ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនាព្រឹកថ្ងៃព្រហស្បតិ៍នេះ ខណៈប្រាក់ដុល្លារអាមេរិកបានធ្លាក់ថ្លៃចុះ ដោយសារគោលនយោបាយពន្ធគយពាណិជ្ជកម្មរបស់សហរដ្ឋអាមេរិកបន្តស្ថិតក្នុងភាពមិនប្រាកដប្រជា។

តួយ៉ាង តម្លៃមាស Spot Gold បានងើបឡើង០,៤៦ភាគរយដល់៣.០៣៣ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,៤៩ភាគរយដល់៣០៣៧,៤០ដុល្លារក្នុងមួយអោនគិតត្រឹមម៉ោង១១:០១នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៦២,៣ភាគរយ ដែលធនាគារកណ្តាលអាមេរិក (Fed) នឹងអាចទម្លាក់អត្រាការប្រាក់ចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៨ ខែមិថុនាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះមកនៅត្រឹម១០៤,៣៩ពិន្ទុនាព្រឹកថ្ងៃព្រហស្បតិ៍នេះ បន្ទាប់ពីបានបិទការជួញដូរត្រឹម១០៤,៥៥ពិន្ទុកាលពីថ្ងៃពុធម្សិលមិញ។

ចំណែក តម្លៃលោហៈធាតុប្រាក់ Spot silver បានងើបឡើង០,២៩ភាគរយដល់៣៤,៣២ដុល្លារក្នុងមួយអោន ខណៈតម្លៃផ្លាទីនបានងើបឡើង០,០៣ភាគរយដល់៩៨៥ដុល្លារក្នុងមួយអោន ហើយតម្លៃ palladium បានធ្លាក់ចុះ០,៤៧ភាគរយដល់៩៧០ដុល្លារក្នុងមួយអោនគិតត្រឹមម៉ោង១១:០២នាទីព្រឹក៕

ដោយៈ និស្ស័យ

    ព្រះសីហនុៈ ក្រុមប្រឹក្សាអភិវឌ្ឍន៍កម្ពុជា បានះអនុម័តជាផ្លូវការនូវគំរោងបង្កើតរោងចក្រកែច្នៃឈើ ដាំដុះក្នុងស្រុកជាផ្កូវការហើយ។

    ការអនុម័តនេះធ្វើឡើងក្នុងកិច្ចប្រជុំ ដែលដឹកនាំដោយលោកជា វុទ្ឋីអគ្គលេខាធិការក្រុមប្រឹក្សាអភិវឌ្ឍន៍កម្ពុជា(CDC) និង​លោក ឡុង ឌីម៉ង់ អភិបាលរង នៃគណៈអភិបាលខេត្តព្រះសីហនុ ព្រមទាំងមន្រ្តីពាក់ព័ន្ឋ។

ទីតាំងរោងចក្រកែច្នៃឈើដាំដុះក្នុងស្រុក នៅក្នុងភូមិសាស្ត្រ ភូមិពូធឿង សង្កាត់បិតត្រាង ក្រុងកំពង់សោម ខេត្តព្រះសីហនុ។

កិច្ចប្រជុំនេះរៀបចំឡើងក្នុងគោលបំណង ដើម្បីបើកកិច្ចពិភាក្សា វាយតម្លៃ ភាពសមស្រប លក្ខណៈសម្បត្តិ វេទយិតភាព និងពិនិត្យលទ្ធភាព នៃគម្រោងដែលបានដាក់ស្នើមក ក.អ.ក។

គម្រោងរោងចក្រកែច្នៃឈើដាំដុះក្នុងស្រុកនេះ នៅពេលដាក់ដំណើរការពេញលេញរោងចក្រ នឹងត្រូវការកម្លាំងពលកម្មសរុប ប្រមា​ណ១៧០នាក់ ហើយមានគោលដៅនាំចេញ៩០% និងផ្គត់ផ្គង់តម្រូវការក្នុងស្រុក១០%។

ជាលទ្ធផលបឋម សំណើសុំវិនិយោគបង្កើតរោងចក្រកែច្នៃឈើដាំដុះក្នុងស្រុកនេះ ទទួលបានការឯកភាពជាគោលការណ៍ ផ្តល់ការលើកទឹកចិត្តពីអង្គប្រជុំ៕

