ដោយៈ គង់ សូរិយា

    ភ្នំពេញៈ ទីផ្សារអចលនវត្ថុកម្ពុជា ពិតជាមានសញ្ញាប្រសើរឡើង នៅឆ្នាំនេះ បើធៀបនឹងឆ្នាំ២០២៤ ប៉ុន្តែសួរថាតើវាកំរើកឡើងវិញក្នុងចរន្តទីផ្សារបែបណា ជាអ្វីដែលយើងគួរស្វែងយល់បន្ថែមទៀត។

    អគ្គនាយិកាក្រុមហ៊ុនAMATAK Property Service Co, Ltdលោកស្រីតាំង ហួរបានលើកឡើងកាលពីដើមសប្តាហ៍នេះថា ស្ថានភាពទីផ្សារឆ្នាំនេះ តម្រូវការអចលនទ្រព្យនៅតែមានតម្រូវការទិញ ដូរ តែមិនច្រើនដូចមុនវិបត្តិកូវីដ១៩ ដោយនៅជាយក្រុងអ្នកទិញ គឺទិញ សម្រា​ប់សាងសង់រោងចក្រ សហគ្រាសនានា ប៉ុន្តែក្នុងក្រុងគឺទិញសម្រាប់សាងសង់អ្វីមួយ។

    លោកស្រីបញ្ជាក់ថា “យ៉ាងណាការទិញភាគច្រើនលើសលប់ គឺអ្នកទិញស្វែងរកអចលនទ្រព្យ ដែលមានតម្លៃទាបជាងទីផ្សារច្រើន”។ លោកស្រីបន្តថា “យ៉ាងណាអចលនទ្រព្យមិនជាប់គាំងទេ គឺស្ថានភាពនៅតែលក់បាន គ្រាន់តែតម្រូវការនៅមានចំនួនតិច”។

    យោងតាមការព្យាករណ៍របស់ធនាគារជាតិនៃកម្ពុជា បានបង្ហាញថា ទីផ្សារអចលនទ្រព្យកម្ពុជាឆ្នាំនេះ អាចងើបឡើងវិញក្នុងកំណើនជាង៦ភាគរយ ធៀបនឹងឆ្នាំ២០២៤។

    លោកស្រីតាំង ហួរបានបន្តថា ជាមួយគ្នានេះ ការលក់លំនៅដ្ឋាននៅតាមបុរីនានានៅតែលក់បានបណ្តើរៗ បន្ទាប់ពីសម្តេចធិបតី ជួយសម្រូលលើការមិនបង់ពន្ឋប្រថាប់ត្រា សម្រាប់ផ្ទះមានតម្លៃចាប់ពី៧ម៉ឺនដុល្លារចុះ និងមិនយកពន្ឋប្រថាប់ត្រា សម្រាប់អ្នកទិញផ្ទះដំបូង ដែលមានតម្លៃចាប់ពី២១ម៉ឺនដុល្លារចុះផងដែរ។

    ជាមួយគ្នានេះ លោកប៉ូ អ៊ាវគង់ នាយកក្រុមហ៊ុនAdvance Real Estate បានមានប្រសាសន៍ឲ្យដឹងផងដែរថា ស្ថានភាពទីផ្សារគឺដូចជាមិនទាន់ មានអ្វីប្រែប្រួលច្រើននៅឡើយទេ ប៉ុន្តែការប្រើប្រាស់ដីសម្រាប់តំបន់ឧស្សាហកម្មបានកើនឡើង ប៉ុន្តែមិនមានសញ្ញាជាដុំកំភួនច្រើននោះទេ។

    លោកបន្តថា ជាមួយគ្នានេះ តម្រូវការទីតាំងអាជីវកម្ម និងការលក់រាយនៅតាមតំបន់នានា បានកើនឡើងគួរឲ្យកត់សម្គាល់ទាំងនៅតាមផ្សារ និងនៅតាមតំបន់ផ្លូវពាណិជ្ជកម្មនានា។

    លើសពីនេះ លោកស៊ា ឆៃលីនអគ្គនាយកក្រុមហ៊ុនឆៃលីន ស៊ា រៀលធីបានមានប្រសាសន៍ឲ្យដឹងផងដែរថា ការទិញ លក់អចលនទ្រព្យនៅតែដំណើរការយឺតៗ មិនមានសញ្ញាប្រែប្រួលច្រើននៅឡើយទេ ប៉ុន្តែយ៉ាងណាស្ថានភាព ពិតជាមានភាពប្រសើរជាងឆ្នាំ២០២៤កន្លងមកនេះ៕

