ដោយៈសុខុម
ហូជីមិញ: ការផ្គត់ផ្គង់អាផាតម៉ិន ក្នុងទីផ្សារអចលនទ្រព្យក្រុងហូជីមិញ ប្រទេសវៀតណាម បានធ្លាក់ចុះក្នុងត្រីមាសទី១ ដើមឆ្នាំ២០២២។ នេះបើយោងតាមសារព័ត៌មាន Vietnam News ចុះផ្សាយកាលពីថ្ងៃច័ន្ទ ទី០២ ខែឧសភា។
យោងតាមរបាយការណ៍ របស់ទីភ្នាក់ងារអចលនទ្រព្យវៀតណាម Savills Việt Nam បានបង្ហាញថា ការផ្គត់ផ្គង់ក្នុងទីផ្សារដ៏សំខាន់នេះ គឺមានចំនួន៤.០៥០យូនីត ដោយធ្លាក់ចុះ៤៨% សម្រាប់ត្រីមាសធៀបនឹងត្រីមាស និងធ្លាក់ចុះ១៨%សម្រាប់ឆ្នាំធៀបនឹងឆ្នាំ ហើយគ្មានគម្រោងថ្មីៗចាប់ផ្ដើមនោះទេ។
គម្រោងអាផាតម៉ិនចំនួន២០ នៅក្នុងទីក្រុងនេះ បានបញ្ឈប់ការលក់ជាបណ្ដោះអាសន្ន ដើម្បីធ្វើការកែសម្រួលតម្លៃសម្រាប់ត្រីមាសទី២។
ចំនួនប្រតិបត្តិការទិញ លក់មានចំនួន៣.០២០ប្រតិបត្តិការ ដែលបង្ហាញពីការធ្លាក់ចុះ៤៦% សម្រាប់ត្រីមាសធៀបនឹងត្រីមាស ប៉ុន្តែបានកើនឡើង៤៥%សម្រាប់ឆ្នាំធៀបនឹងឆ្នាំ។
អាផាតម៉ិននៅតាមតំបន់ជាយក្រុង បានគ្របដណ្ដប់លើប្រតិបត្តិការទិញលក់ស្ទើរតែទាំងអស់ ដែលភាគច្រើននៅក្នុងសង្កាត់លេខ៩ និងសង្កាត់លេខ១២។
អាផាតម៉ិនកម្រិត C គ្របដណ្ដប់៨០% នៃប្រតិបត្តិការទិញលក់ ចំណែកឯអាផាតម៉ិនកម្រិតBគ្របដណ្ដប់២៣%។
របាយការណ៍ដដែលបង្ហាញថា ការផ្គត់ផ្គង់អាផាតម៉ិនកម្រិត A និងកម្រិត Bនៅមានកម្រិត ហើយមានតម្លៃខ្ពស់ ហើយត្រូវប្រកួតប្រជែងជាមួយអាផាតម៉ិនកម្រិត C ដែលជាស្តង់ដារគុណភាពកំពុងប្រសើរឡើង។
តម្លៃនៅក្នុងទីផ្សារដ៏សំខាន់នេះ បានហក់ឡើង៦% ដោយគម្រោងខ្លះដែលចាប់ផ្តើមដំណាក់កាលថ្មី បានដំឡើងថ្លៃ១០%។ របាយការណ៍ដដែលបញ្ជាក់ថា តម្លៃអាផាតម៉ិនគ្រប់កម្រិតនឹងបន្តហក់ឡើង៕ Vietnam News៕