ដោយៈ ម៉ាណា

ភ្នំពេញៈ លោកស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា(ក.អ.ក.) និងលោកស្រី Bridgette L. Walker ភារធារីស្ថានទូតសហរដ្ឋអាមេរិក ប្រចាំកម្ពុជា បានអញ្ជើញដឹកនាំកិច្ចសន្ទនាលើកទី២ រវាងរដ្ឋនិងវិស័យឯកជន កម្ពុជា-អាមេរិក។

កិច្ចប្រជុំនេះ មានការចូលរួមពីតំណាងក្រសួង ស្ថាប័នពាក់ព័ន្ធ ប្រធានសភាពាណិជ្ជកម្មអាមេរិកប្រចាំនៅកម្ពុជា (AmCham Cambodia​), ក្រុមប្រឹក្សាធុរកិច្ចសហរដ្ឋអាម៉េរិក-អាស៊ាន (US-ABC), វិស័យឯកជន និងមន្ត្រីជំនាញជាច្រើនរូប។

កិច្ចសន្ទនាលើកទី២ រវាងរដ្ឋនិងវិស័យឯកជនកម្ពុជា -អាមេរិក នារសៀលនេះ បានប្រព្រឹត្តទៅដោយរលូន តាមរបៀបវារៈដែលបានគ្រោងទុក ដោយបានលើកយកប្រធានបទជាអាទិភាព មកពិភាក្សាយ៉ាងផុសផុលជុំវិញបរិយាកាសវិនិយោគ និងការធ្វើធុរកិច្ចនៅកម្ពុជា រួមមានជាអាទិ៍៖ (១)បទប្បញ្ញត្តិ និងបទដ្ឋានគតិយុត្តពាក់ព័ន្ធ(២)កត្តាជំរុញលើកកម្ពស់លទ្ធភាព ក្នុងការចូលមកកាន់ទីផ្សារកម្ពុជាពីសំណាក់ការវិនិយោគ និងធុរកិច្ចពីសហរដ្ឋអាម៉េរិក(៣) នីតិវិធីពាក់ព័ន្ធ និងកិច្ចសម្របសម្រួលវិនិយោគនានា និងបញ្ហាផ្សេងៗ។

លោកឧបនាយករដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅជូនចំពោះវត្តមានរបស់ លោកស្រីភារធារីស្ថានទូតសហរដ្ឋអាម៉េរិកប្រចាំកម្ពុជា តំណាងក្រសួងស្ថាប័ន តំណាងវិស័យឯកជនអាម៉េរិក ដែលបានអញ្ជើញ ចូលរួមយ៉ាងកុះករនាឱកាសនេះ និងបានថ្លែងអំណរគុណ ជូនចំពោះវិនិយោគិនអាម៉េរិកទាំងអស់ ដែលបានសម្រេចចិត្តដាក់ទុនវិនិយោគនៅកម្ពុជា និងពង្រីកប្រតិបត្តិការធុរកិច្ច ក៏ដូចជាទំហំវិនិយោគរបស់ខ្លួនជាបន្តបន្ទាប់។

លោកឧបនាយករដ្ឋមន្ត្រី ក៏បានជម្រាបជូនអំពីកំណើននៃគម្រោងវិនិយោគដែលគួរឱ្យកត់សម្គាល់ ពិសេសគឺការបំបែកកំណត់ត្រារបស់ ក.អ.ក. ដែលសម្រេចបាននូវការអនុម័យគម្រោងចំនួន៤១៤ ក្នុងឆ្នាំ២០២៤។

តួលេខនេះ ជាសក្ខីភាពស្តែងឱ្យឃើញពីប្រសិទ្ធភាព នៃច្បាប់ស្តីពីវិនិយោគនៃព្រះរាជាណាចក្រកម្ពុជា ក៏ដូចជាគោលនយោបាយនានារបស់រាជរដ្ឋាភិបាល ក្នុងថែទាំគាំទ្រកិច្ចការវិនិយោគ ពីវិស័យឯកជន ដោយបានចាត់ទុកវិស័យនេះ ជាម៉ាស៊ីនដ៏សំខាន់ក្នុងការជំរុញកំណើនសេដ្ឋកិច្ចជាតិ។

លោកស៊ុន ចាន់ថុលបានលើកឡើងអំពីការអនុវត្តឌីជីលូបនីយកម្មនៅ ក.អ.ក. តាមរយៈការដាក់ឱ្យប្រើប្រាស់ ប្រព័ន្ធគ្រប់គ្រងគម្រោ​ងវិនិយោគកម្ពុជា cdcIPM និងបានរំលេចអំពីមុខងារ e-Signature របស់ប្រព័ន្ធ ដែលផ្តល់ភាពបត់បែនខ្ពស់ ក្នុងការអនុម័តគម្រោងវិនិយោគមានលក្ខណៈសម្បត្តិគ្រប់គ្រាន់ បានពីគ្រប់ទីកន្លែងនិងពេលវេលា តាមរយៈប្រព័ន្ធអ៊ីនធឺណេត។

