ដោយៈ រ៉ាណេត
ភ្នំពេញៈ មហាគ្រួសារ Century21 Cambodia ដែលគេស្គាល់យ៉ាងច្បាស់ថាជាក្រុមហ៊ុនអចលនទ្រព្យអន្តរជាតិ ដ៏ធំជាងគេនៅក្នុងប្រទេសកម្ពុជា បាននិងកំពុងចូលរួមចំណេកយ៉ាងសកម្ម ក្នុងការជួយកែប្រែជីវភាពរបស់បណ្តាសិស្ស-និស្សិតកម្ពុជារាប់រយនាក់ តាមរយៈការផ្តល់ឱកាសការងារ ក្នុងនាមជាភ្នាក់ងារលក់របស់ក្រុមហ៊ុនផ្ទាល់។
ក្រុមហ៊ុនអចលនទ្រព្យអន្តរជាតិលំដាប់ពិភពលោក ដែលកំពុងមានប្រតិបត្តិការយ៉ាងសកម្មនៅកម្ពុជា Century21 Cambodia បានបង្ហាញពីមហិច្ឆតារបស់ខ្លួន ក្នុងការចូលរួមចំណែកនៅសង្គមកម្ពុជា ដើម្បីលើកស្ទួយសេដ្ឋកិច្ចជាតិ តាមរយៈការផ្តល់ឱកាសការងារដល់បណ្តានិស្សិត ដែលបានបញ្ចប់ការសិក្សា ត្រឹមថ្នាក់មហាវិទ្យាល័យរាប់រយនាក់។
នាយិកាក្រុមហ៊ុន Century21 Cambodia លោកស្រី Grace Rachny Fong បានមានប្រសាសន៍ឲ្យដឹងតាមទូរស័ព្ទកាលពីល្ងាចថ្ងៃទី២ ខែធ្នូ ឆ្នាំ២០១៩ថា គ្រប់បណ្តានិស្សិតទាំងអស់ ដែបានបញ្ចប់ការសិក្សាថ្នាក់មហាវិទ្យាល័យ សុទ្ធតែអាចមានឱកាសក្លាយជាភ្នាក់ងារលក់របស់មហាគ្រួសារ Century21 Cambodia ទាំងអស់រហូតទៅដល់ ៥០០កន្លែង នៅត្រឹមចុងឆ្នាំ២០២០ខាងមុខនេះ។
លោកស្រីបន្តថា “ជាមួយនឹងការផ្តល់ឱកាសការងារទាំងអស់នេះ ពួកគេនឹងអាចមានលទ្ធភាពក្នុងការកែប្រែជីវភាពរស់នៅ ជួយបង្កើននូវចំណេះដឹង ជំនាញថ្មីៗបន្ថែមពាក់ព័ន្ធទៅនឹងវិស័យអចលនទ្រព្យនៅកម្ពុជា ក៏ដូចជានៅក្នុងតំបន់ ដែលកំពុងតែមានតម្រូវការ និងទីផ្សារនាពេលបច្ចុប្បន្ននេះ ដែលឱ្យអនាគតរបស់ពួកគេមានភាពភ្លឺស្វាងយ៉ាងប្រសើរ”។
លោកស្រី Grace Rachny Fong បានបន្តទៀតថា បច្ចុប្បន្ននេះ តាមរយៈមហាគ្រួសារ Century21 Cambodia ដែលកំពុងដំណើរប្រតិបត្តិការទាំង២៣ ការិយាល័យនៅ កម្ពុជា បានផ្តល់ឱកាសការងារដល់បណ្តានិស្សិត ដែលទើបតែបញ្ចប់ការសិក្សាថ្នាក់មហាវិទ្យាល័យបានចំនួន២៥០នាក់រួចទៅហើយ ដោយតាមគម្រោងនៅត្រឹមដំណាច់ចុងឆ្នាំ២០២០ ខាងមុខនេះ សម្ព័ន្ធក្រុមហ៊ុនអចលនទ្រព្យដ៏មួយនេះ មានគម្រោងផ្តល់ឱកាសការងាររហូតដល់ចំនួន ៥០០កន្លែង”។
សម្រាប់បណ្តានិស្សិត ដែលចង់អភិវឌ្ឍន៍ខ្លួនក្លាយជាភ្នាក់ងារ ផ្តល់សេវាទិញ-លក់ អចលនទ្រព្យនៅក្នុងមហាគ្រួសារ Century21 Cambodia គឺសុទ្ធតែមានឱកាសដូចគ្នាទាំងអស់ ដោយគ្រាន់តែមានលក្ខខណ្ឌងាយៗ ត្រឹមតែ៣ចំណុចតែប៉ុណ្ណោះ ដូចជា ស្មោះត្រង់ មានភាពរួសរាយរាក់ទាក់ល្អ ភាពអំណត់គួបផ្សំនឹងចំណេះដឹងទូទៅ មានភាពទូលំទូលាយ។
លោកស្រី Grace Rachny Fong បានបញ្ជាក់ថា “ភាពស្មោះត្រង់ ភាពអំណត់ និងការប្ដេជ្ញាចិត្តចង់អភិវឌ្ឍន៍ខ្លួន គឺជាចំណុចសំខាន់ដែលពួកយើងចង់បាន”លោកកស្រីបន្តថា “ពួកយើងនឹងព្យាយាមបណ្តុះបណ្តាលផ្តល់នូវចំណេះដឹង និងជំនាញក្នុងនាមជាភ្នាក់ងារអចលនទ្រព្យ ដែលកំពុងតែមានតម្រូវការខ្ពស់នាពេលបច្ចុប្បន្ននេះ និងបន្តទៅថ្ងៃអនាគត”។
លោកស្រីបានបញ្ជាក់ថា ពួកគាត់ (និស្សិត) អាចចាប់យកឱកាសពីថ្ងៃនេះ ហើយនៅថ្ងៃខាងមុខនេះ អាជីព និងជំនាញទាំងនេះ ពិតជាអាចជួយកែប្រែជីវភាពរស់នៅរបស់ពួកគេបានយ៉ាងប្រសើរ ដែលកាន់តែធ្វើអនាគតមានភាពល្អប្រសើរ ព្រោះទីផ្សារអចលនទ្រព្យនៅកម្ពុជា មិនថា៥ឆ្នាំឬ១០ឆ្នាំទៀតនោះទេ គឺនៅតែមានរក្សាបាននូវភាពរឹងមាំ។
បច្ចុប្បន្ននេះ មហាគ្រួសារក្រុមហ៊ុនអចលនទ្រព្យអន្តរជាតិ Century21 Cambodia បានពង្រីកការិយាល័យរបស់ខ្លួន បានចំនួន២៣ការិយាល័យ ដែលក្នុងនោះមាន២២ការិយាល័យនៅក្នុងរាជធានីភ្នំពេញ និង១ការិយាល័យទៀត ទើបតែសម្ពោធបើកដំណើរការនៅក្នុងក្រុងព្រះសីហនុ ហើយនៅថ្ងៃខាងមុខនេះ ក្រុមហ៊ុនមានគម្រោងពង្រីកការិយាល័យចំនួន៣៨ទីតាំងបន្ថែមនៅទូទាំងព្រះរាជាណាចក្រកម្ពុជា ៕
