ដោយៈសុខុម
បាងកក: ប្រទេសថៃ កំពុងកំណត់គោលដៅវិនិយោគ ក្នុងទំហំទឹកប្រាក់រហូតដល់ទៅ២,២ទ្រីលានបាត (៦៦,៨៧ពាន់លានដុល្លារ) នៅភាគខាងកើតប្រទេសក្នុងរយៈពេល៥ឆ្នាំខាងមុខ ពោលគឺចាប់ពីឆ្នាំ២០២២ ដល់ឆ្នាំ២០២៦ ខណៈប្រទេសនេះព្យាយាមជំរុញកំណើនសេដ្ឋកិច្ចរយៈពេលវែង។ នេះបើយោងតាមការចុះផ្សាយរបស់សារព័ត៌មាន CNA។
លោក Kanit Sangsubhan ប្រធានការិយាល័យច្រករបៀងសេដ្ឋកិច្ចភាគខាងកើត (Eastern Economic Corridor (EEC)) បានថ្លែងក្នុងសន្និសីទកាសែតកាលពីថ្ងៃច័ន្ទ ទី១៣ កញ្ញា ថា ការវិនិយោគនៅច្រករបៀងសេដ្ឋកិច្ចភាគខាងកើត (EEC) នេះនឹងមានទំហំ១០០ពាន់លានបាត (៣ពាន់លានដុល្លារ) ក្នុងគម្រោងទីក្រុងអាកាសចរណ៍ភាគខាងកើត និង៣ពាន់លានដុល្លារ ទៀតលើការអភិវឌ្ឍផ្លូវដែក។
លោកបានបន្ថែមទៀតថា ទឹកប្រាក់ប្រហែល៤០០ពាន់លានបាត (១២,១៧ពាន់លានដុល្លារអាមេរិក) ជារៀងរាល់ឆ្នាំនឹងត្រូវវិនិយោគ ក្នុងឧស្សាហកម្មគោលដៅដូចជារថយន្តទំនើប គ្រឿងអេឡិចត្រូនិកឌីជីថល និងវេជ្ជសាស្ត្រទំនើបជាដើម។
ផ្អែកតាមផែនការបច្ចុប្បន្នឆ្នាំ២០១៨-២០២២ ការវិនិយោគនៅច្រករបៀងសេដ្ឋកិច្ចភាគខាងកើត (EEC) បានឈានដល់១.៦ទ្រីលានបាត (៤៨,៧ពាន់លានដុល្លារ) គិតរហូតមទល់ពេលនេះ ហើយវាគួរតែឈាន ១,៧ទ្រីលានបាត (៥១,៧៣ពាន់លានដុល្លារ) នៅឆ្នាំនេះ ពោលលឿនជាងកាលវិភាគកំណត់មួយឆ្នាំ។
ច្រករបៀងសេដ្ឋកិច្ចភាគខាងកើត (EEC) ជាចំណុចស្នូលនៃកិច្ចខិតខំប្រឹងប្រែងរបស់រដ្ឋាភិបាលថៃ នៅក្នុងការជំរុញកំណើន និងលើកទឹកចិត្តការវិនិយោគ ជាពិសេសលើឧស្សាហកម្មបច្ចេកវិទ្យាជាន់ខ្ពស់។ ជាការលើកទឹកចិត្ត បណ្ដាវិនិយោគិនត្រូវបានអនុញ្ញាតឱ្យជួលដីរហូតដល់៩៩ឆ្នាំ។
សេដ្ឋកិច្ចពឹងផ្អែកលើវិស័យទេសចរណ៍របស់ប្រទេសថៃ ដែលជាសេដ្ឋកិច្ចធំបំផុតទី២ នៅអាស៊ីអាគ្នេយ៍ បានដាំក្បាលចុះ៦,១%កាលពីឆ្នាំមុន ហើយនោះជាការធ្លាក់ចុះយ៉ាងខ្លាំងបំផុតក្នុងរយៈពេលជាង២ទសវត្សរ៍ ដោយសារផលប៉ះពាល់នៃការរីករាលដាលវីរុសកូវីដ-១៩។ រដ្ឋាភិបាលថៃបានព្យាករថា នឹងទទួលបានកំណើនសេដ្ឋកិច្ចទាប ត្រឹមតែ០,៧%ទៅ១,២%ប៉ុណ្ណោះនៅឆ្នាំនេះ៕ CNA៕