តាមរយៈវេទិកានៃកិច្ចសន្ទនានេះ តំណាងវិនិយោគិនអាមេរិកបានបង្ហាញនូវចំណាប់អារម្មណ៍ជាវិជ្ជមាន ដែលទទួលបានការយកចិត្តទុកដាក់ពីរាជរដ្ឋាភិបាលកម្ពុជា និងមានសុទិដ្ឋិនិយមខ្ពស់ចំពោះការទទួលស្តាប់ពីបញ្ហាប្រឈម និងការផ្លាស់ប្តូរយោបល់  ពិសេស ជាមួ​យនឹងបទពិសោធន៍ ដែលធ្លាប់ទទួលបានការឆ្លើយតប ក៏ដូចជាដំណោះ​ស្រាយ បន្ទាប់ពីបានលើកឡើងកាលពីកិច្ចប្រជុំលើកទី១ នាថ្ងៃទី១៩ ខែកញ្ញា ឆ្នាំ២០២៤ កន្លងមក តំណាងវិនិយោគិនអាម៉េរិករំពឹងថា បន្ទាប់ពីជំនួបសន្ទនាលើកទី២នេះ ពួកគេក៏នឹងទទួលបានលទ្ធផលជាវិជ្ជមានទៅតាមលំដាប់នីតិវិធី និងបទដ្ឋានគតិយុត្តពាក់ព័ន្ធថែមមួយកម្រិតទៀតផងដែរ។

កិច្ចសន្ទនានេះត្រូវបានរៀបចំឡើង ដើម្បីស្ដាប់ និងពិភាក្សាដោះស្រាយរាល់កង្វល់នានា របស់វិនិយោគិនអាមេរិក ដោយអនុវត្តក្រោមស្មារតីសហការ និងឯកភាពរួមគ្នារវាងប្រមុខថ្នាក់ដឹកនាំ ក្រោមការចង្អុលបង្ហាញដ៏ខ្ពង់ខ្ពស់ ពីសម្ដេចធិបតីនាយករដ្ឋមន្ត្រី និងថ្នាក់ដឹកនាំសហរដ្ឋអាម៉េរិក។

យន្តការថែទាំវិនិយោគ ដែលរៀបចំឡើងនាឱកាសនេះ បានបង្ហាញអំពីការយកចិត្តទុកដាក់ របស់រាជរដ្ឋាភិបាលកម្ពុជា ក្នុងការពង្រឹងជំនឿចិត្តរបស់តួអង្គពាក់ព័ន្ធ រួមមាន វិស័យឯកជនទាំងមានស្រាប់និងវិនិយោគិនថ្មីៗ តាមរយៈបង្កើនប្រសិទ្ធភាពយន្តការសន្ទនារវាងរដ្ឋនិងឯកជន ទាំងក្នុងកម្រិតគោលនយោបាយ និងបច្ចេកទេស ដើម្បីជំរុញការពិភាក្សា ស្វែងរកដំណោះស្រាយ ចំពោះបញ្ហាប្រឈមនានា អនុវត្តស្របតាមកម្មវីធីនយោបាយ របស់រាជរដ្ឋាភិបាលនីតិកាលទី៧ នៃរដ្ឋសភា និងយុទ្ធសាស្រ្តបញ្ចកោណ-ដំណាក់កាលទី១ ដើម្បីសង្គម-សេដ្ឋកិច្ចកម្ពុជា៕

ដោយ: គង់ លាងហួរ
អន្តរជាតិ: យោងតាមកាសែត Reuters បានចុះផ្សាយថា រដ្ឋាភិបាលឥណ្ឌូនេសុីបានសម្រេចជ្រើសរើសបុគ្គលដ៏ល្បីឈ្មោះចំនួន៣រូបក្នុងគោលបំណងដើម្បីជួយរៀបចំយុទ្ធសាស្ត្ររបស់មូលនិធិ ដែលទើបនឹងបង្កើតថ្មីឈ្មោះ “Danantara”។

