ដោយវុត្ថា
ភ្នំពេញ៖ បដិវត្តន៍ឧស្សាហកម្មទី៤ បានលេចឡើងជាប្រធានបទសំខាន់មួយ ដែលបាន និងកំពុងទទួលការចាប់អារម្មណ៍យ៉ាងខ្លាំងពីសំណាក់មេដឹកនាំពិភពលោក អ្នកសិក្សា អ្នកអនុវត្ត អ្នកជំនាញ អ្នកបង្កើតគោលនយោបាយ និងសាធារណៈជនទូទៅ ហើយត្រូវបានរំពឹងទុកថា ឥទ្ធិពលរបស់វានឹងលាតសន្ធឺងលើស្ទើរតែគ្រប់ជ្រុង និងគ្រប់ទិដ្ឋភាពនៃជីវិតរបស់មនុស្ស។
ទោះបីជាមានកាលានុវត្តភាព និងភាពរំជើបរំជួលជាច្រើនពីបចេ្ចកវិទ្យាថ្មីៗ និងទំនើបៗក្នុងបដិវត្តន៍ឧស្សាហកម្មនេះក៏ដោយ អនាគតនៃបដិវត្តន៍ឧស្សាហកម្មទី៤ នៅតែមានភាពស្រពេចស្រពិលនៅឡើយ។ មែនទែនទៅ បដិវត្តន៍ឧស្សាហកម្ម មិនមែនជាអ្វីដែលថ្មីទាំងស្រុងទេ ប៉ុន្តែមនុស្សភាគច្រើននៅតែមិនស្គាល់ច្បាស់ថា តើជំនាន់ទី៤នៃបដិវត្តន៍ឧស្សាហកម្ម គឺជាអ្វីឲ្យប្រាកដ។
កម្ពុជាកំពុងសិ្ថតក្នុងចរន្តដ៏សំខាន់មួយរបស់ពិភពលោក គឺបដិវត្តន៍ឧស្សាហកម្មដែលមានការផ្លាស់ប្តូរយ៉ាងខ្លាំងលើការធ្វើការងារ ការធ្វើអាជីវកម្ម ដំណើរការឧស្សាហកម្ម និងពាណិជ្ជកម្មជាដើម។ នៅក្នុងដំណាក់កាលនេះ វាទាមទារឱ្យមានការយកចិត្តទុកដាក់ឱ្យបានខ្លាំងក្លាដើម្បីដោះស្រាយបញ្ហាប្រឈមមួយចំនួនដែលជាឧបសគ្គរាំងស្ទះដល់ដំណើរនៃការអភិវឌ្ឍ និងការប្រកួតប្រជែងនៅក្នុងតំបន់។
កម្ពុជាត្រូវការជាចាំបាច់នូវធនធានមនុស្សដែលអាចមានសមត្ថភាពគ្រប់គ្រាន់ដើម្បីគ្រប់គ្រងការងារជាមួយបច្ចេកវិទ្យាថ្មី និងមានភាពច្នៃប្រឌិតខ្ពស់ដែលអាចធ្វើការងារខុសប្លែកពីការងារដែលម៉ាស៊ីនអាចធ្វើបាន។ ជំនាញដែលគេត្រូវការសម្រាប់បដិវត្តន៍ឧស្សាហកម្មថ្មីនេះគឺជំនាញដោះស្រាយបញ្ហា ជំនាញក្នុងការគិតឱ្យបានស៊ីជម្រៅ ជំនាញច្នៃប្រឌិត ជំនាញគ្រប់គ្រង និងសម្រប-សម្រួលជាមួយមនុស្ស ជំនាញសម្រាប់ទំនាក់ទំនង ជំនាញក្នុងការចរចា ជំនាញក្នុងការសម្របសម្រួលសេវាកម្ម និងជំនាញក្នុងការគ្រប់គ្រងបច្ចេកវិទ្យាជាដើម៕
ដើម្បីដើរឱ្យដល់គោលដៅសំខាន់ៗទាំងអស់នោះ ស្ថាប័នអប់រំទាំងរដ្ឋ និងឯកជនចាំបាច់ត្រូវតែធ្វើការផ្លាស់ប្តូរប្រព័ន្ធអប់រំឱ្យស្របនឹងប្រព័ន្ធអប់រំ ៤.0។ ការងារនេះទាមទារឱ្យមានការខិតខំបង្កើតកម្មវិធីសិក្សាថ្មី ដោយផ្លាស់ប្តូរកម្មវិធីសិក្សាដែលហួសកាលបរិច្ឆេទ ប្រើប្រាស់លែងកើត ឱ្យក្លាយជាការបណ្តុះបណ្តាលបែបទំនើបដោយរាប់បញ្ចូលទាំងបច្ចេកវិទ្យា និងជំនាញសម្រាប់សតវត្សរ៍ទី២១ សម្រាប់ឱ្យនិស្សិតទាំងអស់បានសិក្សាដើម្បីប្រកួតប្រជែងជាមួយបណ្តាប្រទេសនានានៅកម្ពុជា ព្រោះថា បន្តិចទៀតនេះរោងចក្រ ក៏ជារោងចក្រឆ្លាតវៃដែរ ការងារមួយចំនួននឹងត្រូវជំនួសដោយម៉ាស៊ីន ហេតុនេះទាល់តែប្រជាជនយើងចេះគ្រប់គ្រងម៉ាស៊ីនទាំងអស់នោះ ទើបអាចចាប់យកឱកាសការងារបាន។ ក្រៅពីនេះវិស័យជាច្រើនផ្សេងទៀតក៏មានការផ្លាស់ប្តូរផងដែរ ចាំបាច់ទាមទារឱ្យមានធនធានមនុស្សដែលមានសមត្ថភាពឆ្លើយតបជាមួយទីផ្សារអនាគត មិនមែនសិក្សាកម្មវិធីចាស់ៗនោះទេ៕
