ដោយ ៖ រ៉ាណេត
ភ្នំពេញៈ ភ្ជាប់ជាមួយនឹងសកម្មភាពទិញ–លក់ និងអភិវឌ្ឍន៍ក្នុងវិស័យសំណង់នៅតាមតំបន់ជាយក្រុង បច្ចុប្បន្ននេះមានបណ្តាអ្នកវិនិយោគ និងអភិវឌ្ឍន៍ជាច្រើន បានសម្លឹងមើលតំបន់ផ្សេងៗមួយចំនួនទៀតដែលមានសក្តានុពលស្ថិតនៅក្នុងខេត្តចំនួន៣ផ្សេងគ្នាជុំវិញរាជធានីភ្នំពេញសម្រាប់ធ្វើការអភិវឌ្ឍនិងលក់បន្តយកចំណេញនៅឆ្នាំបន្ទាប់។
អគ្គនាយកក្រុមហ៊ុនភ្នាក់ងារអចលនទ្រព្យ Century21 Fortuna Investment លោក វ៉ា វីរៈ បានមានប្រសាសន៍ប្រាប់តាមទូរស័ព្ទ នារសៀលថ្ងៃទី២៧ ខែកក្កដា ឆ្នាំ២០២០នេះថា គិតត្រឹមដើមឆមាសទី២ នៃឆ្នាំ២០២០នេះ តាមការកត់សម្គាល់ឃើញថា បើទោះជាស្ថានភាពនៃជំងឺរាតត្បាត នៅក្នុងប្រទេសកម្ពុជាមានភាពស្ងប់ស្ងាត់មែន ប៉ុន្តែសកម្មភាពទិញ–លក់អចលនទ្រព្យជាពិសេសវិស័យដីធ្លីគឺឃើញមាននៅតាមតំបន់និងខេត្តមួយចំនួនតែប៉ុណ្ណោះ។
លោកបញ្ជាក់ថា “ក្រៅពីខេត្តកំពត កែប ដែលកំពុងមានទីផ្សារលើការទិញដីទុកធ្វើការអភិវឌ្ឍន៍ស្ថិតនៅក្នុងវិស័យទេសចរណ៍ បណ្តាខេត្តដែលមានប្រជាប្រិយភាពបន្ទាប់រួមមានចំនួន៣ នៅជុំវិញរាជធានីភ្នំពេញ ដែលស្ថិតនៅក្បែរតំបន់អភិវឌ្ឍន៍ធំៗ ស្ថិតក្នុងខេត្តកណ្តាល ខេត្តកំពង់ស្ពឺ និងខេត្តតាកែវ”។
លោកបានបន្តថា ដីដែលអ្នកវិនិយោគ ក៏ដូចជាអ្នកអភិវឌ្ឍន៍ទិញទុកនៅពេលបច្ចុ ប្បន្ននេះភាគច្រើនគឺសុទ្ធតែស្ថិតនៅតំបន់ដែលកំពុងមានការអភិវឌ្ឍនិងក្នុងតំបន់ដែលគ្រោងអភិវឌ្ឍក្នុងពេលឆាប់ខាងមុខនេះដូចជាតំបន់ជាប់ផ្លូវក្រវ៉ាត់ក្រុងទី៣ស្ថិតក្នុងភូមិសាស្ត្រនៃខេត្តចំនួន៣ព័ទ្ធជុំវិញរាជធានីភ្នំពេញ។ក្រៅពីនេះនៅក្បែរគម្រោងអភិវឌ្ឍន៍ព្រលានយន្តហោះថ្មីក្នុងភូមិសាស្ត្រខេត្តកណ្តាលនិងខេត្តតាកែវរួមជាមួយគម្រោងផ្លូវក្រវ៉ាត់ក្រុងទី៤ដែលអាចស្ថិតនៅក្នុងភូមិសាស្ត្រខេត្តកណ្តាលនិងខេត្តកំពង់ស្ពឺ។
លោកវីរៈបានបន្តថាពេលនេះភាគច្រើនគេទិញទុកសម្រាប់លក់ចេញទៅវិញយកចំណេញនៅឆ្នាំបន្ទាប់ឬធ្វើការអភិវឌ្ឍនៅក្នុងឆ្នាំក្រោយទាំងអស់ដោយសារតែនៅក្នុងអំឡុងពេលនេះទាំងអ្នកវិនិយោគនិងអ្នកអភិវឌ្ឍន៍សុទ្ធតែនៅទន្ទឹងរង់ចាំឱ្យមានការធ្លាក់ចុះនូវស្ថានភាពប្រឈមជាងនេះបន្តិចទៀតឬក្រោយមានវត្តមានអ្នកវិនិយោគបរទេសវិលត្រឡប់មកកាន់កម្ពុជាវិញ។
នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យ CBRE Cambodia លោកស្រីអានសុធីតាធ្លាប់បានមានប្រសាសន៍ប្រាប់តាមទូរស័ព្ទថាក្នុងអំឡុងពេលនេះភាគច្រើនអ្នកវិនិយោគមិនចង់បញ្ចេញកញ្ចប់ថវិកាច្រើននោះទេបើបញ្ចេញក៏ស្ថិតនៅក្នុងកម្រិតមួយដែលអាចក្រោមទំហំ១លានដុល្លារចុះក្រោយតែប៉ុណ្ណោះ។
លោកស្រីបញ្ជាក់ថា “ពេលនេះអ្នកមានលុយ គេសម្លឹងមើលពីឱកាសទិញទុកវិនិយោគ នៅពេលណាមានដី ឬអចលនវត្ថុណាដែលមានតម្លៃក្រោមទីផ្សារ គឺគេទិញទុកភ្លាម ប៉ុន្តែទាំងអស់នេះ ក៏មានតែចំពោះអ្នកមានទុនគ្រប់គ្រាន់តែប៉ុណ្ណោះ បើចំពោះអ្នកមិនមានទុនគ្រប់គ្រាន់ ឬពឹងពាក់ទៅលើកម្ចីពីធនាគារ ក៏មិនមែនជាជម្រើសល្អនោះដែរ”៕
