ដោយៈជេស៊ីកា
ភ្នំពេញៈ ក្រុមហ៊ុនសាជីវកម្មដ៏ធំមួយរបស់ថៃ Bangchak Corporation (BCP) ដែលជាក្រុមហ៊ុនប្រេងឥន្ទនៈ និងថាមពល បាននិងកំពុងស្វែងរកឱកាសវិនិយោគ និងពង្រីកអាជីវកម្ម ក្នុងវិស័យប្រេងឥន្ធនៈ និងថាមពលបៃតងនៅកម្ពុជា។
លោក Ittikhun Sihsobhon អនុប្រធានជាន់ខ្ពស់ផ្នែកធុរកិច្ចប្រេង និងទីផ្សារ នៃក្រុមហ៊ុនសាជីវកម្ម Bangchak Corporation ក្នុងជំនួបជាមួយឯកលោកអ៊ូក សោភ័ណ ឯកអគ្គរាជទូត កម្ពុជាប្រចាំប្រទេសថៃ កាលពីដើមសប្តាហ៍នេះ។
លោក Ittikhun Sihsobhon បានសន្យាដឹកនាំសហការីមកធ្វើទស្សនកិច្ច សិក្សាទៅកាន់ប្រទេសកម្ពុជា នាពេលឆាប់ៗខាងមុខនេះ ដើម្បីស្វែងយល់បន្ថែមពីកាលានុវត្តភាពធុរកិច្ច វិស័យប្រេងឥន្ធនៈ និងថាមពលបៃតង។
ទន្ទឹមនឹងនេះ លោកឯកអគ្គរាជទូត បានជម្រាបជូនប្រតិភូក្រុមហ៊ុន BCP អំពីគោលនយោបាយការទូតសេដ្ឋកិច្ច ស្តីពីពាណិជ្ជកម្ម វិនិយោគ ទេសចរណ៍ និងវប្បធម៌ យុទ្ធសាស្ត្រថៃបូក១ និងច្បាប់វិនិយោគថ្មីរបស់កម្ពុជា ដែលមានភាពបត់បែន តម្លាភាព និងផ្តល់ការលើកទឹកចិត្តខ្ពស់ជូនវិនិយោគិនបរទេស។
ក្រុមហ៊ុនសាជីវកម្ម Bangchak Corporation (BCP) ជាក្រុមហ៊ុនធំនៅប្រទេសថៃ ដែលមានសមត្ថភាពចម្រាញ់ប្រេងបាន១២ម៉ឺនប៉ារែល ក្នុង១ថ្ងៃ និងមានស្ថានីយសាំងចំនួនរហូតដល់១២០០កន្លែង ទូទាំងប្រទេសថៃ៕