ដោយៈ គង់ សូរិយា

    ភ្នំពេញៈ ជាអ្នកអភិវឌ្ឍន៍មួយរូប និងតែងតែតាមដាននិន្នាការទីផ្សារ អ្នកឧកញ៉ាសំ សុខនឿន ប្រធានក្រុមប្រឹក្សាភិបាលក្រុមហ៊ុនSAM SN Groupបានលើកឡើងថា ស្ថានភាពទីផ្សារលំនៅដ្ឋានតម្លៃសមរម្យ នឹងងើបឡើងវិញខ្លាំងនៅឆ្នាំ២០២៥នេះ។

អ្នកឧកញ៉ាបានមានប្រសាសន៍ឲ្យដឹងកាលពីសប្តាហ៍មុនថា ឆ្លើយតបនឹងគោលនយោបាយ សាងសង់លំនៅដ្ឋានតម្លៃសមរម្យ ដើម្បីឲ្យពលរដ្ឋមានលំនៅដ្ឋានសមរម្យរស់នៅ ក្រសួងរៀបចំដែនដី នគរូបនីយកម្ម និងសំណង់ ក្រោមការដឹកនាំរបស់លោកឧបនាយករដ្ឋមន្រ្តីសាយ សំអាល់ បានសហការជាមួយអ្នកឧកញ៉ាហុង ពីវ សាងសង់លំនៅដ្ឋានសហកម្មសិទ្ឋលក់ជូនប្រជាពលរដ្ឋ ដែលពួកគាត់អាចមានលទ្ឋភាពបង់បាន និងរស់នៅសមរម្យ។

អ្នកឧកញ៉ាបានបន្តថា “គំរោងបែបនេះនឹងទទួលបានជោគជ័យ ដោយ​សារអ្នកឧកញ៉ាហុង ពីវមានធនធានគ្រប់គ្រាន់ ហើយការសាងសង់របស់គាត់ក៏ចំណេញ​ ប៉ុន្តែចំណេញតិច”។ អ្នកឧកញ៉ាបន្តថា “បើគាត់សាងសង់ចប់ ហើយគាត់មានលទ្ឋភាពបែបនេះ គឺដឹងតែលក់ដាច់ហើយ ព្រោះប្រជាពលរដ្ឋអាចបង់ប្រចាំខែ តែជាង១០០ដុល្លារអាមេរិកប៉ុណ្ណោះ”។

អ្នកឧកញ៉ាសំ សុខនឿនបានបន្តថា នៅពេលការសាងសង់ទទួលបានជោគជ័យ លោកគិតថាអ្នកអភិវឌ្ឈន៍ធំៗដទៃទៀត នឹងចាប់ផ្តើម​សាងសង់កំនៅដ្ឋានតម្លៃសមរម្យ សម្រាប់លក់ជូនប្រជាពលរដ្ឋផងដែរ ហើយចរន្តទីផ្សារលំនៅដ្ឋានបែបនេះនឹងងើបឡើង ដែលវាផ្តល់ផលប្រយោជន៍ដល់សេដ្ឋកិច្ច សង្គម និងជួយសង្គមជាតិឲ្យកាន់តែមានភាពសុខដុម ដែលស្របតាមគោលនយោបាយរបស់រាជរដ្ឋាភិបាល ក្នុងការនាំប្រទេស ឆ្ពោះទៅឋានៈជាប្រទេសមានប្រាក់ចំណូល មធ្យមកម្រិតខ្ពស់នៅឆ្នាំ២០៣០ និងប្រទេសមានប្រាក់ចំណូលខ្ពស់ នៅឆ្នាំ២០៥០ខាងមុខ៕

ដោយ: គង់ លាងហួរ
ភ្នំពេញ: យោងតាមអ្នកជំនាញមួយរូបបានលើកឡើងថា ទិដ្ឋភាពរបស់ទីផ្សារអចលនទ្រព្យនៅកម្ពុជានៅក្នុងឆ្នាំ២០២៥នេះ នឹងមានការប្រែប្រួល ដោយសារការយល់ដឹងកាន់តែច្រើនឡើងអំពីនិរន្តរភាព និងការសាងសង់ប្រកបដោយភាពច្នៃប្រឌិត។

លោកបណ្ឌិត Alexander Evengroen នាយកប្រតិបត្តិក្រុមហ៊ុន ASEAN Realtor Inc. បានលើកឡើងថា ការបង្កើតរមណីយដ្ឋានអេកូទេសចរណ៍ប្រកបដោយនិរន្តរភាពនៅតាមបណ្តោយឆ្នេរសមុទ្រដ៏ស្រស់ស្អាតនៅប្រទេសកម្ពុជា ជាផ្លូវដ៏សំខាន់មួយឆ្ពោះទៅកាន់ភាពជោគជ័យនៃការអភិវឌ្ឍន៍អចលនទ្រព្យប្រកបដោយភាពច្នៃប្រឌិត។

