ដោយ: គង់ លាងហួរ
ភ្នំពេញ: ក្រុមហ៊ុនផលិតទំនិញវាយនភ័ណ្ឌ Panther Denim របស់ប្រទេសចិនបានប្តេជ្ញាចិត្តក្នុងការផ្តល់ជូននូវខោខូវប៊យដែលមានគុណភាពខ្ពស់សម្រាប់ទីផ្សារក្នុងស្រុករបស់ខ្លួន និងពង្រីកអាជីវកម្មមួយនេះទៅក្រៅប្រទេស។

បច្ចុប្បន្ន ក្រុមហ៊ុន Panther Denim មានសមត្ថភាពផលិតក្រណាត់អំបោះ ក្រណាត់ប៉ាក់ និងក្រណាត់បោះពុម្ពជាច្រើនក្នុងមួយឆ្នាំៗ និងមានបុគ្គលិកជាង២.០០០នាក់នៅទូទាំងពិភពលោក។

ជាមួយគ្នានោះ ក្រុមហ៊ុន Panther Denim គ្រោងឈានជើងចូលទីផ្សារកម្ពុជានៅចុងឆ្នាំ២០២៥នេះ តាមរយៈការបង្កើតរោងចក្រថ្មីមួយនៅជិតរាជធានីភ្នំពេញ ដោយផ្តោតលើការផលិតថាមពលកកើតឡើងវិញ និងការកែច្នៃកាកសំណល់ឡើងវិញ។

លោក Tim Huesemann នាយកផ្នែកលក់នៅក្រុមហ៊ុន Panther Denim បានចាត់ទុកគម្រោងបង្កើតរោងចក្រនៅកម្ពុជាថា ជារោងចក្រប្រកបដោយនិរន្តរភាពបំផុតមួយក្នុងចំណោមរោងចក្រនិរន្តរភាពផ្សេងទៀតរបស់ក្រុមហ៊ុន Panther Denim។

លោក Huesemann បានកត់សម្គាល់ថា “ការផ្គត់ផ្គង់កម្លាំងពលកម្មនៅប្រទេសកម្ពុជាមានស្ថិរភាពល្អប្រសើរ មិនដូចបណ្តាប្រទេសអាស៊ានមួយចំនួន ដែលកំពុងជួបប្រទះបញ្ហាកង្វះកម្លាំងពលកម្ម និងការកើនឡើងនូវថ្លៃដើមប្រតិបត្តិការ”។

លោកបានមានប្រសាសន៍ឱ្យដឹងបន្តថា “ប្រទេសកម្ពុជាមានសក្តានុពលដ៏ធំធេងសម្រាប់ការផលិតខោខូវប៊យ។ប្រតិបត្តិការរបស់យើងនៅក្នុងប្រទេសកម្ពុជានឹងមានភាពឯករាជ្យពីរោងចក្រនៅប្រទេសចិន ដោយធានាថា ផលិតកម្មដែលមានស្រាប់របស់យើងនឹងមិនរងផលប៉ះពាល់”។

កិច្ចព្រមព្រៀងពាណិជ្ជកម្មជាកត្តាដ៏សំខាន់មួយទៀត ដែលនាំឱ្យក្រុមហ៊ុន Panther Denim សម្រេចចិត្តឈានជើងចូលទីផ្សាររបស់កម្ពុជា។

កិច្ចព្រមព្រៀងទាំងនេះរួមមានដូចជា កិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដែលនឹងលើកកម្ពស់ការនាំចេញទំនិញរបស់កម្ពុជាទៅកាន់ទីផ្សារអាស៊ី។

ទន្ទឹមនឹងនោះ កិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូង នឹងកាត់បន្ថយ ឬលុបបំបាត់របាំងពន្ធគយលើការដោះដូរទំនិញរវាងប្រទេសទាំងពីរ ដោយជំរុញពាណិជ្ជកម្ម និងការវិនិយោគឱ្យកាន់តែរឹងមាំ។

លោក Huesemann បានបន្ថែមថា “ការពង្រីកខ្លួននៅក្នុងប្រទេសកម្ពុជាផ្តល់ឱ្យយើងនូវឱកាសដើម្បីទាញយកសក្តានុពលពីទីផ្សារ ដែលកំពុងរីកចម្រើន និងបន្តផ្តល់អាទិភាពដល់និរន្តរភាព និងការច្នៃប្រឌិតនៅលើគ្រប់ទិដ្ឋភាពអាជីវកម្មរបស់យើង”៕ប្រភព: Yahoo Finance៕

