខាងកើតនៃទីក្រុងហ្សាការតាបានក្លាយជាមជ្ឈមណ្ឌលផលិតកម្មរថយន្ត EV ដែលជំរុញឱ្យមានកំណើនតម្រូវការឃ្លាំង។ ការប្រកួតប្រជែងលើទីផ្សារមានសភាពកាន់តែខ្លាំងឡើងក្នុងចំណោមម្ចាស់ឃ្លាំង ឬម្ចាស់រោងចក្រមួយចំនួន៕
