ដោយ៖ សុផារី
ភ្នំពេញ៖ លោកស្រី Catherine Chan នាយកក្រុមហ៊ុនហ្គោលហ្វេមគ្រុប (Goldfame Group) ស្ថាបនិកនិងជានាយកប្រតិបត្តិនៃក្រុមហ៊ុន Urban Village & Factory Phnom Penh ត្រូវបានជ្រើសរើសដោយទស្សនាវដ្តី Property Guru Property Report ជាបុគ្គលឆ្នើមប្រចាំឆ្នាំខាងផ្នែកអចលនទ្រព្យកម្ពុជាក្នុងឆ្នាំ ២០២១។ ការសម្រេចនេះជាឯកសិទ្ធពិសេសេតែមួយគត់ ដែលមិនត្រូវបានសំរេចដោយក្រុមគណៈកម្មការនៃកម្មវិធី។
លោកស្រី Catherine Chan នឹងក្លាយជាស្ត្រីដំបូងដែលទទួលបានពានរង្វាន់នេះ ដោយកន្លងមកលោកស្រីបានផ្សព្វផ្សាយយ៉ាងសកម្ម លើវិស័យអចលនទ្រព្យនៅកម្ពុជាដល់វិនិយោគិនបរទេសនិងក្នុងស្រុក។
លោកស្រីបានសរសេរលើបណ្តាញសង្គមហ្វេសប៊ុករបស់លោកស្រីថា “វាលើកទឹកចិត្តខ្ញុំឱ្យកាន់តែប្រសើរនិងខិតខំបន្ថែមទៀតដើម្បីទទួលបានការទទួលស្គាល់នៅក្នុងសង្គមចំពោះសហគ្រិនស្ត្រីទូទាំងពិភពលោក។ យើងរួមគ្នា កាន់តែរឹងមាំ”។
គួរកត់សម្គាល់ថា កាលពីដើមឆ្នាំ ២០២១ លោកស្រីត្រូវបានទទួលពានរង្វាន់សហគ្រិនស្ត្រី Golden Bauhinia ដែលផ្តល់ដោយ Golden Bauhinia Woman Entrepreneur Association។ កាលពីពេលថ្មីៗនេះ លោកស្រីក៏ត្រូវបានតែងតាំងជាប្រធានក្នុងប្រទេសកម្ពុជាសំរាប់ ”សហគមន៍នាយកប្រតិបត្តិប្រចាំតំបន់អាស៊ី” ឬដែលហៅជាភាសាអង់គ្លេសថា ASIA CEO COMMUNITY ផងដែរ៕