ដោយ: គង់ លាងហួរ
អន្តរជាតិ: គិតចាប់​តាំង​ពី​ចូល​កាន់​តំណែង​នៅ​ថ្ងៃ​ទី​២០ ខែ​មករា ឆ្នាំ២០២៥ រដ្ឋបាលលោកប្រធានាធិបតីអាមេរិក ដូណាល់ ត្រាំ បានដាក់ពន្ធគយទៅលើការនាំចូលទំនិញមកពីបណ្តាប្រទេសនានាជាច្រើនរាប់មិនអស់នៅទូទាំងពិភពលោក។

យោងតាមការចុះផ្សាយថ្មីចុងក្រោយរបស់កាសែត New York Times បានបង្ហាញថា សហរដ្ឋអាមេរិកបានដំឡើងពន្ធចំនួន២០ភាគរយលើការនាំចូលទំនិញទាំងអស់មកពីប្រទេសចិន ដែលបានចូលជាធរមាននៅថ្ងៃទី៤ ខែមីនា។

ជាមួយគ្នានេះ ទីក្រុងវ៉ាសុីនតោនបានដំឡើងពន្ធចំនួន២៥ភាគរយលើការនាំចូលទំនិញភាគច្រើនមកពីប្រទេសកាណាដា និងប្រទេសម៉ិកស៊ិក ដែលបានចូលជាធរមាននៅថ្ងៃទី៦ ខែមីនា។ទំនិញជាប់ពន្ធទាំងនោះមិនស្ថិតនៅក្រោមកតិកាសញ្ញាពាណិជ្ជកម្ម USMCA នោះទេ។

លើសពីនេះ បណ្តាប្រទេសទាំងអស់នៅលើពិភពលោក ដែលនាំចូលអាលុយមីញ៉ូម និងដែកទៅកាន់សហរដ្ឋអាមេរិកត្រូវបង់ពន្ធចំនួន២៥ភាគរយ ដែលបានចូលជា​ធរមាននៅថ្ងៃទី១២ ខែមីនា។

លោក ដូណាល់ ត្រាំ កាលពីពេលថ្មីៗនេះក៏បានគំរាមយកពន្ធចំនួន២០០% លើស្រា និងគ្រឿងស្រវឹងនាំចូលពីតំបន់អឺរ៉ុប ក្រោយប្លុកនេះគ្រោងដំឡើងពន្ធលើស្រាវីស្គី និងផលិតផលមួយចំនួនទៀតរបស់អាមេរិក នៅខែមេសា ដើម្បីឆ្លើយតបនឹងការដំឡើងពន្ធចំនួន២៥ភាគរយ របស់លោក ត្រាំ លើការនាំចូលដែកថែប និងអាលុយមីញ៉ូម។

ប្រទេសកាណាដា ដែលជាអ្នកផ្គត់ផ្គង់ដែកថែប និងអាលុយមីញ៉ូមដ៏ធំបំផុតទៅកាន់ អាមេរិកបានប្រកាសដំឡើងពន្ធចំនួន២៥% លើផលិតផលរបស់អាមេរិក ដូចជាផលិតផលលោហៈ កុំព្យូទ័រ សម្ភារៈកីឡា និងផលិតផលមួយចំនួនទៀត។

ជាមួយគ្នានេះ សហភាពអឺរ៉ុប ក៏បានប្រកាសដំឡើងពន្ធលើការនាំចូលម៉ូតូ សាច់គោ បសុបក្សី ផលិតផលស្រា និងខោខូវប៊យរបស់អាម៉េរិក ផងដែរ។

ដោយឡែក ប្រទេសចិនបាន​ដំឡើងពន្ធគយចន្លោះពី១០%ទៅ១៥% ចំពោះទំនិញកសិកម្ម​ និង​ផលនេសាទ​របស់អាមេរិក។

