ដោយគង់ សូរិយា
ភ្នំពេញៈ ទីផ្សារអាផាតម៉ិននៅក្រុងភ្នំពេញ បាននិងកមពូងបត់បែនក្នុងទីផ្សារជាមួយនឹងការផ្តល់ជូននូវតម្លៃពិសេស ខណៈអត្រាប្រើប្រាស់រួមបានធ្លាក់ចុះមកនៅត្រឹម៥០ភាគរយ។
យោងតាមរបាយការណ៍របស់ក្រុមហ៊ុនCBRE Cambodia បានឲ្យដឹងថា គិតត្រឹមដំណាច់ឆ្នាំ២០២០កន្លងមកនេះ អាគារអាផាតម៉ិនកម្រិតB និងកម្រិតCចំនួន៥២អាគារ ដែលមានសរុប២៨០០យូនីត បានដាក់ដំណើរការនៅក្នុងទីផ្សារ និងអាគារអាផាតម៉ិនចំនួន៥ទៀត នឹងសាងសង់ចប់ហើយដាក់ចូលទីផ្សារនៅឆ្នាំនេះ។
លោកស្រីអាន សុធីតានាយិកាប្រចាំប្រទេសនៃក្រុមហ៊ុនCBRE Cambodiaបានមានប្រសាសន៍ឲ្យដឹងកាលពីសប្តាហ៍មុនថា អត្រាប្រើប្រាស់សរុបក្នុងទីផ្សារអាផាតម៉ិនបានធ្លាក់ចុះពី៨៥ភាគរយ មកនៅត្រឹម៥០ភាគរយនៅឆ្នាំនេះ ខណៈតម្លៃជួលមានភាពបត់បែន ដោយសារម្ចាស់អាផាតម៉ិន បានព្យាយាមរក្សាអតិថិជនរបស់ពួកគេ ហើយបានផ្តល់តម្លៃ និងសេវាកម្មកាន់តែប្រសើរឡើង។
លោកស្រីបន្តថា “ចំនួនអាផាតម៉ិននេះ មិនរាប់បញ្ចូលអាផាតម៉ិនកម្រិតCនោះទេ ព្រោះអាផាតម៉ិនកម្រិតCមានចំនួនច្រើនណាស់ នៅលើទីផ្សារជួលនាពេលបច្ចុប្បន្ននេះ”។
អាផាតម៉ិនកម្រិតA មួយបន្ទប់គេងនៅតំបន់បឹងកេងកង១ មានតម្លៃប្រមាណ១០០០ដុល្លារ អាផាតម៉ិនកម្រិតB មានតម្លៃ៨០០ដុល្លារ កម្រិតCមានតម្លៃ៥០០ដុល្លារ។ ពីរបន្ទប់គេងមានតម្លៃចន្លោះ១៥០០ ទៅ២០០០ដុល្លារ និងបីបន្ទប់គេងមានតម្លៃប្រមាណ៣០០០ដុល្លារក្នុងមួយខែ ប៉ុន្តែសម្រាប់តំបន់ផ្សេងទៀត ក្រៅពីសង្កាត់បឹងកេងកង១ មានតម្លៃទាបជាងនេះ៕