ស្របពេលដែលវិស័យទេសចរណ៍របស់កម្ពុជាមានសន្ទុះងើបឡើងវិញ តម្រូវការក្នុងការស្វែងរកទីតាំងស្នាក់នៅ ដែលមិនជះផលប៉ះពាល់ដល់បរិស្ថានកំពុងកើនឡើង។

នៅក្នុងតំបន់ទីក្រុង ការប្រើប្រាស់សម្ភារៈសំណង់ និងបច្ចេកវិទ្យាបៃតងមានសារៈសំខាន់ណាស់សម្រាប់ការជំរុញការអភិវឌ្ឍន៍ប្រកបដោយចីរភាព។តាមរយៈការប្រើប្រាស់សម្ភារៈដែលមានប្រភពក្នុងស្រុក និងបច្ចេកទេសសំណង់ប្រកបដោយភាពច្នៃប្រឌិត អ្នកអភិវឌ្ឍន៍អាចកាត់បន្ថយការប្រើប្រាស់ថាមពល
និងបញ្ចេញកាបូនតិចជាងមុន។

តើកត្តានិរន្តរភាពមានសារៈសំខាន់យ៉ាងដូចម្តេចក្នុងការជំរុញការអភិវឌ្ឍន៍ទីផ្សារអចលនទ្រព្យ?។

និរន្តរភាពក្នុងការអភិវឌ្ឍន៍ទីផ្សារអចលនទ្រព្យជាកត្តារួមចំណែកយ៉ាងសំខាន់ក្នុងការធានាបានថា ការរីកចម្រើនរបស់ប្រទេសកម្ពុជាមានទិសដៅស្របទៅតាមការថែរក្សាបរិស្ថាន និងទំនួលខុសត្រូវចំពោះសង្គម។

ក្នុងន័យនេះ លោកបណ្ឌិត Alexander Evengroen បានគូសបញ្ជាក់ថា ការគិតគូរអំពីនិរន្តរភាពទៅក្នុងគម្រោងអចលនទ្រព្យអាចជំរុញលទ្ធភាពសេដ្ឋកិច្ចរយៈពេលវែង និងដោះស្រាយបញ្ហាសំខាន់ៗ ដូចជា ការប្រែប្រួលអាកាសធាតុ និងការថយចុះនៃធនធាន។

តាមរយៈការផ្តល់អាទិភាពដល់និរន្តរភាព អ្នកអភិវឌ្ឍន៍មិនត្រឹមតែអាចបង្កើនភាពធន់នៃគម្រោងអចលនទ្រព្យរបស់ខ្លួនប៉ុណ្ណោះទេ។ ប៉ុន្តែ វាថែមទាំងបំពេញតាមតម្រូវការរបស់វិនិយោគិន ដែលគិតគូរដល់បរិស្ថានផងដែរ។ ការណ៍នេះ​ស្រប​នឹង​ការ​ផ្លាស់​ប្តូរ​ជា​សកល​ឆ្ពោះ​ទៅ​រក​និរន្តរភាពបៃតង។

តើទីផ្សារអចលនទ្រព្យរបស់កម្ពុជាមានចំណុចពិសេសអ្វីខ្លះ បើប្រៀបធៀបជាមួយប្រទេសផ្សេងទៀតក្នុងតំបន់អាស៊ាន?។

ការរីកចម្រើននៃរមណីយដ្ឋានអេកូទេសចរណ៍ ជាពិសេសនៅតាមតំបន់ឆ្នេរដ៏ស្រស់ស្អាតរបស់កម្ពុជា ជាចំណុចដ៏លេចធ្លោមួយនៅក្នុងតំបន់អាស៊ាន។

បណ្តាប្រទេសជិតខាងរបស់កម្ពុជា ដូចជាប្រទេសថៃ និងប្រទេសវៀតណាមបានបង្កើតរមណីយដ្ឋានអេកូទេសចរណ៍ដ៏លេចធ្លោជាច្រើនរួចទៅហើយ។ ប៉ុន្តែ តំបន់ឆ្នេរសមុទ្រនានានៅកម្ពុជាមិនទាន់ត្រូវបានទាញយកសក្តានុពលនៅឡើយ។

ដូច្នេះ តាមរយៈការបណ្តាក់ទុនវិនិយោគលើរមណីយដ្ឋានអេកូទេសចរណ៍ បណ្តាអ្នកអភិវឌ្ឍន៍អចលនទ្រព្យនឹងអាចបង្កើតបានបទពិសោធន៍ពិសេស ដែលមិនត្រឹមតែរក្សានិរន្តរភាពផ្នែកបរិស្ថានប៉ុណ្ណោះទេ។ ប៉ុន្តែ វាថែមទាំងបង្កើនការយល់ដឹងអំពីវប្បធម៌សម្រាប់ទាក់ទាញភ្ញៀវទេសចរណ៍ក្នុងស្រុក និងអន្តរជាតិផងដែរ។