ជាក់ស្តែង ទំនិញ​កសិកម្ម​អាមេរិក ដូចជា សណ្តែក សាច់ជ្រូក សាច់គោ គ្រឿង​សមុទ្រ ផ្លែឈើ និង​បន្លែ ព្រមទាំង​ផលិតផល​ទំនិញ​ធ្វើ​ពី​ទឹកដោះ​សត្វ​ នឹងត្រូវបង់​ពន្ធចំនួន១០ភាគរយ។ ចំណែក ការនាំចូលសាច់មាន់ ស្រូវ​សាឡី ពោត និងកប្បាស ត្រូវបានគយ​ចិនដំឡើង​ពន្ធចំនួន១៥ភាគរយ។

តើគោលនយោបាយដំឡើងពន្ធរបស់លោក ដូណាល់ ត្រាំ បង្កការច្របូកច្របល់ដូចម្តេចដល់ពិភពលោក?។

មកទល់ពេលនេះ មិនទាន់មានការវាយតម្លៃណាមួយអំពីទំហំផលប៉ះពាល់គិតជាទឹកប្រាក់ ដែលបណ្តាលមកពីការដំឡើងពន្ធដាក់គ្នាទៅវិញទៅមកនេះនៅឡើយទេ។

អ្វីដែលគេអាចដឹងនៅពេលនេះត្រឹមថា ការកំណត់ពន្ធថ្មីនេះនឹងធ្វើឱ្យក្រុមហ៊ុនជាច្រើនប្រឈមមុខនឹងការខាតបង់ប្រាក់រាប់ពាន់លានដុល្លារ និងបង្កើតឱ្យមានភាពមិនច្បាស់លាស់បន្ថែមទៀតនៅក្នុងភាពជាដៃគូពាណិជ្ជកម្មសំខាន់ៗរបស់ពិភពលោក។

គោលនយោបាយពន្ធគយរបស់លោកប្រធានាធិបតី ត្រាំ បានធ្វើឱ្យអ្នកវិនិយោគមានការភ័យខ្លាចចំពោះវិបត្តិសេដ្ឋកិច្ច ដែលបានជំរុញឱ្យទីផ្សារភាគហ៊ុនអាមេរិក S&P 500 រងការខាតបង់អស់ទំហំទឹកប្រាក់ចំនួន៤ទ្រីលានដុល្លារកាលពីខែមុន ដោយសារការសម្រុកលក់ភាគហ៊ុនចេញ។

ជាមួយគ្នានេះ ទីភ្នាក់ងារវាយតម្លៃឥណទានខ្នាតយក្ស Moody’s បានព្យាករណ៍ថា កំណើនសេដ្ឋកិច្ចពិភពលោកនឹងថយចុះមកនៅត្រឹម២,៤ភាគរយក្នុងឆ្នាំ២០២៥ និងឆ្នាំ២០២៦។កំណើននេះមានការធ្លាក់ចុះបើធៀបនឹងអត្រាកំណើនសេដ្ឋកិច្ចសកលចំនួន២,៧ភាគរយក្នុងឆ្នាំ២០២៤។

ប្រទេសចិន ដែលជាមហាអំណាចសេដ្ឋកិច្ចធំជាងគេទី២របស់ពិភពលោក ត្រូវបានគេរំពឹងថា នឹងសម្រេចបានកំណើន GDP ត្រឹមតែ៤,២ភាគរយ នៅឆ្នាំ២០២៥ និង៣,៨ភាគរយ ក្នុងឆ្នាំ២០២៦ ដោយសារសម្ពាធនៃសង្រ្គាមពាណិជ្ជកម្ម នឹងធ្វើឱ្យគោលដៅកំណើនសេដ្ឋកិច្ចប្រកបដោយមហិច្ឆតារបស់ទីក្រុងប៉េកាំងក្នុងរង្វង់៥ភាគរយកាន់តែពិបាកក្នុងការសម្រេចបាន។

ទន្ទឹមនឹងនេះដែរ កំណើនសេដ្ឋកិច្ចនៅតំបន់អឺរ៉ុប និងប្រទេសជប៉ុននឹងមានសភាពប្រសើរឡើងបន្តិចបន្តួចប៉ុណ្ណោះ។

ចំណែក កំណើនផលទុនជាតិសរុបរបស់ប្រទេសឥណ្ឌានឹងរក្សាស្ថិរភាពក្នុងរង្វង់ត្រឹមតែ៦,៥ភាគរយក្នុងឆ្នាំ២០២៥ និងឆ្នាំ២០២៦ ដែលប្រហាក់ប្រហែលគ្នានឹងលទ្ធផលកាលពីឆ្នាំ២០២៤៕ប្រភព: Reuters & New York Times៕

