ដំណឹងល្អៈរដ្ឋាភិបាលចាប់ផ្តើមឲ្យវិស័យឯកជនវិនិយោគលើហេដ្ឋារចនាសម្ព័ន្ឋសម្រាប់រថយន្តអគ្គិសនីហើយ

ដោយៈគង់ សូរិយា

ភ្នំពេញៈ រដ្ឋាភិបាលកម្ពុជា បានចាប់ផ្តើមបើកភ្លើងខៀវជំរុញឱ្យវិស័យឯកជនចូលរួមវិនិយោគរួមគ្នាជាមួយរដ្ឋ ដើម្បីសាងសង់ហេដ្ឋារចនាសម្ព័ន្ធ នៃស្ថានីយសាកអគ្គិសនីដល់រថយន្តប្រើអគ្គិសនីនៅកម្ពុជា។

លោកទេសរដ្ឋមន្រ្តីស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានលើកឡើងដូច្នេះ ក្នុងកិច្ចពិភាក្សា (Panel Discussion) លើប្រធានបទ “អគ្គិសនីភាវូបនីយកម្មនៃយានយន្ត ដើម្បីអនាគតបៃតងសម្រាប់កម្ពុជា” នៅថ្ងៃទី៤ ខែវិច្ឆិកានេះ ។

លោកបន្តថា “ចំនួនរថយន្តអគ្គិសនី (EV)នឹងកើនឡើងនៅកម្ពុជា នៅប៉ុន្មានឆ្នាំខាងមុខ”។លោកបន្តថា “ការកើនឡើងនេះ គឺដោយសារ ប្រជាពលរដ្ឋមានការយល់ដឹងច្រើន ពីអត្ថប្រយោជន៍នៃការប្រើប្រាស់រថយន្តអគ្គិសនី និងពន្ធនាំចូលរថយន្តអគ្គិសនីមានតម្លៃទាប ជាងពាក់កណ្តាលនៃការនាំចូលរថយន្តធម្មតា និងការផ្គត់ផ្គង់ថាមពលស្អាតកានតែច្រើនឡើង ក្នុងល្បាយថាមពល ជាពិសេសគឺកែច្នៃថ្មរថយន្តចាស់ៗ”។

លោកស៊ុន ចាន់ថុលបានពន្យល់ទៀតថា នេះមិនមែនជាការទទួលខុសត្រូវរបស់ EDC ក្នុងកសាងស្ថានីយ៍សាកអគ្គិសនីទេ។ វិស័យឯកជន គួរចូលរួមជាមួយរដ្ឋាភិបាល ឬគួរវិនិយោគ លើការកសាងហេដ្ឋារចនាសម្ព័ន្ធ គាំទ្រដល់រថយន្តអគ្គិសនី។

បច្ចុប្បន្ន រថយន្តអគ្គិសនីចុះបញ្ជីនៅកម្ពុជា មានចំនួនតិចតួចនៅឡើយ ធៀបនឹងរថយន្តធម្មតាចុះបញ្ជីមានរហូតដល់ជិត១លានគ្រឿង។

តាមផែនការ ការវិនិយោគដំឡើងស្ថានីយ៍ សាកអាគុយរថយន្តអគ្គិសនី នឹងស្ថិតនៅតាមទីតាំងសំខាន់ៗ តាមផ្លូវជាល្បឿនលឿន និងផ្លូវជាតិលេខ៥ជាដើម៕