ដោយៈ ប៊ី
ភ្នំពេញៈ ការសិក្សាមួយដែលធ្វើឡើងនៅទីក្រុង អាប៊ូដាប៊ី បានបង្ហាញថា វ៉ាក់សាំង Sinopharm មានប្រសិទ្ធិភាពជាង៩០ភាគរយ ក្នុងការប្រឆាំងនឹងការឆ្លងជំងឺកូវីដ១៩។ នេះបើយោងតាមការចេញផ្សាយរបស់សារព័ត៌មាន The National News កាលពីថ្មីៗនេះ។
អាជ្ញាធរនិយាយថា ការសិក្សាស្រាវជ្រាវបានរកឃើញថា មានការថយចុះគួរឲ្យកត់សម្គាល់ នៃអត្រាឆ្លងជំងឺកូវីដ១៩ ក្នុងចំណោមមនុស្ស ដែលបានវ៉ាក់សាំងដូសទី២រួច នៅក្នុងប្រទេសអារ៉ាប់រួម។
ការសិក្សា ដែលធ្វើឡើងដោយមជ្ឈមណ្ឌលសុខភាព
អាប៊ូដាប៊ី បានបង្ហាញថា ភាគច្រើននៃអ្នកឆ្លង បន្ទាប់ពីបញ្ចប់ការសិក្សា គឺមានអាការៈស្រាល និងមិនត្រូវការការព្យាបាលនៅក្នុងមន្ទីរពេទ្យទេ។
យោងតាមការស្រាវជ្រាវបានឱ្យដឹងថា វ៉ាក់សាំងនេះត្រូវបានកំណត់ថាមានប្រសិទ្ធភាព៩៣ភាគរយ ក្នុងការទប់ស្កាត់បញ្ជូនទៅព្យាបាលក្នុងមន្ទីរពេទ្យ និងប្រសិទ្ធភាព៩៥ភាគរយ ប្រឆាំងការបញ្ជូនទៅសង្គ្រោះបន្ទាន់។
អ្នកដែលទទួលបានវ៉ាក់សាំងគ្រប់ដូសហើយ គឺមិនស្ថិតនៅក្នុងស្ថានភាព ដែលអាចឈានដល់ការស្លាប់នោះទេ។
ទោះបីជាយ៉ាងណាក៏ដោយ គេមិនបញ្ជាក់ថាតើការសិក្សានេះ ត្រូវបានធ្វើឡើងនៅពេលណា ឬចំនួនមនុស្សប៉ុន្មាននាក់ដែលត្រូវបានគេរាប់បញ្ចូល ក្នុងការស្រាវជ្រាវនេះនោះទេ។
អ្នកស្រាវជ្រាវបានឱ្យដឹងថា អង់ទីគ័រប្រឆាំងមេរោគកូវីដ បានបញ្ចេញយ៉ាងល្អបំផុតតាមរយៈការចាក់វ៉ាក់សាំងនេះ និងតាមរយៈការប្រកាន់ខ្ជាប់នូវវិធានការបង្ការជាមុន៕
