ដោយៈ គង់ សូរិយា
ភ្នំពេញៈ រដ្ឋមន្រ្តីក្រសួងទេសចរណ៍បានចុះកិច្ចព្រមព្រៀងជាមួយ ក្រុមហ៊ុនគេហទំព័រvisiting Cambodia ដើម្បីផ្សព្វផ្សាយ និងលើកកំពស់សក្តានុពលទេសចរណ៍នៅកម្ពុជា។
វេបសាយ Visitcambodia និងកម្មវិធី Visit Cambodia App នឹងក្លាយជាចលករ ក្នុងការទាក់ទាញភៀវទេសចរអន្តរជាតិពីគ្រប់ទិសទី។
លោកហួត ហាក់ រដ្ឋមន្ត្រីក្រសួងទេសចរណ៍ និង លោកជំទាវ មាស សុភារ័ត្ន ប្រធានក្រុមហ៊ុនប្រាវីនយ៉ា (PRAVINYA) បានអញ្ជើញជាអធិបតី ក្នុងពិធីចុះកិច្ចព្រមព្រៀងស្ដីពីការអភិវឌ្ឍ ការថែរទាំ និងការធ្វើប្រតិបត្តិការលើវេបសាយ Visitcambodia និងកម្មវិធី Visit Cambodia App កាលពីចុងសប្តាហ៍មុន។
កិច្ចព្រមព្រៀងនេះមានគោលបំណង បង្កើតកិច្ចសហការក្នុងការអភិវឌ្ឍកម្មវិធី និងថ្នាលឌីជីថល ដែលជួយទាក់ទាញភ្ញៀវទេសចរអន្តរជាតិ តាមរយៈការបង្កើនភាពងាយស្រួលដល់អ្នកប្រើប្រាស់ ក្នុងការកក់សណ្ឋាគារ, ភោជនីយដ្ឋាន, ហាងលក់ទំនិញ, តាក់ស៊ី, ស្វែងរកទីតាំងតំបន់ទេសចរណ៍ក្នុងប្រទេសកម្ពុជា, រៀបចំផែនការទស្សនកិច្ច និង ការទូទាត់ថវិកាតាមប្រព័ន្ធអេឡិចត្រូនិកជាដើម។
ជាមួយគ្នានេះ ថ្នាលឌីជីថលនេះ នឹងជួយជំរុញទេសចរណ៍ឌីជីថល ជួយដល់ការផ្សព្វផ្សាយ និងលើកតម្ដើងកិត្តិនាមកម្ពុជានៅលើពិភពលោក ក៏ដូចជាផ្ដល់នូវកាលានុវត្តភាព សម្រាប់ប្រតិបត្តិករទេសចរណ៍ អាចចូលទៅកាន់ទីផ្សារពិភពលោក ឱ្យកាន់តែមានភាពងាយស្រួល៕