ដោយៈ គង់ សូរិយា

    អន្តរជាតិៈ ប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី និងសមភាគីអាមេរិកលោក ដូណាល់ ត្រាំ នៅថ្ងៃទី១៩ ខែមីនា បានឯកភាពធ្វើការជាមួយគ្នា ដើម្បីបញ្ចប់សង្រ្គាមនៅអ៊ុយក្រែន ដែលបានអូសបន្លាយរយៈពេលជាង៣ឆ្នាំ។

ទន្ទឹមនេះ មន្រ្តីអាមេរិក និងអ៊ុយក្រែន អាចជួបគ្នានៅទឹកដីអារ៉ាប៊ីសាអូឌីតក្នុងពេលឆាប់ៗ។

បន្ទាប់ពីកិច្ចសន្ទនារវាងលោកដូណាល់ ត្រាំ ប្រធានាធិបតីអាមេរិក និងសមភាគីរុស្ស៊ី លោក វ្ល៉ាឌីមៀ ពូទីន ដែលបានឯកភាពបញ្ឈប់ការវាយប្រហារលើហេដ្ឋារចនាសម្ព័ន្ធថាមពល ប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី បានឯកភាពជាមួយលោក ត្រាំ ដើម្បីបញ្ចប់សង្រ្គាមនៅអ៊ុយក្រែន។

មន្រ្តីបច្ចេកទេសនៃប្រទេសទាំងពីរ នឹងជួបគ្នានៅទឹកដីអារ៉ាប៊ីសាអូឌីតក្នុងពេលឆាប់ៗខាងមុខ។

លោកហ្សេលេនស្គីបានបញ្ជាក់ថា “ជំហានដំបូងសម្រាប់ការបញ្ចប់សង្រ្គាមនៅអ៊ុយក្រែន គឺបញ្ឈប់ការវាយប្រហារលើហេដ្ឋារចនាសម្ព័ន្ធស៊ីវិល និងថាមពលផ្សេងទៀត”។

លោក ហ្សេលេនស្គី បានបញ្ជាក់បែបនេះ នៅថ្ងៃទី១៨ ខែមីនា ក្រោយកិច្ចសន្ទនា តាមទូរសព្ទជាមួយប្រធានាធិបតីអាមេរិក លោកដូណាល់ ត្រាំ ជុំវិញការឯកភាពបញ្ឈប់ការវាយប្រហារ លើហេដ្ឋារចនាសម្ព័ន្ធថាមពល ហើយទទួលបទឈប់បាញ់ សម្រាប់កងទ័ពជួរមុខ ដោយគ្មានលក្ខខណ្ឌ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។

លោកហ្សេលេនស្គី អ៊ុយក្រែន ត្រៀមខ្លួនជាស្រេច ក្នុងការអនុវត្តបទឈប់បាញ់។

កន្លងមក លោក វ្លាឌីមៀ ពូទីន បានលើកឡើងថា បទឈប់បាញ់ ត្រូវតែចរចាឱ្យហ្មត់ចត់ ដើម្បីបង្ការអ៊ុយក្រែន បំពាក់អាវុធឡើងវិញ។

នៅក្នុងកិច្ចសម្ភាសមួយជាមួយអ្នកសារព័ត៌មាន ក្នុងថ្ងៃទី១៩ ខែមីនា ដដែល ប្រធានាធិបតីអ៊ុយក្រែន បានអះអាងថា លោក ត្រាំ បានយល់ពីអ៊ុយក្រែន ហើយមិនទទួលស្គាល់ដែនដី ដែលរុស្ស៊ីគ្រប់គ្រងឡើយ។

បើទោះលោក ត្រាំ និងលោក ពូទីន បានយល់ព្រមបញ្ឈប់ការវាយប្រហារលើរោងចក្រថាមពលក្តី ពាក្យចោទប្រកាន់គ្នាទៅវិញទៅមកលើការវាយប្រហារបន្តមាន។

