ដោយ ៖ រ៉ាណេត
កណ្តាល ៖ រោងចក្រផលិតសា្របៀ និងភេសជ្ជៈកម្រិតស្ដង់ដាអន្តរជាតិដ៏ធំមួយ នឹងបង្ហាញរូបរាងនៅក្នុងស្រុកអង្គស្នួលខេត្តកណ្តាល ជាមួយនឹងំហំទឹកប្រាក់វិនិយោគជាង១៦០លានដុល្លារ និងអាចបង្កើនការងារបានចំនួន១៥៤៥កន្លែង ដែលជាចំណែកមួយជួយបង្កើនកំណើនសេដ្ឋកិច្ចនៅក្នុងតំបន់ និងសង្គមជាតិផងដែរ។
អភិបាលខេត្តកណ្តល លោក គង់ សោភ័ណ្ឌ បានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី៣ ខែមេសា ឆ្នាំ២០២០នេះថា ក្នុងនាមលោកជាអាជ្ញាធរខេត្ត សូមបង្ហាញពីការកិច្ចស្វាគមន៍ និងរីករាយទទួលវត្តមានថ្មីៗនៃគម្រោងវិនិយោគគ្រប់វិស័យមកកាន់ខេត្តកណ្តាល ដែលជាតំបន់ដែលមានសក្ដានុពលទៅលើវិស័យឧស្សាហកម្ម និងកសិកម្មកម្រិតខ្ពស់។
លោក គង់ សោភ័ណ្ឌ បានមានប្រសាសន៍ថា “ខេត្តកណ្តាលមានវិសាសលភាពធំទូលាយ ដោយក្នុងនោះមានក្រុង/ស្រុកចំនួន១១ ឃុំ/សង្កាត់ចំនួន១២៧ ភូមិចំនួន១០០០ និងមានចំនួនប្រជាជនច្រើនសរុបជាង១៣០០០០០នាក់ ដែលអំណោយផលដល់ការផ្គត់ផ្គង់កម្លាំងបម្រើការងារយ៉ាងគ្រប់គ្រាន់។ ដោយឡែក សម្រាប់វត្តមានថ្មីនៃគម្រោងវិនិយោគបង្កើតរោងចក្រផលិតស្រាបៀ និងភេសជ្ជៈ ដែលរាជរដ្ឋាភិបាលទើបសម្រេចផ្តល់អនុម័ត តាមលិខិតប្រកាសកាលពីល្ងាចម្សិលមិញនេះ ក្នុងនាមជាអាជ្ញាធរ បានត្រៀមខ្លួនរួចជាស្រេចក្នុងការជួយសម្របសម្រួលលើដំណើរការវិនិយោគរបស់ក្រុមហ៊ុន ដែលធ្វើយ៉ាងណាឱ្យមានភាពល្អប្រសើរ និងស្របទៅតាមច្បាប់ដែលបានកំណត់”។
គម្រោងវិនិយោគបង្កើតរោងចក្រផលិតស្រាបៀ និងភេសជ្ជៈថ្មីមួយនេះ មានឈ្មោះ ហនុមាន ប៊ែរវើរីជីស ឯ.ក (HANUMAN BEVERAGES CO., LTD) មានទីតាំងស្ថិតនៅភូមិ ត្រពាំងវែង ឃុំឆក់ឈើនាង ស្រុកអង្គស្នួល ខេត្តកណ្តាល ដែលជាក្រុមហ៊ុន១ ក្នុងចំណោមក្រុមហ៊ុនទាំង៨ ដែលរាជរដ្ឋាភិបាលទើបសម្រេចអនុម័តគាំទ្រនៅដើមខែមេសា ឆ្នាំ២០២០នេះ៕
