ដោយៈ ម៉ាណា
ភ្នំពេញៈ អនុរដ្ឋលេខាធិការក្រសួងពាណិជ្ជកម្ម លោកអ៊ុំ កុសល បានអញ្ជើញជាអធិបតីដឹកនាំវេទិកាថ្នាក់ជាតិស្តីពី ការពង្រឹងភាពជាដៃគូរវាងស្ថាប័នសាធារណៈ វិស័យឯកជន និងក្រុមអ្នកផលិត។
វេទិកានេះធ្វើឡើងក្រោមប្រធានបទ៖ ការអភិវឌ្ឍទីផ្សារខ្សែច្រវាក់តម្លៃបន្លែសុវត្ថិភាព និងគ្រឿងទេស ក្រោមគម្រោងជំរុញទីផ្សារសម្រាប់កសិកម្មខ្នាតតូច(AIMS)។
វេទិកានេះ មានការអញ្ជើញចូលរួមពី លោកអេង សុធីវ័ន្ត អគ្គនាយកពាណិជ្ជកម្មក្នុងប្រទេស និងជានាយកគម្រោងជំរុញទីផ្សារសម្រាប់កសិកម្មខ្នាតតូច (AIMS) តំណាងមូលនិធិអន្តរជាតិសម្រាប់ការអភិវឌ្ឍកសិកម្ម (IFAD) និងមន្រ្តីពាក់ព័ន្ឋ។
វេទិការរៀបចំឡើងក្នុងគោលបំណងជាច្រើនដូចជា ១.ការកំណត់អត្តសញ្ញាណ នៃបញ្ហាសំខាន់ៗក្នុងផលិតកសិកម្ម និងការទទួលបានទីផ្សារ ទី២.កំណត់តួអង្គសំខាន់ៗ និងពង្រឹងទំនាក់ទំនងជាមួយភាគីពាក់ព័ន្ធក្នុងខ្សែច្រវាក់តម្លៃ ទី៣.ពង្រឹងកិច្ចសហប្រតិបត្តិការរវាងស្ថាប័នសាធារណៈ ក្រុមហ៊ុនឯកជន និងក្រុមអ្នកផលិត ដើម្បីគាំទ្រការអភិវឌ្ឍកសិ-ពាណិជ្ជកម្មប្រកបដោយនិរន្តរភាព។
ទី៤.លើកកម្ពស់និងពង្រឹងបណ្ដាញអាជីវកម្ម ពាណិជ្ជកម្ម និងអភិវឌ្ឍន៍សេវាកម្មទីផ្សារ អាជីវកម្មរបស់វិស័យឯកជនក្នុងស្រុក និង ទី៥.កំណត់សកម្មភាពជាយុទ្ធសាស្ត្រ សម្រាប់ជំហានបន្ទាប់ ការវិនិយោគ និងអភិវឌ្ឍន៏កសិកម្ម ប្រកបដោយបរិយាបន្ន និងផ្អែកលើតម្រូវការទីផ្សារជាក់លាក់៕
