ដោយវុត្ថា
ភ្នំពេញ ៖ សម្តេជោ ហ៊ុន សែន នាយករដ្ឋមន្ត្រីនៃកម្ពុជាបានផ្តល់នូវសម្ភារៈ បរិក្ខារវេជ្ជសាស្ត្រ ចំនួន១កុងទែន័រ សរុបទឹកប្រាក់ប្រមាណ១លានដុល្លារសហរដ្ឋអាមេរិកក្រោម គម្រោង Project Commission on Urgent Relief and Equipment ដើម្បីជូនក្រសួងសុខាភិបាល ប្រើប្រាស់ក្នុងការការពារ ទប់ស្កាត់ និងឆ្លើយតបការរាតត្បាតជំងឺកូវីដ-១៩។
ពិធីប្រគល់-ទទួល បានធ្វើឡើងនាទីស្តីការក្រសួងសុខាភិបាល នៅព្រឹកថ្ងៃទី១៥ មេសា ២០២០នេះ ក្រោមវត្តមាន លោក ម៉ម ប៊ុនហេង រដ្ឋមន្ត្រីក្រសួងសុខាភិបាល រួមជាមួយលោក សេង ទៀង ជំនួយការផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងតំណាងរបស់ក្រុមហ៊ុន MJ Health Care Co.Ltd។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានស្វាគមន៍យ៉ាងកក់ក្តៅ និងថ្លែងអំណរគុណយ៉ាងជ្រាលជ្រៅចំពោះជំនួយមនុស្សធម៌ដ៏ថ្លៃថ្លារបស់គម្រោង Project Commission on Urgent Relief and Equipment និងMJ Health Care Co.Ltd ដែលសបញ្ជាក់នូវវប្បធម៌ នៃការចែករំលែកជាមួយរាជរដ្ឋាភិបាលកម្ពុជា ដើម្បីជំរុញវិធានការការពារ ទប់ស្កាត់ និងឆ្លើយតបការរាតត្បាត នៃកូវីដ១៩ ឲ្យបានកាន់តែឆាប់រហ័ស៕
