ដោយ : គង់ សូរិយា
ភ្នំពេញ : អាគារពាណិជ្ជកម្មភ្លោះកប់ពពក វិនិយោគដោយក្រុមហ៊ុន Royal Groupសហការជាមួយក្រុមហ៊ុនចិន ដែលគ្រោងបោះទុនវិនិយោគតម្លៃ១៥០លានដុល្លារបានប្រកាសលក់ជាផ្លូវការហើយ មុនពេលគំរោងនេះ នឹងចាប់ផ្តើមសាងសង់នៅពេលឆាប់ៗខាងមុខនេះ។
ការប្រកាសលក់លំនៅដ្ឋាន និងផ្នែកពាណិជ្ជកម្មនៃអាគារដ៏ខ្ពស់ ស្ថិតនៅចំណុចប្រសព្វរវាងមហាវិថីព្រះមុនីវង្ស និងមហាវិថីសហព័ន្ឋរុស្ស៊ីនេះ បានធ្វើឡើងក្រោមអធិបតីលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្ត្រីក្រសួងទំនាក់ទំនង ជាមួយរដ្ឋសភា-ព្រឹទ្ធសភា និងអធិការកិច្ច។
លោកជំទាវកិត្តិសង្គហបណ្ឌិត បានកោតសសើរចំពោះលោកឧកញ៉ា គិត ធាង និងក្រុមហ៊ុនរ៉ូយ៉ាល់គ្រុប ដែលមានជំនឿទុកចិត្តយ៉ាងមុតមាំលើ រាជរដ្ឋាភិបាលកម្ពុជា ដែលដឹកនាំ ដោយសម្ដេចអគ្គមហាសេនាបតីតេជោ ហ៊ុន សែន ដោយបានសម្រេចចិត្តបណ្តាក់ទុន វិនិយោគសាងសង់អាគារពាណិជ្ជកម្មពហុមុខងារ មានកំពស់រហូតដល់កំពស់៦២ជាន់ ស្មើនឹងកម្ពស់ ២៣០ម៉ែត្រ មានទីតាំងនៅដីឡូត៍លេខ៩៣ ផ្លូវលេខ១១៤ កែងនឹងមហាវិថីមុនីវង្ស ដោយមានរចនាបទយ៉ាងប្រណិត និងបំពាក់ឧបករណ៍ទំនើបៗ។
លោកជំទាវបានបន្តទៀតថា គំរោងនេះ ពិតជារួមចំណែកលើកកម្ពស់សោភ័ណភាព និងការអភិវឌ្ឍរាជធានីភ្នំពេញ ផ្ដល់បទពិសោធន៍ល្អៗផ្នែកខាងវិស្វកម្ម និងស្ថាបត្យកម្មដល់កម្ពុជា ។ គម្រោងនេះក៏ពិតជាកើតឡើងចំពេលដែលកម្ពុជា កំពុងមានស្ថានភាពសេដ្ឋកិច្ចល្អ និងស្ថេរភាពនយោបាយល្អ និងគោលនយោបាយគាំទ្រពីរាជរដ្ឋភិបាលដល់សកម្មភាពអាជីវកម្ម និងវិនិយោគនានាផងដែរ។
គំរោងដ៏ធំនេះបានសហការវិនិយោគដោយក្រុមហ៊ុន Royal Group ជាមួយHuashiGroup ។ ក្រុមហ៊នុន OTK Royal One ដែលជាបុត្រសម្ព័ន្ឋជាមួយក្រុមហ៊ុនRoyal Group ដែលតំណាងដោយលោកឧកញ៉ាគិត ធាងប្រធានក្រុមហ៊ុន OTK Royal One ជាអ្នកវិនិយោគគំរោងនេះ។
លោកឧកញ៉ា គិត ធាង បានមានប្រសាសន៍ឲ្យដឹងថា ការសាងសង់អាគារខ្ពស់កប់ពពកនេះ នឹងចាប់ផ្តើមនៅខែកញ្ញាខាងមុខនេះ និងគ្រោងចំណាយពេលរយៈពេល៣ឆ្នាំដើម្បីបញ្ចប់គំរោងនេះ។
អាគារភ្លោះ Royal One នឹងប្រើប្រាស់ចម្រុះសម្រាប់ជាសណ្ឋាគារ ខុនដូ ផ្សារទំនើប អាគារការិយាល័យជាដើម។
លោកឧកញ៉ា គិត ធាង បានបន្តថា “អាគារ Royal One នឹងជាអាគារខ្ពស់ជាងគេមួយ ដែលនឹងលើកកំពស់មុខមាត់កម្ពុជានាពេលអនាគតផងដែរ”។
ប្រធានប្រឹក្សាភិបាលក្រុមហ៊ុន Hutton CPL លោកឧកញ៉ា ចេង ខេង បានមានប្រសាសន៍ថា ការសាងសង់អាគារ Royal One ជារឿងល្អប្រសើរសម្រាប់សេដ្ឋកិច្ចកម្ពុជា និងឆ្លុះបញ្ចាំងពីទំនុកចិត្តរបស់អ្នកវិនិយោគ លើបរិយាកាសវិនិយោគនៅកម្ពុជា ខណៈដែលទីផ្សារអចលនទ្រព្យកំពុងមានភាពរីកចម្រើន ហេតុនេះវត្តមានអាគារនេះ នឹងជួយលើកកំពស់មុខមាត់កម្ពុជាបន្ថែមទៀត។
លោកបន្តថា “ទីតាំងសាងសង់អាគារនេះ ស្ថិតនៅចំណុចពិសេសមួយដែលអាចបញ្ចៀសបាននូវការកកស្ទះចរាចរណ៍”។ លោកបន្តថា “ដោយសារកំនើននៃការមកដល់របស់អ្នកវិនិយោគ ភ្ញៀវទេសចរណ៍ និងទីតាំងអាគារនេះជាតំបន់ដ៏ទាក់ទាញ ខ្ញុំគិតថាវានឹងធ្វើឲ្យគំរោងនេះទទួលបានជោគជ័យ”៕
