ដោយៈវឌ្ឍនៈ
ភ្នំពេញៈ នៅក្នុងវិបត្តិកូវីដ១៩នេះ អាជីវកម្មជាច្រើនបានរងផលប៉ះពាល់រួមទាំងវិស័យអចលនទ្រព្យ ក្នុងនោះការលក់ខុនដូក្នុងវិបត្តិកូវីដ១៩ ក៏រងផលប៉ះពាល់ដូចគ្នា ប៉ុន្តែក្រុមហ៊ុនខ្លះ នៅតែទទួលបានការលក់ជាបន្តបន្ទាប់ជូនអតិថិជន។
ជាក់ស្ដែងក្រុមហ៊ុនDNZ Realty ដែលជាក្រុមហ៊ុនអចលនទ្រព្យមួយនៅកម្ពុជានៅតែលក់ខុនដូបានជាហូរហែរ ទោះស្ថិតនៅក្នុងស្ថានភាពលំបាកក្ដី ។
លោករិន ច័ន្ទរិទ្ធិ នាយកប្រតិបត្តិនៃក្រុមហ៊ន DNZ Realty បានឱ្យដឹងកាលពីសប្តាហ៍មុនថា ការស្គាល់មនុស្សកាន់តែច្រើនឡើង និងការរក្សាទំនាក់ទំនងជាមួយមនុស្សដែលបានស្គាល់តាំងពីយូរមកនោះ គឺជាកត្តាមួយជំរុញឱ្យយើងទទួលបានការលក់ជាបន្តបន្ទាប់។ កាលពីមុនលោកមិនមែនជាអ្នករកស៊ី ឬធ្វើការក្នុងវិស័យអចលនទ្រព្យនោះទេ ប៉ុន្តែលោកបានរក្សាទំនាក់ទំនងល្អ ជាមួយមនុស្សដែលធ្លាប់ធ្វើការជាមួយ និងមនុស្សធ្លាប់ស្គាល់។
លោកបន្តថា “ដូច្នេះ ពេលខ្ញុំប្រឡូកក្នុងវិស័យអចលនទ្រព្យ ក៏បានទំនាក់ទំនងទៅកាន់មនុស្សទាំងនោះ និងណែនាំពីគម្រោងដែលខ្ញុំកំពុងលក់ ហើយក៏ឃើញថាមានមនុស្សដែលធ្លាប់ស្គាល់កន្លងមក មកទិញខុនដូដែលបានលក់ជាហូរហែផងដែរ”។
លោករិន ច័ន្ទរិទ្ឋិបានបន្តថា ការកសាងទំនុកចិត្ត ភាពស្មោះត្រង់របស់យើងក៏ជាកត្តាសំខាន់មួយដែរ ក្នុងការធ្វើអាជីវកម្មវិស័យអចលនទ្រព្យ។ នៅពេលដែលយើងមានភាពស្មោះត្រង់ មានមនុស្សជាច្រើនក៏បានមកទិញគម្រោងខុនដូ តាមរយៈលោក។ ដូច្នេះហើយ ទោះបីជាទីផ្សារចង្អៀតខ្លាំងជាមួយ ផលប៉ះពាល់ពីវិបត្តិកូវីដ១៩ ក៏ក្រុមការងាររបស់DZN Realty នៅតែមានដំណើរការនិងសកម្មភាពលក់ដដែល”។
លោកបន្ថែមថា ការបត់បែនតាមកាលទេសៈ ក៏ជាយុទ្ធសាស្ត្រមួយក្នុងការបន្តដំណើរការទៅមុខបន្តទៀត បើទោះបីជាមិនរីកចម្រើនខ្លាំងណាក្ដី តែយ៉ាងហោចណាស់ក៏យើងនៅតែវត្តមាននៅលើទីផ្សារ ខណៈក្រុមហ៊ុនភ្នាក់ងារអចលនទ្រព្យជាច្រើនទៀតបានដួលរំលំបែកបាក់ក្រុមអស់ទៅហើយក្ដី។
លោកបន្ថែមទៀតថា បច្ចុប្បន្ននេះ ក្រុមហ៊ុនDNZ Realty មានសកម្មភាពមួយប៉ុណ្ណោះគឺលក់ខុនដូ តែនៅពេលអនាគតយើងនឹងបន្តលក់ផ្ទះល្វែង និងរៀបចំការលក់ដីធ្លី ព្រមទាំងការជួលជាដើម ។
លោកបន្តថា “ជាជំហានដំបូងយើងផ្ដោតទៅលើខុនដូ ហើយក៏ជាមោទនភាពមួយផងដែរ ដែលយើងអាចធ្វើការងារទទួលបានជោគជ័យ ដោយសារតែធនធានយើងមានកម្រិត យើងមិនអាចពង្រីកខ្លួនឱ្យដូចក្រុមហ៊ុនធំៗបាននោះទេ យើងត្រូវធ្វើ្វម្ដងមួយជំហានម្តងៗ”៕
