ដោយៈ ឧត្តម
ភ្នំពេញៈ នៅរយៈពេលប៉ុន្មានថ្ងៃកន្លងទៅនេះ មានប្រជាពលរដ្ឋជាច្រើនបានបង្ហាញវិក្ក័យបត្រអគ្គិសនី អមដោយពាក្យត្អូញត្អែ ចំពោះការបរិមាណអគ្គិសនីប្រើប្រាស់អស់ច្រើនជាងសព្វដង និងលើកឡើងថា ក្នុងកំឡុងពេលប្រទេសកំពុងមានវិបត្តិហើយបែរជា ថ្លៃអគ្គិសនីកើនឡើង។
ជាទូទៅ ការចំណាយទៅលើថ្លៃអគ្គិសនី នៅកម្ពុជាអ្នកប្រើប្រាស់បរិមាណកាន់តែច្រើនតម្លៃនឹងឡើងថ្លៃ ជាបន្តបន្ទាប់ក្នុងមួយគីឡូវ៉ាត់ម៉ោង អ្នកប្រើប្រាស់អស់កាន់តែតិច តម្លៃក្នុងមួយគីឡូវ៉ាត់ម៉ោងក៏កាន់តែតិច។ ជាក់ស្ដែងបើអ្នកប្រើប្រាស់អស់ត្រឹមក្រោម១០គីឡូវ៉ាត់ម៉ោងក្នុងមួយខែ តម្លៃត្រឹមតែ៣៨០រៀលប៉ុណ្ណោះ ក្នុងមួយគីឡូវ៉ាត់ម៉ោង ប្រើប្រាស់អស់ចាប់ពី១១គីឡូវ៉ាត់ម៉ោង ឡើងទៅដល់៥០គីឡូវ៉ាត់ម៉ោងតម្លៃ៤៨០រៀល ប្រើអស់ពី៥១ ដល់២០០គីឡូវ៉ាត់ម៉ោងតម្លៃ៦១០រៀល និងប្រើចាប់ពី២០១គីឡូវ៉ាត់ម៉ោងឡើងទៅក្នុងមួយខែតម្លៃចាប់៧៣០រៀលក្នុងមួយវ៉ាត់ម៉ោង។
លោកចាន់ សុផលនាយកវិទ្យាស្ថានសិក្សាការអភិវឌ្ឍន៍ បានបង្ហាញទស្សនរបស់ខ្លួនលើមូលដ្ឋានចំនួនពីរ ទី១ ការយកថ្លៃខ្ពស់ពីអ្នកដែលប្រើប្រាស់អគ្គិសនីច្រើន ដើម្បីបន្ទាបថ្លៃសម្រាប់អ្នកប្រើប្រាស់តិច (ដែលអង់គ្លេសហៅថា cross subsidies) គឺជាគោលនយោបាយត្រឹមត្រូវ ។ អ្នកប្រើប្រាស់អគ្គិសនីតិច ជាទូទៅ មានកម្រិតជីវភាពទាបជាងអ្នកប្រើប្រាស់អគ្គិសនីច្រើន ។
ក៏ប៉ុន្តែ មានមនុស្សច្រើនណាស់ ដែលមិនទទួលបានការពន្យល់រឿងនេះ និងបែរជាហួសចិត្តថា មិនគួរមានការគិតកាន់តែថ្លៃ ចំពោះទំនិញដែលគេប្រើកាន់តែច្រើនសោះ។
ទី២ ការកំណត់គោលនយោបាយរកចំណេញពីការលក់អគ្គិសនី និងការយកថ្លៃខ្ពស់ដល់ធុរកិច្ច រោងចក្រ សហគ្រាសជាដើម គឺជាឧបសគ្គដ៏ធំមួយ ចំពោះដំណើរការអភិវឌ្ឍទំនើបកម្ម និងឧស្សាហកម្មនៅកម្ពុជា ដែលនេះគឺជាចំណុចដ៏គួរឱ្យសោកស្ដាយមួយ ។
អ្នកតាមដាលការវិត្តនៃសេដ្ឋកិច្ចសង្គមកម្ពុជា លោកយិន លាងគអ់បានមានប្រសាសន៍ថា ប៉ុន្មានសប្តាហ៍ចុងក្រោយនេះ មានប្រជាពលរដ្ឋជាច្រើនប្រតិកម្មចំពោះការចំណាយលើថ្លៃអគ្គិសនីកើនឡើងខ្ពស់ ខណៈស្ថានភាពប្រទេសកំពុងជួបវិបត្តិ ជំងឺកូវីដកំពុងគំរាមកំហែងជីវភាពរបស់ប្រជាពលរដ្ឋ ហេតុនេះអាជ្ញាធរអគ្គិសនីគួរពិចារណាលើបញ្ហានេះឡើងវិញ ទាក់ទងនឹងគោលនយោបាយរបស់ខ្លួន។
លោកបន្តថា អគ្គិសនីកម្ពុជាគួរសិក្សាពីថ្លៃអគ្គិសនី និងប្រាក់ចំណូលប្រជាជនននៅតាមបណ្តាប្រទេសនានាជុំវិញកម្ពុជាថា តើតម្លៃអគ្គិសនីរបស់កម្ពុជា ស្ថិតក្នុងសភាពបែបណា?។
ពាក់ព័ន្ធជាមួយនឹងការឡើងបរិមាណ ប្រើប្រាស់អគ្គិសនីកាន់តែច្រើននៅក្នុងរដូវកាលនេះ លោកកែវ រតនៈ អគ្គនាយកអគ្គិសនីកម្ពុជាបានលើកឡើងជារឿយៗផងដែរថា នៅរដូវក្ដៅ ឧបករណ៍អេឡិចត្រូនិក ដែលបំប្លែងទៅត្រជាក់ដូចជាម៉ាស៊ីនត្រជាក់ ទូរទឹកកក កង្ហារជាដើម ត្រូវការស៊ីថាមពលច្រើនជាងរដូវធម្មតា ហើយជាទូទៅគេស៊ីសង្កេតឃើញថា បរិមាណប្រើប្រាស់អគ្គិសនីរបស់ពលរដ្ឋភាគច្រើន ចំណាយនៅខែមីនា មេសា និងឧសភា ដោយសារតែអំឡុងពេលនោះជារដូវក្ដៅខ្លាំង។
ប៉ុន្តែទោះមានការពន្យល់យ៉ាងណាក្ដី ប្រជាពលរដ្ឋនៅតែបន្តសម្ដែងការមិនពេញចំពោះការចំណាយដ៏ច្រើនគឺគុណជាពីរជាបី នៅអំឡុងខែទាំងនេះ៕
