ដោយ: ម៉ាលីស
ភ្នំពេញៈ ក្រសួងពាណិជ្ជកម្ម បានចាប់ផ្ដើមពិភាក្សាលើការកំណត់មុខទំនិញកសិកម្មសក្តានុពល ដើម្បីនាំចេញទៅកាន់ប្រទេសចិន កូរ៉េខាងត្បូង នូវមុខទំនិញចំនួន ១០មុខត្រូវបានកំណត់ដើម្បីនាំចេញ។
ការត្រៀមផលិតផលនាំចេញនេះ ស្ថិតនៅក្នុងកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគី។ ផលិតផលកសិកម្មសក្តានុពុលទាំងនោះ រួមមាន ស្រូវ អង្ករ ដំឡូងមី ចេក មៀនប៉ៃលិន ស្វាយ ស្វាយចន្ទី សាច់សត្វ ជ័រកៅស៊ូ ម្នាស់ និងម្រេច។ យោងតាមក្រសួងពាណិជ្ជកម្ម ទំនិញ១០មុខ ជាទំនិញសក្តានុពលក្នុងកញ្ចប់ទី១ ហើយជំហានបន្ទាប់ក្រសួងនឹងពិនិត្យពិចារណាលើទំនិញបន្ថែមទៀត។
កម្ពុជាសម្រេចបាននូវកិច្ចព្រមព្រៀង ពាណិជ្ជកម្មសេរីជាមួយ ចិន កាលពីឆ្នាំមុន និង ជាមួយកូរ៉េខាងត្បូង នៅខែតុលាឆ្នាំ២០២១។ កម្ពុជាក៏រំពឹងថា នឹងបើកទីផ្សារកាន់តែធំសម្រាប់ទំនិញកម្ពុជា នៅពេលកិច្ចព្រមព្រៀងភាពជាដៃគូសេដ្ឋកិច្ច តំបន់គ្រប់ជ្រុងជ្រោយ (RCEP) ចូលជាធរមាននៅដើមឆ្នាំក្រោយ៕
