ដោយៈលក្ខិណា
ភ្នំពេញៈ កាលពីប៉ុន្មានមុនអត្រានៃការប្រាក់ នៃការទិញរបស់បង់រំលសល់ជាពិសេសអចលនទ្រព្យគឺមានតម្លៃខ្ពស់ ធ្វើឱ្យអ្នកមានបំណងទិញផ្ទះ មិនមានលទ្ធភាពក្នុងការបង់រំលស់ផ្ទះសម្រាប់ស្នាក់នៅបាន ក៏ប៉ុន្តែមកដល់បច្ចុប្បន្ននេះយើងឃើញថា អត្រាការប្រាក់សម្រាប់បង់រំលស់កាន់តែទាប ដែលជំរុញឱ្យអ្នកមានបំណងចង់បានផ្ទះ សមរម្យស្នាក់នៅមានលទ្ធភាពទិញផ្ទះ បង់រំលស់កាន់តែច្រើន។
លោកឧកញ៉ា ចេង ខេង អគ្គនាយកក្រុមហ៊ុនCPL បានឱ្យដឹងកាលពីម្សិលម៉ិញនេះថា កាលពី៥ទៅ១០ឆ្នាំមុន អត្រាការប្រាក់ទិញផ្ទះមានតម្លៃខ្ពស់ ក៏ប៉ុន្តែមកដល់បច្ចុប្បន្ននេះ យើងឃើញថាអត្រាការប្រាក់ទិញផ្ទះ មានតម្លៃទាបសមរម្យ ដែលធ្វើឱ្យអ្នកមានបំណងទិញផ្ទះលើកដំបូង ឬទិញសម្រាប់ស្នាក់នៅ គាត់មានលទ្ធភាព ក្នុងការបង់រំលស់។
លោកឧកញ៉ាបន្តថា “អ្នកដែលកំពុងតែជួលផ្ទះគេស្នាក់នៅពេលនេះ អាចគិតនិងស្វែងរកទីតាំងលំនៅឋាន ដែលខ្លួនចង់បានសម្រាប់ស្នាក់នៅ ដោយធ្វើការបង់រំលស់ទៅក្រុមហ៊ុនអភិវឌ្ឍន៍លំនៅឋាន ឬបង់រំលស់ជាមួយធនាគារដែលសហការជាមួយក្រុមហ៊ុនអភិវឌ្ឍន៍” ។
អ្នកខ្លះមានលុយសម្រាប់ទិញបង់ផ្ដាច់បាន ហើយអ្នកខ្លះទៀតក៏មានលុយមួយចំនួនសម្រាប់បង់ខ្លះទៅក្រុមហ៊ុនអភិវឌ្ឍន៍លំនៅឋាន តែគាត់អាចមានជម្រើសក្នុងការទិញដោយបង់រំលស់ ដោយទុកលុយមួយចំណែកសម្រាប់ប្រកបរបរអាជីវកម្ម ឬក៏ធ្វើអ្វីផ្សេងទៀត ដោយមិនចាំបាច់បង់ទាំងដុលក៏បានដែរ។
លោកបន្តថា ការបង់រំលស់សម្រាប់ទិញផ្ទះនៅពេលនេះ គឺមានពីរជម្រើសទៅទៀត ទីមួយ បង់ជាមួយម្ចាស់អភិវឌ្ឍន៍លំនៅឋានផ្ទាល់តែម្ដង និងមួយទៀតបង់ជាមួយធនាគារឬមីក្រូហិរញ្ញវត្ថុណា ដែលអាចអនុញ្ញាតឱ្យខ្ចី សម្រាប់យកលុយទៅបង់ផ្ដាច់ជាមួយធនាគារ ។
ជាមួយគ្នានេះ លោកបណ្ឌិតគីម ហ៊ាងប្រធានKW Cambodia ធ្លាប់បានលើកឡើងថា ការទិញផ្ទះ ឬទិញអចលនទ្រព្យដែលបង់រំលស់ មិនគួរបង់ឱ្យលើសពី៣០ភាគរយនៃប្រាក់ចំណូលប្រចាំខែនោះទេ ព្រោះត្រូវការទុកលុយចំនួនទៀត សម្រាប់ដោះស្រាយបញ្ហាជីវប្រចាំថ្ងៃដូចជាសម្លៀកបំពាក់ អាហារហូបចុក ថ្លៃសាលាកូននិងថ្លៃសម្រាប់ព្យា បាលជំងឺជាដើម ។
ចំណែកលោកសំ សុខនឿនប្រធានសមាគមអ្នកអចលនទ្រព្យសកល បានឱ្យដឹងថា បច្ចុប្បន្ននេះ ការផ្តត់ផ្គង់លំនៅឋាន ហាក់ដូចជាលើសពីតម្រូវការជាក់ស្ដែងទៅហើយ ខណៈក្រុមហ៊ុនអភិវឌ្ឍន៍មួយចំនួន បានសាងសង់ផ្ទះហើយមិនមានអ្នកស្នាក់នៅនោះទេ ហើយបុរីលំនៅឋានខ្លះ មនុស្សម្នាក់ទិញលំនៅឋានពីរបីល្វែងក្នុងពេលតែមួយ៕
