ដោយៈ គង់ សូរិយា
ព្រះសីហនុៈ អនុគណៈកម្មាធិការវិនិយោគខេត្តព្រះសីហនុ ដឹកនាំដោយលោកឡុង ឌីម៉ង់ អភិបាលរងខេត្ត បានចុះពិនិត្យទីតាំងស្នើសុំបង្កើតរោងចក្រកែច្នៃឈើដាំ នៅស្រុកព្រៃនប់។
លោក ឡុង ឌីម៉ង់ អភិបាលរងខេត្តព្រះសីហនុ និងជាអនុប្រធានអនុគណៈកម្មាធិការវិនិយោគខេត្ត បានអញ្ជើញដឹកនាំ តំណាងមន្ទីរ អង្គភាព និងមន្ត្រីបច្ចេកទេសចុះពិនិត្យទីតាំងស្នើសុំ បង្កើតរោងចក្រកែច្នៃឈើដាំ (ពីដើមអាកាស្យា និងដើមប្រេងខ្យល់)ខាងលើកាលពីចុងសប្តាហ៍មុន។
រោងចក្រនេះ មានទីតាំងស្ថិតនៅភូមិសាមគ្គី ស្រុកព្រៃនប់ ខេត្តព្រះសីហនុ។
គម្រោងរោងចក្រកែច្នៃឈើដាំ (ពីដើមអាកាស្យា និងដើមប្រេងខ្យល់)មានទុនវិនិយោគសរុបប្រមាណ៤,៦៩លានដុល្លារអាមេរិក។
លោកអភិបាលរង បានធ្វើការណែនាំដល់អ្នកវិនិយោគឱ្យសហការជាមួយអាជ្ញាធរពាក់ព័ន្ធ ដើម្បីបំពេញលក្ខខណ្ឌនានា ដែលច្បាប់បានកំណត់ និងបានពិនិត្យលទ្ធភាព ជួយសម្របសម្រួលនីតិវិធីមួយចំនួន ដែលស្ថិតនៅក្នុងដែនសមត្ថកិច្ច របស់អនុគណៈកម្មាធិការវិនិយោគខេត្ត ដើម្បីកាត់បន្ថយរយៈពេលរង់ចាំ ច្បាប់អនុញ្ញាតរបស់ក្រុមហ៊ុន។
ជាមួយគ្នានេះ លោកឡុង ឌីម៉ង់ក៏បានស្នើដល់វិនិយោគិនត្រូវអនុវត្តន៍ តាមការណែនាំរបស់មន្ទីរអង្គភាពជំនាញ និងគោរពច្បាប់ គត្តិយុត្តនានារបស់កម្ពុជា និងត្រូវធ្វើយ៉ាងណាផ្តល់អាទិភាពការងារ ដល់ប្រជាពលរដ្ឋមូលដ្ឋាន និងជាពិសេសពលករ ដែលត្រឡប់មកពីប្រទេសថៃវិញ៕
