ដោយ ស៊ីវ ម៉េង
ភ្នំពេញ៖ ក្រុមហ៊ុនមកពីបណ្តាប្រទេសជាសមាជិកសហគមន៍អឺរ៉ុបចំនួន៥០០ កំពុងវិនិយោគនៅកម្ពុជា ហើយពួកគេអះអាងថា ក្រុមហ៊ុនរបស់ពួកគេកំពុងធ្វើការលើការទទួលខុសត្រូវផ្នែកសង្គម ខណៈភាពចម្រូងចម្រាស់ពីភាពអនុគ្រោះពន្ឋកំពុងបន្ត។
ចូលរួមនៅក្នុងវេទិការពិភាក្សាសាព័ត៌មាន ស្ដីពីធុរកិច្ច និងការទទួលខុសត្រូវផ្នែកសង្គមនៅថ្ងៃទី ១៨ ខែតុលានេះ បណ្តាថ្នាក់ដឹកនាំក្រុមហ៊ុនមានប្រភពពីសហភាពអឺរ៉ុបបានអះអាងថា ខ្លួននៅតែបន្តសកម្មភាពទំនួលខុសត្រូវខ្ពស់ក្នុងការបម្រើលើការទទួលខុសត្រូវផ្នែកសង្គម។
លោក ហ្សុង ហ្គេតុង ប្រធានគណៈកម្មាធិការសុខុមាលភាពនៃពាណិជ្ជកម្មអឺរ៉ុប និងជានាយកក្រុមហ៊ុន ហ្ស៊ូលីងហ្វាម៉ាប្រចាំកម្ពុជា បានលើកឡើងថា ទោះបីជាពេលនេះសហភាពអឺរ៉ុប និងប្រទេសកម្ពុជាកំពុងពិភាក្សាលើបញ្ហាប្រព័ន្ធអនុគ្រោះពន្ធ EBA ក្ដី តែក្រុមហ៊ុនរបស់លោកនៅតែបន្តសកម្មភាព ជួយដល់ការងារសង្គមសម្រាប់កម្ពុជា។ លោកបញ្ជាក់ថាសព្វថ្ងៃ ក្រុមហ៊ុនរបស់លោកបានផ្តោតលើការវិនិយោគផ្នែកសុខភាព ដើម្បីធានាថាឳសថដែលនាំចូលកម្ពុជា ជាឳសថពិតប្រាកដមានសុវត្ថិភាពខ្ពស់ និងការផ្ដល់ចំណេះដឹងលើការប្រើប្រាស់ថ្នាំជាដើម។
លោកបន្តថា “ក្រុមហ៊ុនរបស់លោក ក៏កំពុងសហការជាមួយដៃគូរដ្ឋាភិបាលកម្ពុជា ដើម្បីរួមគ្នាបង្កើត កម្មវិធីទូរស័ព្ទដើម្បីត្រួតពិនិត្យថ្នាំថាជាថ្នាំក្លែងក្លាយឬពិតប្រកដ ដើម្បីជាប្រយោជន៍រួមនៃប្រជាជនកម្ពុជា។លោកបន្តថា “កម្មវិធីទូរស័ព្ទនេះ នឹងធ្វើឡើងជាភាសាខ្មែរ និងអាចបង្ហាញវត្តមានជាផ្លូវការនៅក្នុងឆ្នាំ២០១៩ខាងមុខ។
ក្រុមហ៊ុនអឺរ៉ុបដែលកំពុងវិនិយោគនៅកម្ពុជា ភាគច្រើនវិនិយោគលើការបណ្ដុះបណ្ដាលមុខជំនាញ ការអប់រំ ផ្នែកសុខាភិបាល និងផ្នែកជាច្រើនទៀតផងដែរ។
ទោះជាយ៉ាងណាថ្នាក់ដឹកនាំក្រុមហ៊ុនទាំងនេះមិនបញ្ជាក់ទាក់ទងជំហរ សហគមន៍អឺរ៉ុបដែលកំពុងដំណើរការព្យួរប្រព័ន្ឋអនុគ្រោះពន្ឋលើទំនិញគ្រប់មុខពីកម្ពុជា លើកលែងតែអាវុធនោះទេ។
នាយកប្រតិបត្តិសភាពាណិជ្ជកម្មអឺរ៉ុបប្រចាំកម្ពុជា លោកគីលីយ៉ង់ ប្លេសបានថ្លែងថា ការដកប្រព័ន្ឋអនុគ្រោះពន្ឋពីកម្ពុជា មិនមែនជានីតិវិធីមួយ ដែលអាចប្រញាប់ប្រញាល់បានទេ លុះត្រាមានការជជែកគ្នាច្រើន មុនមានការសម្រេចដក ឬផ្អាកបណ្តោះអាសន្នលើប្រព័ន្ធអនុគ្រោះពន្ធ(EBA)នេះ៕
