ដោយៈសុផារី
មណ្ឌលគិរីៈ រាជរដ្ឋាភិបាលកម្ពុជាបានរៀបចំ និងដាក់ឱ្យអនុវត្តនូវ ផែនការមេអភិវឌ្ឍន៍វិស័យ ទេសចរណ៍ខេត្តមណ្ឌលគិរី (២០២១-២០៣៥) ដើម្បីជាត្រីវិស័យចង្អុលបង្ហាញយន្តការ និងទិសដៅយុទ្ធសាស្ត្រសំខាន់ៗសម្រាប់ការអភិវឌ្ឍ វិស័យទេសចរណ៍ខេត្តមណ្ឌលគិរី ដើម្បីរួមចំណែកអភិវឌ្ឍ តំបន់ភូមិភាគឦសាន្តដែលមានខេត្តមណ្ឌលគិរីជាស្នូល ឱ្យក្លាយជាប៉ូលសេដ្ឋកិច្ចទី៤ របស់កម្ពុជា។
តាមរយៈ “ផែនការមេអភិវឌ្ឍន៍វិស័យទេសចរណ៍ ខេត្តមណ្ឌលគិរី ២០២១-២០៣៥” តំបន់អាទិភាពសម្រាប់ការអភិវឌ្ឍចំនួន៦តំបន់ធំៗ ខេត្តមណ្ឌលគិរី ត្រូវបានដាក់ជាអាទិភាព សម្រាប់ការអភិវឌ្ឍក្នុងផែនការមេនៃការអភិវឌ្ឍនេះ។
ថ្លែងក្នុងពិធីផ្សព្វផ្សាយ និងដាក់ឱ្យអនុវត្តជាផ្លូវការនូវ “ផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី ២០២១-២០៣៥” នៅថ្ងៃទី១១ ខែមេសា ឆ្នាំ២០២២នេះ លោកបណ្ឌិតជុក ជំនោរ ប្រធានលេខាធិការដ្ឋានគណៈកម្មាធិការជាតិអភិវឌ្ឍទេសចរណ៍ និងជាប្រធានក្រុមការងារបច្ចេកទេសសិក្សារៀបចំផែនការមេ អភិវឌ្ឍន៍វិស័យទេសចរណ៍ខេត្តមណ្ឌលគិរី បានមានប្រសាសន៍ថា ការកំណត់តំបន់អាទិភាពសម្រាប់ការអភិវឌ្ឍ ត្រូវបានបែងចែកជា៦តំបន់ធំៗ ក្នុងនោះក្រុងសែនមនោរម្យ ត្រូវបានជ្រើសរើសជាបណ្តុំសកម្មភាពពហុបំណង។
ចំណែក តំបន់ស្រុកអូររាំង ដែលជាតំបន់អភិវឌ្ឍន៍ព្រលានយន្តហោះ នឹងក្លាយជាតំបន់អភិវឌ្ឍន៍រណប ភ្ជាប់ជាមួយក្រុងសែនមនោរម្យ។
លោកបណ្ឌិតបន្តថា “របៀងអេកូទេសចរណ៍ និងទេសចរណ៍ធម្មជាតិនៃដែនជម្រកសត្វព្រៃទាំង៥ រួមមាន ដែនជម្រកសត្វព្រៃភ្នំព្រេច ណាមលៀរ លំផាត់ កែវសីមា និងស្រែពក។ ចំណែក របៀងទេសចរណ៍វប្បធម៌ និងអេកូទេសចរណ៍ ស្ថិតនៅក្នុងតំបន់ប៊ូស្រា-ដាក់ដាំ”។
លោកជុក ជំនោរបានបញ្ជាក់បន្ថែមថា “ក្រៅពីនេះ តំបន់ប្រជុំជន នៃស្រុកកោះញែក នឹងមានសក្តានុពលក្នុងការរៀបចំ អភិវឌ្ឍន៍ជាមជ្ឈមណ្ឌលទេសចរណ៍នាពេលអនាគត។ ជាពិសេស តំបន់តាមច្រកព្រំដែន ដែលអនុញ្ញាតឱ្យមានការអភិវឌ្ឍជាតំបន់ទេសចរណ៍ផងដែរ”៕