ទីក្រុងមូស្គូ បានការពារថា ខ្លួនបានផ្អាកគម្រោងវាយប្រហារលើហេដ្ឋារចនាសម្ព័ន្ធថាមពលអ៊ុយក្រែន និងបានកម្ទេចដ្រូនរបស់ខ្លួនចំនួន៧ថែមទៀត ខណៈអ៊ុយក្រែនបរាជ័យ លើការផ្អាកការវាយប្រហារតាមផែនការរបស់ខ្លួន។ ចំណែកលោក ហ្សេលេនស្គី បានចោទរុស្ស៊ី បន្តវាយប្រហារលើរោងចក្រអគ្គិសនីរបស់អ៊ុយក្រែន។

ទោះបីលោក ត្រាំ និងលោក ពូទីន បានយល់ព្រមបញ្ឈប់ការវាយប្រហារលើរោងចក្រថាមពលក្តី ពាក្យចោទប្រកាន់គ្នាទៅវិញទៅមកលើការវាយប្រហារបន្តមាន។

នៅថ្ងៃទី១៩ ខែមីនា អ៊ុយក្រែន និងរុស្ស៊ី ដែលមានការសម្របសម្រួលពីអេមីរ៉ាតអារ៉ាប់រួម បានដោះដូរអ្នកទោសសង្រ្គាមម្ខាងៗ ១៧៥នាក់ ហើយរុស្ស៊ីបានអះអាងថា ខ្លួនបានដោះលែងជនជាតិអ៊ុយក្រែនដែលរងរបួសចំនួន២២បន្ថែម ដើម្បីបង្ហាញពីកាយវិការដ៏ល្អរបស់ខ្លួន។ ការដោះលែងនេះ កើតមានក្រោយកិច្ចពិភាក្សារវាងលោក ត្រាំ និងលោកពូទីនតាមទូរសព្ទ។

មកទល់ពេលនេះ សង្រ្គាមនៅអ៊ុយក្រែន បានឈានចូលឆ្នាំទី៤ហើយ ដោយទាហាននិងប្រជាជនស៊ីវិលរ៉ាប់ម៉ឺននាក់ បានស្លាប់បាត់​បង់ជីវិត ហើយរងរបួស។ ដែនដីអ៊ុយក្រែន ប្រមាណ២០ភាគរយ ត្រូវបានរុស្ស៊ីគ្រប់គ្រង៕

ដោយៈ គង់ សូរិយា

    ភ្នំពេញៈ ប្រតិភូក្រុមហ៊ុនIKEA ដឹកនាំដោយលោក GIAFAR SAFAVERDI នាយកប្រតិបត្តិប្រចាំតំបន់អាស៊ីអាគ្នេយ៍ បានបង្ហាញបំណងមកវិនិយោគនៅកម្ពុជា។

    ព័ត៌មាននេះត្រូវបានលើកឡើងក្នុងឱកាស លោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានអនុញ្ញាត្តឲ្យថ្នាក់ដឹកនាំក្រុមហ៊ុននេះ នទទួលជួបពិភាក្សាការងារកាលពីថ្ងៃទី១៩ មិនា។

លោកអគ្គលេខាធិការបានស្វាគមន៍ គណៈប្រតិភូក្រុមហ៊ុនដែលបានអញ្ជើញមកកម្ពុជា ដើម្បីសិក្សាស្វែងយល់ពីបរិយាកាស និងសក្តានុពលវិនិយោគនៅកម្ពុជា។

លោកអគ្គលេខាធិការ បានជម្រាបជូនគណៈប្រតិភូដោយសង្ខេបអំពីគោលនយោបាយ ទាក់ទាញការវិនិយោគឯកជនរបស់កម្ពុជា របបនៃការលើកទឹកចិត្ត ដែលពោរពេញដោយភាពទាក់ទាញក្រោមច្បាប់ស្តីពីវិនិយោគបច្ចុប្បន្ន ប្រព្រឹត្តិកម្មស្មើភាពដោយគ្មានការរើសអើង និងវិធានការគាំទ្រនានា ដែលរាជរដ្ឋាភិបាលបានដាក់ចេញជាបន្តបន្ទាប់ដើម្បីធ្វើឱ្យបរិយាសវិនិយោគ និងធុរកិច្ចនៅកម្ពុជាកាន់តែប្រសើរឡើង បូករួមជាមួយកត្តាអំណោយផលផ្សេងៗទៀត។