បុគ្គលទាំង៣រូបនោះ រួមមានលោកមហាសេដ្ឋីអាមេរិក Ray Dalio ប្រធានផ្នែកវិនិយោគរបស់ក្រុមហ៊ុនយក្ស Bridgewater Associates លោកសេដ្ឋវិទូ Jeffrey Sachs និងលោក ថាក់ស៊ីន ស៊ីណាវ៉ាត់ អតីតនាយករដ្ឋមន្ត្រីថៃដ៏មានឥទ្ធិពល។

ការបង្កើតមូលនិធិ Danantara នេះឡើងជាយុទ្ធសាស្ត្រដ៏សំខាន់របស់ប្រធានាធិបតីឥណ្ឌូនេស៊ីលោក Prabowo Subianto ដើម្បីសម្រេចបាននូវមហិច្ឆិតានៃគោលដៅកំណើនសេដ្ឋកិច្ចចំនួន៨ភាគរយនៅឆ្នាំ២០២៩។

មូលនិធិនេះគ្រប់គ្រងភាគហ៊ុនទាំងអស់របស់បណ្តាសហគ្រាសរដ្ឋ ដែលនឹងអាចគ្រប់គ្រងទ្រព្យសកម្មជាង៩០០ពាន់លានដុល្លារអាមេរិក។ ឥណ្ឌូនេសុីបានបង្កើតមូលនិធិ Danantara ដោយយកលំនាំតាមក្រុមហ៊ុនវិនិយោគ Temasek របស់រដ្ឋាភិបាលសិង្ហបុរី។

អតីតប្រធានាធិបតីឥណ្ឌូណេស៊ីចំនួន២រូប រួមមានលោក Joko Widodo និងលោក Susilo Bambang Yudhoyono ត្រូវបានតែងតាំងជាសមាជិកគណៈកម្មាធិការដឹកនាំមូលនិធិ ខណៈលោក Ray Dalio លោកសេដ្ឋវិទូ Jeffrey Sachs និងលោក ថាក់សុីន នឹងទទួលតួនាទីជាទីប្រឹក្សា។

នៅក្នុងដំណាក់កាលដំបូង មូលនិធិ Danantara គ្រោងនឹងបោះទុនវិនិយោគចំនួន២០ពាន់លានដុល្លារអាមេរិក ដោយកំណត់គោលដៅលើគម្រោងកែច្នៃធនធានធម្មជាតិ ការអភិវឌ្ឍន៍បច្ចេកវិទ្យាបញ្ញាសិប្បនិម្មិត ថាមពល និងសន្តិសុខស្បៀង៕ប្រភព: Reuters៕

ដោយៈ គង់ ម៉ាណា

    ប្រទេសចិនៈ ទន្ទឹមនឹងធាតុអាកាសប្រែក្តៅជាបណ្តើរៗ រដូវផ្ការីកបានចូលមកដល់ នៅគ្រប់តំបន់ក្នុងប្រទេសចិន ប្រជាជនចិន បានដើរចេញពីផ្ទះ ធ្វើសកម្មភាពច្រើនបែបយ៉ាង ដើម្បីទទួលរដូវផ្ការីកដោយសប្បាយរីករាយ។

ក្រោមសភាពការណ៍បែបនេះ ការប្រើប្រាស់ក្នុងរដូវផ្ការីកបានជំរុញ “សេដ្ឋកិច្ចរដូវផ្ការីក” ឱ្យកើនឡើងជាបន្តបន្ទាប់ ទីផ្សារពាក់ព័ន្ធលេចចេញភាពរស់រវើកយ៉ាងខ្លាំងក្លា។

ស្ថិតក្នុងបរិបទដ៏ស្គុសស្គាយបែបនេះ តើរដ្ឋបាលក្នុងតំបន់នានាគួរធ្វើយ៉ាងដូចម្តេច ដើម្បីអាចក្តាប់ជាប់ឱ្យកាន់ល្អនូវភាគលាភនៃ “សេដ្ឋកិច្ចរដូវផ្ការីក” ខិតខំជំរុញអភិវឌ្ឍឧស្សាហកម្មពាក់ព័ន្ធ បានក្លាយទៅជាប្រធានបទ ដែលទទួលបានការចាប់អារម្មណ៍យ៉ាងខ្លាំង។

