ដោយៈ គង់ សូរិយា
ភ្នំពេញៈ អ្នកធុរកិច្ចចិននៅតែឈរចំណាត់ថ្នាក់ទី១ ដែលបានដាក់ទុនវិនិយោគនៅកម្ពុជា ដោយក្នុងរយៈពេលប៉ុន្មានឆ្នាំចុងក្រោយនេះ ចិនបានក្លាយជាប្រទេសដែលមានវិនិយោគិន ដាក់ទុនវិនិយោគនៅកម្ពុជាច្រើនជាងគេនៅកម្ពុជា។
ជាក់ស្ដែងក្នុងរយៈពេលប្រមាណតែ២ឆ្នាំកន្លះប៉ុណ្ណោះ ចិនបានបោះទុនវិនិយោគ លើគម្រោងនានារហូតដល់ជិត១០ពាន់លានដុល្លារអាម៉េរិក។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា បានបង្ហាញឱ្យដឹងថា ចាប់តាំងពីឆ្នាំ២០២៣ រហូតដល់ដំណាច់ខែមិថុនា ឆ្នាំ២០២៥នេះ វិនិយោគិនចិនបានដាក់ទុនវិនិយោគច្រើនជាងគេ ក្នុងចំណោមវិនិយោគិន ដែលកំពុងវិនិយោគនៅកម្ពុជា ដោយរយៈពេល២ឆ្នាំកន្លះមកនេះ ចិនបានវិនិយោគគិតជាទឹកប្រាក់ប្រមាណ៩,៩២ពាន់លានដុល្លារអាម៉េរិក។
របាយការណ៍ដដែលបានបង្ហាញថា ក្នុងឆ្នាំ២០២៣ កម្ពុជាទទួលទុនវិនិយោគសរុបប្រមាណ៤,៩២ពាន់លានដុល្លារអាមេរិក ក្នុងនោះចិនបានដាក់ទុនវិនិយោគ ប្រមាណ៣,២៥ពាន់លានដុល្លារអាម៉េរិក ឬស្មើនឹង៦៦ភាគរយនៃទុនវិនិយោគសរុប។ ក្នុងឆ្នាំ២០២៤ កម្ពុជាទទួលបានទុនវិនិយោគចុះបញ្ជីសរុប ចំនួន៦,៨៧ពាន់លានដុល្លារអាម៉េរិក ក្នុងនោះ ប្រភពទុនពីប្រទេសចិន មានរហូតដល់៣,៤២ពាន់លានដុល្លារអាម៉េរិក ឬស្មើនឹងពាក់កណ្ដាលនៃទុនវិនិយោគសរុប។
ដោយឡែកក្នុងរយៈពេល៦ខែ ដើមឆ្នាំ២០២៥នេះ តាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ក៏បានបង្ហាញឱ្យឃើញថា កម្ពុជាទទួលទុនវិនិយោគចុះបញ្ជីចំនួន ជិត៥,៨ពាន់លានដុល្លារអាម៉េរិកក្នុងប្រភពទុនវិនិយោគមកពីប្រទេសចិន មានរហូតដល់៣,២៤ពាន់លានដុល្លារអាម៉េរិក ឬស្មើនឹង៥៦ភាគរយ នៃទុនវិនិយោគចុះបញ្ជីសរុបក្នុងរយៈពេល៦ខែកន្លងមកនេះ ។
ក្នុងជំនួបពិភាក្សាការងារជាមួយគណៈប្រតិភូក្រុមហ៊ុន Xingtai Shunhe Biotechnology មកពីខេត្តហឺប៉ី ប្រទេសចិនកាលពីថ្ងៃទី ២៣ ខែកក្កដា ឆ្នាំ២០២៥កន្លងទៅនេះ លោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានជម្រាបជូនពីស្ថានភាពដ៏ល្អប្រសើរ នៃវិនិយោគនៅកម្ពុជា ជាពិសេសរំហូរវិនិយោគចិនមកកម្ពុជា មានការកើនទ្បើងគួរជាទីកត់សម្គាល់ដោយប្រភពទុនវិនិយោគមកពីប្រទេសចិន បានឈរនៅលំដាប់លេខរៀងទីមួយ ឬទី២ជាបន្តបន្ទាប់ក្នុងរយៈពេលជាង១ ទសវត្សរ៍ចុងក្រោយនេះ ។
លោកស្រី លី ជៀ( Li Jie ) ប្រធានក្រុមហ៊ុន Xingtai Shunhe Biotechnology បានបង្ហាញពីបំណងរបស់ក្រុមហ៊ុនក្នុងវិនិយោគក្នុងប្រទេសកម្ពុជា នៅក្នុងវិស័យថាមពលស្អាត និងថាមពលកកើតឡើងវិញ ជាពិសេសសំដៅលើកកម្ពស់សុវត្ថិភាព ថាមពលក្នុងព្រះរាជាណាចក្រកម្ពុជា និងធានាកាត់បន្ថយផលប៉ះពាល់បរិស្ថាន។
បំណងនៃការវិនិយោគរបស់ក្រុមហ៊ុនចិននេះ បានបង្ហាញពីសញ្ញាវិជ្ជមានថ្មីមួយទៀត នៃប្រភពទុនវិនិយោគមកពីប្រទេសចិន ដែលនឹងធ្វើឱ្យប្រភពទុនវិនិយោគ ពីប្រទេសមួយនេះ នៅកម្ពុជាកាន់តែមានកំណើនខ្ពស់ឡើងជាបន្តបន្ទាប់៕