ទន្ទឹមនឹងនេះ លោកជា វុទ្ឋី ក៏បានជំរុញលើកទឹកចិត្តដល់លោក GIAFAR SAFAVERDI តំណាងក្រុមហ៊ុនIKEA រួសរាន់ក្នុងការសម្រេចចិត្តបណ្តាក់ទុនវិនិយោគនៅកម្ពុជា ដើម្បីឆាប់ទទួលបានផលចំណេញ។

ជាការឆ្លើយតប លោកGIAFAR SAFAVERDI បានថ្លែងថា នេះជាលើកទី១ ដែលក្រុមហ៊ុនIKEA ចាប់ផ្តើមសម្លឹងមើលទីផ្សារវិនិ​យោគនៅកម្ពុជា ដើម្បីពង្រីកការវិនិយោគរបស់ខ្លួន។

ក្រុមហ៊ុន IKEA គឺជាក្រុមហ៊ុនវិនិយោគផលិតគ្រឿងសង្ហារិម និងសម្ភារៈប្រើប្រាស់ក្នុងផ្ទះដ៏ធំមួយ នៅក្នុងពិភពលោកដែលត្រូវបានបង្កើតឡើងតាំងពីឆ្នាំ១៩៤៣ នៅប្រទេសស៊ុយអ៊ែត។

នៅក្នុងឆ្នាំ២០២៤ ក្រុមហ៊ុន IKEA មានប្រាក់ចំណូលរហូតដល់ទៅប្រមាណ២៦,៥ពាន់លានអឺរ៉ូ ស្មើនឹងប្រមាណ២៩ពាន់លានដុល្លារអាម៉េរិក។ នៅក្នុងតំបន់អាស៊ីអាគ្នេយ៍ ក្រុមហ៊ុនIKEA បានមានសកម្មភាពវិនិយោគ ក្នុងប្រទេសមួយចំនួន ដូចជា សិង្ហបុរី ម៉ាឡេស៊ីឥណ្ឌូនេស៊ី ថៃ និងវៀតណាម៕

ដោយ: គង់ លាងហួរ
អន្តរជាតិ: ទីផ្សារអចលនទ្រព្យនៅតំបន់អាស៊ានកំពុងទទួលរងឥទ្ធិពលយ៉ាងខ្លាំងពីបញ្ហាសេដ្ឋកិច្ចក្នុងស្រុករបស់ប្រទេសចិន ដែលនាំឱ្យមានភាពមិនច្បាស់លាស់ចំពោះការប្តេជ្ញាផ្តល់មូលនិធិរបស់រដ្ឋាភិបាលចិនដល់គម្រោងកសាងហេដ្ឋារចនាសម្ព័ន្ធធំៗស្ថិតក្រោមគំនិតផ្តួចផ្តើមខ្សែក្រវ៉ាត់ និងផ្លូវ(BRI)។

ទីផ្សារអចលនទ្រព្យ ដែលពឹងផ្អែកលើ វិស័យទេសចរណ៍ បានទទួលរងផលប៉ះពាល់ខ្លាំងជាងគេ។ តួយ៉ាង ចំនួនភ្ញៀវទេសចរណ៍ចិនហូរចូលទៅកាន់ប្រទេសថៃបានធ្លាក់ចុះពី១២លាននាក់មុនផ្ទុះវិបត្តិជំងឺកូវីដ-១៩ មកនៅត្រឹមតែ៧លាននាក់ទៅ៨លាននាក់ប៉ុណ្ណោះនាពេលបច្ចុប្បន្ន។

វិស័យទេសចរណ៍ធ្លាប់បានចូលរួមចំណែកប្រមាណ១២ភាគរយដល់ទំហំផលទុនជាតិសរុប (GDP)របស់ប្រទេសថៃកាលពីឆ្នាំ២០២៣។

ការធ្លាក់ចុះយ៉ាងគំហុកនៃចំនួនភ្ញៀវទេសចរណ៍ចិនបានជះឥទ្ធិពលដោយផ្ទាល់ទៅលើអត្រាស្នាក់នៅសណ្ឋាគារ តម្រូវការលក់រាយ និងតម្លៃអចលនទ្រព្យនៅក្នុងគោលដៅទេសចរណ៍សំខាន់ៗរបស់ប្រទេសថៃ។

