ដោយ ប៊ី
បាងកកៈ ក្រុមហ៊ុនអចលនទ្រព្យដែលមានមូលដ្ឋានៅប្រទេសថៃ កំពុងចាប់យកអ្នកទិញខុនដូជនជាតិកម្ពុជា ដែលគោលបំណងស្នាក់នៅសម្រាប់ការព្យាបាល នៅប្រទេសថៃ ខណៈក្រុមហ៊ុនអភិវឌ្ឍន៍ខុនដូ ក៏កំពុងចាប់អ្នកទិញជនជាតិចិន អំឡុងពេលផ្ទះឡើងនៃជំងឺ COVID-19។
ក្រុមហ៊ុន Angel កំពុងរៀបចំផ្លាស់ប្តូរទៅរកអាជីវកម្មផ្នែកផ្សេងៗ និងទីផ្សារថ្មីៗ ស្របពេលក្រុមហ៊ុន ក៏កំពុងស្វែងរកអ្នកទិញមកពីប្រទេសមីយ៉ាន់ម៉ា កម្ពុជា និងប្រ៊ុយណេ។ នេះបើយោងតាមក្រុមហ៊ុនអចលនទ្រព្យ Angel Real Estate Consultancy។
ក្រុមហ៊ុនឱ្យដឹងថា “ប្រជាជនកម្ពុជាទិញខុនដូនៅទីក្រុងបាងកក ក្នុងគោលបំណង យកឪពុកម្តាយព្យាបាលនៅមន្ទីរពេទ្យទីនេះ។ ថវិការបស់ពួកគេគឺពី១,២ ទៅ២,៥ លានបាតក្នុងមួយយូនីត សម្រាប់ទីតាំងនៅតាមបណ្តោយបណ្តាញឆ្លងកាត់ធំៗ នៅខាងក្រៅទីក្រុងបាងកក”។
ប្រជាជននៅមីយ៉ាន់ម៉ាទិញខុនដូនៅទីក្រុងបាងកក ដើម្បីទុកកូនៗរបស់ពួកគេទៅសាលាអន្តរជាតិនៅទីនេះ។
សហស្ថាបនិក និងជាប្រធានក្រុមហ៊ុន លោកSimon Lee បាននិយាយថា អ្នកអភិវឌ្ឍន៍គួរតែផ្តល់ឱ្យអ្នកទិញជនជាតិចិន នូវរយៈពេលយូរជាងនេះ ដើម្បីបង់ប្រាក់ទិញយូនីតខុនដូ ដែលពួកគេបានកក់ នៅពេលពួកគេត្រៀមខ្លួនផ្ទេរអចលនទ្រព្យរបស់ពួកគេ ប្រសិនបើពួកគេមិនអាចធ្វើដំណើរមកថៃបាន។
លោក Lee បានមានប្រសាសន៍ថា “អ្នកអភិវឌ្ឍន៍អាចឱ្យជនជាតិចិនបង់លុយបន្តិចម្តងៗ ដូចជា១០ ទៅ២០ភាគរយនៃតម្លៃយូនីត រៀងរាល់១ ទៅ៣ខែ បន្ទាប់ពីពួកគេត្រូវទទួលយកការផ្ទេរឯកតា។ ពួកគេអាចបន្តបង់រំលស់រហូតដល់បង់ពេញ ឬអ្នកទិញអាចមកទទួលផ្ទេរអចលនទ្រព្យ”។
លោកបាននិយាយថា អ្នកទិញជនជាតិចិនដែលបានបង់៣០ភាគរយ នៃតម្លៃយូនីតជាការទូទាត់មុនសម្រាប់ទិញខុនដូ កាលពីប៉ុន្មានឆ្នាំមុន មិនចង់បាត់បង់ប្រាក់នោះទេ។
លោក Lee បានមានប្រសាសន៍ថា “អ្នកអភិវឌ្ឍន៍មិនគួររឹបអូសយកយូនីតខុនដូត្រលប់់មកវិញទេ ពីព្រោះខុនដូដែលផ្គត់ផ្គង់លើសតម្រូវការ។ ការធ្វើដូច្នេះនឹងធ្វើឱ្យបញ្ហាកាន់តែរីកធំឡើង”។
លោក Lee បាននិយាយថា ជាធម្មតា ជនជាតិចិនចង់បានផ្ទះនៅប្រទេសថៃ។ ការផ្ទុះឡើងនៃជំងឺ Covid-19 នឹងជំរុញពួកគេឱ្យគិតអំពីផែនការB ក្នុងការស្វែងរកផ្ទះទី២ នៅក្រៅប្រទេស ជាពិសេសនៅក្នុងប្រទេសថៃ ដែលពួកគេភាគច្រើនគិតថាមានភាពវិជ្ជមាន។
លោកបន្តថា អ្នកទិញជនជាតិចិន ជាពិសេសក្រុមអ្នកកម្រិតជីវភាពមធ្យម និងអ្នកមាន ចង់បានផ្ទះនៅក្រៅប្រទេស ព្រោះបច្ចុប្បន្នផ្ទះថ្មីនៅប្រទេសចិន ត្រូវបានផ្តល់ជូននូវការបញ្ចុះតម្លៃ២៥ភាគរយ ឬការបញ្ចុះតម្លៃ៣០-៣៥ ភាគរយសម្រាប់ផ្ទះ ដែលប្រើប្រាស់រួចដែលបណ្តាលមកពីការផ្ទុះឡើងនៃជំងឺ Covid-19។
ក្រុមហ៊ុន Angel មានតម្រូវការជាច្រើនពីជនជាតិចិន ដែលកំពុងស្វែងរកផ្ទះដែលមានបន្ទប់គេងពីរ និងមានផ្ទៃដីទំហំ១៥០-២០០ម៉ែត្រការ៉េ ដែលអាចប្រើប្រាស់បាននៅទីក្រុងបាងកក ឈៀងម៉ៃ និងប៉ាតាយ៉ា ដើម្បីជួលរយៈពេល៣០ឆ្នាំ។ ថវិការបស់ពួកគេស្ថិតនៅចន្លោះពី៤-៨ លានបាតក្នុងមួយយូនីត។
លោក Lee មានប្រសាសន៍ថា “នៅពេលការផ្ទុះឡើងនៃជំងឺCovid-19 ស្ថិតក្រោមការគ្រប់គ្រងប្រទេសថៃ និងជប៉ុន ជាប្រទេសតែមួយគត់ ដែលទទួលបានអត្ថប្រយោជន៍ពីអ្នកទិញចិន ព្រោះពួកគេមិនបានបិទព្រំដែនរបស់ពួកគេជាមួយជនជាតិចិនទេ”៕
