ដោយ ហ្សូលី
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានដឹកនាំគណៈប្រតិភូជាន់ខ្ពស់នៃរាជរដ្ឋាភិបាល កម្ពុជាចុះត្រួតពិនិត្យការដ្ឋានសាងសង់ព្រលានយន្តហោះអន្តរជាតិភ្នំពេញថ្មី ស្ថិតនៅឃុំ ព្រែកស្លែង ស្រុក កណ្តាលស្ទឹង ខេត្តកណ្តាល នាព្រឹកថ្ងៃទី ២២ ខែមិថុនា ឆ្នាំ ២០២០នេះ។
គណៈអភិបាលខេត្តកណ្តាលបានរៀបចំផែនការការពារសន្តិសុខសុវត្ថិភាពជូនសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា អំឡុងពេលដែលសម្តេចចុះត្រួតពិនិត្យការដ្ឋានសាងសង់ព្រលានយន្តហោះ អន្តរជាតិភ្នំពេញថ្មី។
ព្រលានយន្តហោះថ្មីនេះត្រូវបានរចនាឡើងលំដាប់ថ្នាក់ 4F ជាអាកាសយានដ្ឋានធំបំផុតលំដាប់ទី៩ នៅក្នុង ពិភពលោកដែលស្ថិតនៅលំដាប់ពីក្រោយអាកាសយានដ្ឋាន Chicago O’Hare និងលំដាប់មុខ អាកាសយានដ្ឋានអន្តរជាតិទីក្រុងប៉េកាំងរបស់ប្រទេសចិន។ នៅពេលសាងសង់ចប់អាកាសយានដ្ឋានថ្មីនេះនឹង សមត្ថភាពទទួលយន្តហោះដឹកជញ្ជូនធុនធ្ងន់ផ្លូវឆ្ងាយ។
លោក គង់ សោភ័ណ្ឌ អភិបាលខេត្តកណ្តាលធ្លាប់បានមានប្រសាសន៍កាលពីពេលកន្លងទៅនេះថា វាជាភព្វ សំណាងរបស់ខេត្តកណ្តាលដែលប្រមុខនៃរាជរដ្ឋាភិបាលបានជ្រើសរើសសម្រាប់អភិវឌ្ឍន៍ទៅជាព្រលានយន្តហោះខ្នាតអន្តរជាតិ ដែលធ្វើឱ្យខេត្តកណ្តាលនេះកាន់តែទាក់ទាញវិនិយោគិនជាតិ និងអន្តរជាតិឱ្យចូលមក បណ្តាក់ទុនវិនិយោគនៅក្នុងខេត្តកាន់តែច្រើនក្នុងនាមជាគម្រោងវិនិយោគដ៏ធំលំដាប់ទី១របស់ខេត្តកណ្តាល ផងដែរ ។
លោកបានបញ្ជាក់ថា គម្រោងព្រលានយន្តហោះថ្មីបានសាងសង់លើផ្ទៃដីទំហំ២៦០០ហិកតា ដែលស្ថិតនៅព្រំប្រទល់រវាងខេត្តកណ្តាល និងខេត្តតាកែវ។ ទំហំដីនៅខេត្តកណ្ដាល ២២២៧ ក្បាលដី = ២៤៤១ ហិកតា និង ខេត្តតាកែវ ៣៦០ ក្បាលដី = ១៥៨ ហិកតា ជាមួយនឹងទុនវិនិយោគ១៥០០លានដុល្លារ របស់ក្រុមហ៊ុនសាជីវកម្ម វិនិយោគក្រៅប្រទេសកម្ពុជា (OCIC) ដោយដំណាក់កាលទីមួយនឹងត្រូវបញ្ចប់ការសាងសង់ក្នុងឆ្នាំ២០២៣ ៕