លោកបណ្ឌិត Alexander Evengroen បានអះអាងឱ្យដឹងទៀតថា ការប្រើប្រាស់សម្ភារៈសំណង់ និងបច្ចេកទេសបៃតង ជាមូលដ្ឋានគ្រឹះសម្រាប់អនាគតនៃការអភិវឌ្ឍន៍ទីក្រុងនៅកម្ពុជា។

ជាមួយគ្នានេះ ការផ្តោតការយកចិត្តទុកដាក់របស់កម្ពុជាលើសម្ភារៈដែលមានប្រភពក្នុងស្រុក និងបច្ចេកវិទ្យាដែលមិនប៉ះពាល់ដល់បរិស្ថាន អាចធ្វើឱ្យកម្ពុជាមានចំណុចពិសេស ស្របពេលដែលបណ្តាប្រទេសអាស៊ានជាច្រើនកំពុងងាកមកប្រើប្រាស់សម្ភារៈសំណង់ប្រកបដោយនិរន្តរភាព។

តួយ៉ាង ការប្រើប្រាស់ឬស្សី ដីឥដ្ឋ និងធនធានអាចកកើតឡើងវិញផ្សេងទៀតមិនត្រឹមតែកាត់បន្ថយឧស្ម័នកាបូនិកប៉ុណ្ណោះទេ។ ប៉ុន្តែ វាថែមទាំងជួយជំរុញដល់កំណើនសេដ្ឋកិច្ចក្នុងស្រុកផងដែរ។

តាមរយៈការផ្តល់អាទិភាពដល់សម្ភារៈសំណង់ទាំងនេះ អ្នកអភិវឌ្ឍន៍នៅកម្ពុជាអាចដើរឈានមុខគេនៅក្នុងការកសាងវិស័យសំណង់ប្រកបដោយនិរន្តរភាព និងភាពច្នៃប្រឌិត។

ម៉្យាងវិញទៀត ការប្រើប្រាស់ថាមពលកកើតឡើងវិញកាន់តែមានសារៈសំខាន់ក្នុងការអភិវឌ្ឍន៍ទីផ្សារអចលនទ្រព្យ ហើយកម្ពុជាមានឱកាសប្រើប្រាស់ធនធានធម្មជាតិដ៏សម្បូរបែបរបស់ខ្លួន។

បណ្តាប្រទេសអាស៊ានដូចជាប្រទេសឥណ្ឌូនេស៊ី និងប្រទេសហ្វីលីពីនកំពុងបោះជំហានទៅមុខក្នុងការធ្វើសមាហរណកម្មលើផ្នែកថាមពលកកើតឡើងវិញ។ កម្ពុជាអាចទាញយកផលប្រយោជន៍ពីសក្តានុពលនៃថាមពលពន្លឺព្រះអាទិត្យ និងទំនប់វារីអគ្គិសនី ដើម្បីផ្តល់ថាមពលដល់គម្រោងអភិវឌ្ឍន៍អចលនទ្រព្យថ្មីៗ។

តាមរយៈការដាក់បញ្ចូលបន្ទះស្រូបពន្លឺព្រះអាទិត្យ និងប្រព័ន្ធសន្សំសំចៃថាមពលទៅក្នុងគម្រោងលំនៅដ្ឋាន និងអគារពាណិជ្ជកម្ម កម្ពុជាអាចកាត់បន្ថយការពឹងផ្អែកលើឥន្ធនៈហ្វូស៊ីល និងលើកកម្ពស់វិស័យថាមពលប្រកបដោយនិរន្តរភាព។ ការណ៍នេះស្របតាមនិន្នាការរបស់ពិភពលោកឆ្ពោះទៅរកប្រភពថាមពលកកើតឡើងវិញ។

លើសពីនេះ ការប្រើប្រាស់បច្ចេកវិទ្យា Smart Home និង IoT ក្នុងគម្រោងលំនៅដ្ឋាន ជាកត្តាមួយផ្សេងទៀត ដែលអាចធ្វើឱ្យកម្ពុជាក្លាយជាប្រទេសឈានមុខគេមួយក្នុងតំបន់អាស៊ាន។

ខណៈប្រទេសសិង្ហបុរីឈរនៅជួរមុខគេក្នុងការបង្កើតគំនិតផ្តួចផ្តើមទីក្រុងឆ្លាតវៃ កម្ពុជាអាចបំពេញតម្រូវការក្នុងស្រុក ដូចជាប្រសិទ្ធភាពថាមពល ការអភិរក្សទឹក និងការគ្រប់គ្រងកាកសំណល់ដោយប្រើប្រាស់បច្ចេកវិទ្យា Smart Home និង IoT ជាដើម៕ប្រភព: Linkedin៕