ដោយវុត្ថា
ភ្នំពេញៈ ការអនុញ្ញាតអោយបង់ពន្ធប្រថាប់ត្រាតែមួយដង ចំពោះការផ្ទេរលើកចុងក្រោយនៃអចលនវត្ថុ ដែលមិនទាន់បានចុះបញ្ជី គឺជាគោលនយោបាយអនុគ្រោះដល់អ្នកទទួលសិទ្ធិចុងក្រោយលើអចលនវត្ថុ ដែលត្រូវបានផ្ទេរច្រើនដំណរប៉ុន្តែពុំបានបង់ពន្ធប្រថាប់ត្រាចំពោះដំណាក់កាលផ្ទេរនីមួយៗនោះទេ។
គោលនយោបាយនេះ ត្រូវបានដាក់ចេញដោយរាជរដ្ឋាភិបាល តាមរយៈលិខិតលេខ ១៣៤ សជណ ចុះថ្ងៃទី ០២ ខែកុម្ភៈ ឆ្នាំ២០១៦ ដោយពិនិត្យឃើញការលំបាក និងហានិភ័យខ្ពស់ចំពោះអ្នកទទួលសិទ្ធិចុងក្រោយ លើអចលនវត្ថុដែលមិនទាន់បានចុះបញ្ជី ដោយហេតុថា ពួកគេត្រូវរ៉ាប់រងបំណុលពន្ធប្រថាប់ត្រាច្រើនដង ព្រមទាំងពិន័យស្មើប្រាក់ពន្ធដែលត្រូវបង់។
ខ្លឹមសារនៃសជណនេះមានដូចខាងក្រោម ៖
– អចលនវត្ថុដែលមិនទាន់បានចុះបញ្ជី ហើយមានសាវតាផ្ទេរសិទ្ធិកាន់កាប់ច្រើនដង មុនថ្ងៃទី១ ខែមករា ឆ្នាំ២០១៧ ត្រូវអនុគ្រោះអោយបង់ពន្ធប្រថាប់ត្រាតែមួយលើកចុងក្រោយ។ ព្រមទាំងអនុញ្ញាតឲ្យដកចេញនូវមូលដ្ឋានគិតពន្ធចំនួន ៦០០,០០០,០០០ រៀល សម្រាប់តែអចលនវត្ថុដែលបានស្នើសុំចុះបញ្ជីដំបូងនៅរដ្ឋបាលសុរិយោដី។
– អចលនវត្ថុដែលមិនទាន់បានចុះបញ្ជី ហើយដែលមានសាវតាផ្ទេរការកាន់កាប់ច្រើនលើកមុនថ្ងៃទី១ ខែ មករា ឆ្នាំ២០១៧ ត្រូវបានអនុញ្ញាតអោយបង់ពន្ធប្រថាប់ត្រាតែមួយលើកចុងក្រោយ។
ឧទាហរណ៍ ៖ អចលនវត្ថុមិនទាន់បានចុះបញ្ជីមួយកន្លែង មានតម្លៃ៣០ម៉ឺនដុល្លារ ធ្លាប់បានផ្ទេរសិទ្ធិកាន់កាប់៣លើក ដោយមិនបានបង់ពន្ធប្រថាប់ត្រា។ នៅថ្ងៃទី១៩ ខែកុម្ភៈ ឆ្នាំ២០១៩ អ្នកកាន់កាប់អចលនវត្ថុចុងក្រោយ បានដាក់ពាក្យសុំចុះបញ្ជីដំបូងនៅរដ្ឋបាលសុរិយោដី។ ហេតុនេះអ្នកដាក់ពាក្យសុំត្រូវបង់ពន្ធដូចខាងក្រោម។
(៣០០,០០០ដុល្លា x ៤០០០រៀល) – ៦០០,០០០,០០០រៀល X 0.04 = ២៤,០០០,០០០ រៀល៕