គំនិតផ្តួចផ្តើមខ្សែក្រវ៉ាត់ និងផ្លូវ (BRI) របស់រដ្ឋាភិបាលចិន ដែលធ្លាប់ជាកម្លាំងចលករដ៏សំខាន់នៃការអភិវឌ្ឍន៍អចលនទ្រព្យនៅទូទាំងតំបន់អាស៊ាន បានប្រឈមមុខនឹងការត្រួតពិនិត្យថ្មី ស្របពេលដែលការព្រួយបារម្ភអំពីនិរន្តរភាពបំណុលមានការកើនឡើង។

តួយ៉ាង ស្ថានភាពរបស់ប្រទេសឡាវ អាចត្រូវបានគេចាត់ទុកថា ជាឧទាហរណ៍មួយ ដែលគួរពិចារណាដោយប្រុងប្រយ័ត្ន ខណៈប្រាក់កម្ចីមកពីប្រទេសចិនបានគ្របដណ្តប់ចំណែកជិត៥០ភាគរយនៃទំហំបំណុលបរទេសសរុបប្រមាណ១០,៥ពាន់លានដុល្លាររបស់ប្រទេសឡាវ។

ទីផ្សារអចលនទ្រព្យរបស់តំបន់អាស៊ាន កំពុងសម្របខ្លួនទៅនឹងបរិបទថ្មីទាំងនេះ ខណៈបណ្តាប្រទេសសមាជិកអាស៊ានមួយចំនួនបានព្យាយាមធ្វើពិពិធកម្មប្រភពនៃការវិនិយោគផ្ទាល់ពីបរទេសហូរចូលទៅកាន់ប្រទេសរបស់ពួកគេរៀងៗខ្លួន។

ជាក់ស្តែង ប្រទេសវៀតណាមបានបង្កើនទំនាក់ទំនងរបស់ខ្លួនជាមួយសហរដ្ឋអាមេរិក និងឈានទៅសម្រេចបាននូវភាពជាដៃគូយុទ្ធសាស្ត្រគ្រប់ជ្រុងជ្រោយជាមួយទីក្រុងវ៉ាសុីនតោន។នេះជាយុទ្ធសាស្ត្រមួយរបស់ទីក្រុងហាណូយ ក្នុងការកាត់បន្ថយការពឹងផ្អែកខ្លាំងពេកលើលំហូរដើមទុនវិនិយោគពីប្រទេសចិន។

ឥណ្ឌូនេស៊ី ដែលជាប្រទេសមានទំហំសេដ្ឋកិច្ចធំជាងគេលេខ១ក្នុងតំបន់អាស៊ានបានប្រឈមមុខជាមួយនឹងបញ្ហានៅក្នុងទីផ្សារអចលនទ្រព្យ ដោយសារការកាត់បន្ថយការនាំចូលទំនិញទៅកាន់ប្រទេសចិនបានជះផលប៉ះពាល់ដល់កំណើនសេដ្ឋកិច្ចឥណ្ឌូនេសុី ខណៈការកើនឡើងនៃការប្រកួតប្រជែងផ្នែកពាណិជ្ជកម្មបានបង្កការរាំងស្ទះដល់លំហូរទុនវិនិយោគ។

ឆ្លើយតបនឹងបញ្ហានេះ បណ្តាក្រុមហ៊ុនអភិវឌ្ឍន៍អចលនទ្រព្យរបស់ប្រទេសឥណ្ឌូនេសុី និងអ្នកវិនិយោគកំពុងព្យាយាមស្វែងរកប្រភពមូលនិធិថ្មីជំនួស និងឆក់យកឱកាសទីផ្សារយ៉ាងសកម្ម។

ចំណែក វិស័យអចលនទ្រព្យរបស់ម៉ាឡេស៊ី រក្សាបាននូវលំនឹងយ៉ាងល្អប្រសើរ ព្រោះម៉ាឡេស៊ីបានធ្វើការបត់បែនយុទ្ធសាស្ត្ររបស់ខ្លួនឱ្យទាន់សភាពការណ៍ពិភពលោក។

ស្របពេលជាមួយគ្នានោះ ប្រទេសម៉ាឡេសុីបានរក្សានូវលក្ខខណ្ឌនៃការវិនិយោគដ៏ទាក់ទាញសម្រាប់បណ្តាអ្នកវិនិយោគអន្តរជាតិមកពីជុំវិញពិភពលោក៕ប្រភព: Evrimagaci.org៕