អាមេរិក​និង​អឺរ៉ុប​ចាប់ផ្តើម​កាត់បន្ថយ​ភាព​តានតឹង​ផ្នែក​ពាណិជ្ជកម្ម ប្រកាស​ព្យួរ​ពន្ធ​ទាំងអស់​ទាក់ទង​នឹង​ជម្លោះ​ក្រុមហ៊ុន Boeing និង Airbus

0

ដោយៈ ប៊ី

ភ្នំពេញៈ​សហរដ្ឋអាមេរិក និង​សហភាព​អឺរ៉ុប បាន​យល់ព្រម​ពន្យា​ពេល​រយៈពេល៤ខែ​លើ​ពន្ធគយ​ទាំងអស់ ដែល​ទាក់ទង​ទៅនឹង​ជម្លោះ​ដ៏​រ៉ាំរ៉ៃ លើ​ការឧបត្ថម្ភ​ធន​ដល់​ក្រុមហ៊ុន Boeing របស់​សហរដ្ឋអាមេរិក និង​ក្រុមហ៊ុន Airbus របស់​អឺរ៉ុប។ នេះ​បើ​យោងតាម​ការចេញផ្សាយ​ផ្សាយ​របស់​សាវ​ព័ត៌មាន CNN នៅ​ថ្ងៃទី៦ ខែមីនា ឆ្នាំ២០២១ ។

ពន្ធគយ ដែល​ត្រូវបាន​ផ្អាក​នេះ ជា​ជំហាន​ដំបូង​ឆ្ពោះទៅរក​ការផ្សះផ្សា​ភាពជា​ដៃគូ​ពាណិជ្ជកម្ម​ឆ្លង​មហាសមុទ្រ​អា​ត្ល​ង់​ទិ​ក ដែលមាន​ភាព​តានតឹង​ជិត១៧ឆ្នាំ ដោយ​ពាក្យបណ្តឹង​ទាំងសងខាង អំពី​ការឧបត្ថម្ភ​ធន​ដល់​ក្រុមហ៊ុន​ផលិត​យន្តហោះ​ពាណិជ្ជកម្ម ឈានមុខ​គេ​នៅលើ​ពិភពលោក​ទាំងពីរ។

- Video Advertisement -

ការដាក់​ពន្ធគយ​នេះ បាន​ប៉ះពាល់​ដល់​ការនាំចេញ​របស់​អឺរ៉ុប​ទៅ​អាមេរិក ដែលមាន​ទំហំ​ទឹកប្រាក់ ៧,៥ពាន់​លាន​ដុល្លារ និង​ការនាំចេញ​របស់​សហរ​ដ្ឋ​អាមេរិក​ទៅកាន់​អឺរ៉ុប​មានតម្លៃ ៤ពាន់​លាន​ដុល្លារ។

លោក Valdis Dombrovskis ប្រធាន​ផ្នែក​ពាណិជ្ជកម្ម​នៃ​គណៈកម្មការ​អឺរ៉ុប​បាន​និយាយ​នៅក្នុង​សេចក្តីថ្លែងការណ៍​មួយ​ថា “នេះ​គឺជា​ការចាប់ផ្តើម​ឡើងវិញ​នូវ​ទំនាក់ទំនង​របស់​យើង​ជាមួយ​ដៃគូ​ដ៏​សំខាន់ និង​សេដ្ឋកិច្ច​របស់​យើង” ។

លោក​បាន​ថ្លែងថា “ការលុបចោល​ពន្ធគយ​ទាំងនេះ គឺ​នយោបាយ​ឈ្នះ-ឈ្នះ សម្រាប់​ភាគី​ទាំងពីរ នៅពេលដែល​ជំងឺ​រាតត្បាត​សកល កំពុង​ធ្វើឱ្យប៉ះពាល់​ដល់​អ្នកធ្វើកា​រ និង​សេដ្ឋកិច្ច​របស់​យើង” ។

កិច្ចព្រមព្រៀង​នេះ​ធ្វើឡើង​មួយថ្ងៃ បន្ទាប់ពី​សហរដ្ឋអាមេរិក បាន​ចុះ​កិច្ចព្រមព្រៀង​ស្រដៀង​គ្នា ជាមួយ​ចក្រភព​អង់គ្លេស ដើម្បី​ព្យួរ​ពន្ធ​លើ​ផលិតផល​អង់គ្លេស រួមទាំង​ស្រា Scotch whisky។

ជម្លោះ​ក្រុមហ៊ុន​ផលិត​យន្តហោះ​ធំ​បំផុត​ទាំងពីរ លើ​ពិភពលោក​នេះ​កើត​តាំងពី​ឆ្នាំ២០០៤ នៅពេលដែល​អាជ្ញាធរ​សហភាព​អឺរ៉ុប​បាន​អះអាងថា ក្រុមហ៊ុន Boeing បានទទួល​ឧបត្ថម្ភ​ធន​ចំនួន១៩ពាន់​លាន​ដុល្លារ​ពី​រដ្ឋាភិបាល ហើយ​នេះ​គឺជា​ឧបត្ថម្ភ​ធន​មិន​ភាពស្មោះត្រង់ សម្រាប់​ការប្រកួតប្រជែង​លើ​ទីផ្សារ​អន្តរជាតិ។

រដ្ឋាភិបាល​សហរដ្ឋអាមេរិក បានដាក់​ពាក្យបណ្តឹង​ស្រដៀង​គ្នា​នេះដែរ នៅ​ឆ្នាំ​នោះ ជុំវិញ​ការឧបត្ថម្ភ​ធន​របស់​អឺរ៉ុប​ទៅ​ក្រុមហ៊ុន Airbus៕

-Video Advertisement -

LEAVE A REPLY

Please enter your comment!
Please enter your name here