ដោយគង់ ម៉ាលីន
ភ្នំពេញ៖ កត្តាសំខាន់ៗចំនួន៤បានជំរុញ វិស័យឧស្សាហកម្មកម្ពុជាបន្តរីកចម្រើនខ្ពស់ ដោយនៅដំណាច់ត្រីមាសទី២នេះតំបន់ឧស្សាហកម្មចំនួន២៦បានបង្កើតឡើង និងមានផ្ទៃក្រឡា ២៤០,០០០ម៉ែត្រការ៉េ។
យោងការសិក្សារបស់ក្រុមហ៊ុន CBRE Cambodia បានបង្ហាញរបាយការណ៍របស់ខ្លួនកាលពីពេលថ្មីៗនេះថា គិតត្រឹមរយៈពេល៥ខែដើមឆ្នាំនេះ តំបន់ឧស្សាហកម្មបានកើនឡើងរហូតដល់២៦កន្លែង ដែលមានទំហំផ្ទៃក្រឡាសរុបចំនួន ២៤ម៉ឺនម៉ែត្រការ៉េ។ តម្លៃជួលឃ្លាំង ឬរោងចក្រ ដែលបានសាងសង់ចប់រួចរាល់ មានតម្លៃជួលរហូតដល់៣,២ ទៅ២,១ដុល្លារក្នុងមួយម៉ែត្រការ៉េ។
របាយការណ៍ដដែលបានបង្ហាញថា តម្រូវការសេវាកម្មជួលនានានៅតាមតំបន់ឧស្សាហកម្មបន្តកើនឡើងខ្ពស់ អាស្រ័យលើផែនការនៃគំរោង ហេដ្ឋារចនាសម្ព័ន្ឋ ទីតាំង និងគោលដៅនៃការវិនិយោគ។
នាយិកាប្រចាំប្រទេសនៃក្រុមហ៊ុន CBRE Cambodia អ្នកនាងអាន សុធីតាបានថ្លែងថា កំណើននៃការវិនិយោគតំបន់ឧស្សាហកម្មកើនឡើង ដោយសារកត្តាបីសំខាន់ ទី១ កម្ពុជាជាគោលដៅនៃការវិនិយោគផ្នែកឧស្សាហកម្ម ទី២ កំលាំងពលកម្មនៅកម្ពុជាមានតម្លៃទាប ធៀបជាមួយប្រទេសថៃ គឺកម្ពុជាអាចទាបជាង២ដង និងទី៣ ការអនុគ្រោះពន្ឋ និងច្បាប់វិនិយោគដ៏ទាក់ទាញរបស់កម្ពុជា។
អ្នកនាងបន្តថា “ទោះជាយ៉ាងណាកម្ពុជាក៏មានបញ្ហាប្រឈមរបស់ខ្លួនផងដែរ ទាក់ទងនឹងតម្លៃទឹក និងអគ្គិសនីនៅថ្លៃជាងប្រទេសជិតខាង” ។ អ្នកនាងបន្ថែមថា “យ៉ាងណាខ្ញុំគិតថារដ្ឋាភិបាលនឹងដោះស្រាយបញ្ហាទាំងនេះបាន សម្រាប់រយៈពេល៣ទៅ៥ឆ្នាំខាងមុខ ដោយសារបច្ចុប្បន្នរដ្ឋាភិបាលបាននិងកំពុងវិនិយោគវារីអគ្គិសនី និងរោងចក្រអគ្គិសនីជាច្រើន” ។
លោកបណ្ឌិតម៉ី កល្យាណ ទីប្រឹក្សាឧត្តមក្រុមប្រឹក្សាសេដ្ឋកិច្ចជាតិបានថ្លែងថា ការរីកចម្រើនវិស័យឧស្សាហកម្មនៅកម្ពុជា ដោយសារគោលនយោបាយថ្មីរបស់រដ្ឋាភិបាល តាមរយៈការដាក់ចេញគោលនយោបាយអភិវឌ្ឍន៍ វិស័យឧស្សាហកម្មឆ្នាំ២០១៥ ២០២៥ ដែលបានដាក់ឲ្យដំណើរការ ដើម្បីធ្វើពិពិធកម្មទីផ្សារពលកម្ម និងសេដ្ឋកិច្ចកម្ពុជា។លោកបន្តថា ការដាក់ចេញនូវគោលនយោនាយថៃបូក១ បានផ្តល់ផលប្រយោជន៍ច្រើនដល់កម្ពុជាផងដែរ ដោយសាររោងចក្រមួយចំនួននៅប្រទេសថៃ បានមកកាន់តំបន់ជាយដែនកម្ពុជា ដើម្បីផលិតហើយធ្វើការនាំចេញ។
លោកបន្តថា “គោលនយោបាយថៃបូក១ ពិតជាផ្តល់ផលប្រយោជន៍ច្រើនដល់កម្ពុជា ដោយសារកម្ពុជាមានកំលាំងពលកម្មថោកជាងប្រទេសថៃ បានធ្វើឲ្យកម្ពុជាក្លាយជាទីតាំងទាក់ទាញការវិនិយោគមួយ។លោកបន្តថា “មានការលើកឡើងថាប្រទេសដែលស្ថិតនៅក្បែរប្រទេសអភិវឌ្ឍន៍លឿន នឹងជួយប្រទេសនោះឲ្យមានភាពរីកចម្រើនផងដែរ” ៕