អ្នកជំនាញបានផ្តល់មតិយោបល់មួយចំនួនដូចជា ទី១ គឺយកចិត្តទុកដាក់លើការបង្កើតឧស្សាហកម្មថ្មី ដើម្បីផ្សារភ្ជាប់នឹងសេដ្ឋកិច្ចរដូវផ្ការីក។ “សេដ្ឋកិច្ចរដូវផ្ការីក” អាចបញ្ចូលជាមួយការកម្សាន្ត ទីក្រុងវប្បធម៌ និងវិចិត្រសល្បៈ លំហែរកម្សាន្ត ក្នុងជនបទ សុខភាព និងហាត់កីឡាជាដើម ដោយរៀបចំសកម្មភាព ដូចជា រថយន្តRVបោះជំរុំផ្សារណាត់ ពិសេសការតាំងពិព័រណ៍បេតិកភណ្ឌវប្បធម៌អរូបី និងពិព័រណ៍វប្បធម៌ចិនចល័តជាដើម ដើម្បីទាក់ទាញភ្ញៀវទេសចរឱ្យមានបទពិសោធន៍កាន់តែពិសេស បំពេញសេចក្តីត្រូវការរបស់ភ្ញៀវទេសចរចំពោះគុណភាពនៃផលិតផល និងការធ្វើបទពិសោធន៍ខាងសេវាកម្ម។

ទី២ គឺធ្វើតាមស្ថានភាពជាក់ស្ដែង ដើរតាមមាគ៌ាមិនដូចគ្នានិងពិសេសបង្កើនលក្ខណៈសម្គាល់របស់ “សេដ្ឋកិច្ចរដូវផ្ការីក”។ វិភាគយ៉ាងជាក់លាក់ នូវវប្បធម៌មានលក្ខណៈពិសេស របស់តំបន់នានាសិក្សាស្រាវជ្រាវ ចំពោះខ្លឹមសារវប្បធម៌ឱ្យស៊ីជម្រៅ ច្នៃប្រឌិតថ្មីនូវសញ្ញាសម្គាល់ពិសេស។

ព្រមជាមួយគ្នានេះ ផ្សារភ្ជាប់ជាមួយនឹងវប្បធម៌ និងទំនៀមទំលាប់ ក្នុងតំបន់រៀបចំសកម្មភាព ពិព័រណ៍វប្បធម៌ដ៏ច្រើនបែបយ៉ាង ដើម្បីធ្វើឱ្យភ្ញៀវទេសចរ ទទួលចំណាប់អារម្មណ៍ខ្លាំង ចំពោះវប្បធម៌របស់តំបន់ក្នុងអំឡុងពេលធ្វើទេសចរណ៍។

ទី៣ អនុវត្តដោយគ្រប់ជ្រុងជ្រោយ នូវសេវាកម្មពាក់ព័ន្ធ និងការងារត្រួតពិនិត្យ ដើម្បីធ្វើឱ្យ “សេដ្ឋកិច្ចរដូវផ្ការីក”មានអ្នកការពារ។ត្រូវអនុវត្តន៍ជាក់ស្តែង នូវសេវាកម្មដោយគ្រប់ជ្រុងជ្រោយ ក្នុងនោះរួមបញ្ជូលការទទួលទាន ការស្នាក់នៅ ធ្វើដំណើរធ្វើកម្សាន្ត និងទិញទំនិញធ្វើឱ្យបានល្អ នូវការងារលម្អិត ដូចជា ការគាំពារការធ្វើពាណិជ្ជកម្មក្នុងរមនីយដ្ឋាន ការប្រើប្រាស់ម្ហូបអាហារ និងធ្វើដំណើរយ៉ាងងាយស្រួលជាដើម បន្តធ្វើឱ្យមានសុក្រឹតភាព នូវបរិក្ខារសាធារណៈកែលម្អបរិយាកាស ការប្រើប្រាស់ ដើម្បីធ្វើឱ្យអ្នកប្រើប្រាស់មានអារម្មណ៍ល្អក្នុងការធ្វើទេសចរណ៍។

កាលពីថ្ងៃទី២៤ ខែសីហា ឆ្នាំ២០០៥ លោកប្រធានាធិបតីចិន Xi Jinping បានចុះផ្សាយអត្ថបទក្រោមចំណងជើងថា “ទឹកថ្លាភ្នំបៃតងគឺជាភ្នំមាសភ្នំប្រាក់”នៅលើកាសែតប្រចាំថ្ងៃខេត្តZhejiang»ថា យើងរុករកភាពចុះសម្រុងគ្នា រវាងមនុស្ស និងធម្មជាតិ ភាពចុះសម្រុងគ្នារវាងសេដ្ឋកិច្ច និងសង្គម។ និយាយធម្មតាគឺចង់បានទឹកថ្លា និងភ្នំបៃតង ហើយក៍ចង់បានភ្នំមាសភ្នំប្រាក់ផងដែរ៕