ដោយៈ វុត្ថា
ភ្នំពេញៈ អភិបាលខេត្តកំពង់ស្ពឺបានបញ្ជាក់ថា កុំឱ្យមានការព្រួបារម្ភចំពោះការប្រែក្លាយដីស្រែ និងដីមិនប្រើប្រាស់ទៅជាអាជីវកម្មអចលនទ្រព្យ ដូចជាពុះដីឡូតិ៍លក់ បង្កើតរោងចក្រ និងវិនិយោគលំនៅឋានផ្សេងៗ ខណៈដែលខេត្តមួយនេះ នៅមានដីកសិកម្មជាង១១ម៉ឺនហិកតា នៅទូទាំងខេត្តសម្រាប់បង្កបង្កើនផលកសិកម្ម។
លោកវ៉ី សំណាង អភិបាលខេត្តកំពង់ស្ពឺ បានថ្លែងប្រាប់អ្នកសារព័ត៌មាន នៅក្នុងសន្និសីទសារព័ត៌មានកាលពីថ្ងៃទី២០ ខែកក្កដា ឆ្នាំ ២០២០កន្លងមកថា ការលុបបឹងសម្រាប់ពុះដីឡូតិ៍នៅក្នុងខេត្ត មិនទាន់មាននៅឡើយទេ ព្រោះភាគច្រើនគឺត្រូវការចំណាយលុយច្រើន ដូច្នេះគេទៅធ្វើនៅតែកន្លែងដីស្រែ ឬទីទួល ។
លោកបន្តថា “ការពុះដីឡូតិ៍លក់ទទួលបានផលច្រើនជាង ការធ្វើកសិកម្ម ឧទាហរណ៍ថាដី១ហិកតា ទទួលបានស្រូវ៣តោនក្នុងមួយឆ្នាំ តែដីមួយហិកតាដដែលយកមកធ្វើរោងចក្រ អាចទ្រទ្រង់ជីវភាពគ្រួសារមនុស្សបានរាប់ពាន់នាក់” ។ លោកបន្តថា “នេះគឺជាភាពចំណេញដែលយើងមើលឃើញជាក់ស្តែង” ។
លោកថ្លែងបន្តថា ក្នុងន័យនេះយើងមិនត្រូវអភិរក្សបឹង ឬដីស្រែដោយគ្មានការអភិវឌ្ឍន៍នោះទេ តើយើងចង់ឱ្យពលរដ្ឋនៅតែក្រីក្រដដែល ឬឱ្យពួកគាត់មានជីវភាពធូធាជាងមុន។ ដូច្នេះ យើងត្រូវតែអភិវឌ្ឍន៍ ដើម្បីឱ្យជីវភាពធូធាក្នុងសម័យតេជោនេះ។
ចំពោះការលុបថ្លុក ឬត្រពាំងមួយចំនួននៅក្នុងខេត្តវិញ លោកបានថ្លែងចោទជាសំនួរថា តើមិនចង់ឱ្យប្រជាពលរដ្ឋ នៅក្នុងខេត្តកំពង់ស្ពឺមានជីវភាពល្អទេឬ? នៅក្នុងខេត្តកំពង់ស្ពឺសម្បូរទៅដោយថ្លុក និងត្រពាំង ហើយត្រូវធ្វើយ៉ាងណាឱ្យវាស្អាត ដើម្បីបង្កើតជារោងចក្រ និងលំនៅឋានផ្សេង។ ក្នុងន័យនេះរដ្ឋបាលខេត្ត បានពិនិត្យមើលយ៉ាងម៉ត់ចត់ចំពោះកន្លែងដែលត្រូវទុក ឬមិនត្រូវទុក។
លោកបន្ថែមថា “នៅពេលនេះយើងត្រូវធ្វើយ៉ាងណា កុំឱ្យមានការរំលោភយកដីរដ្ឋតែប៉ុណ្ណោះ គេលុបនៅក្នុងរង្វង់ដីកម្មសិទ្ធិរបស់គេ ម្យ៉ាងទៀតនៅពេលដែលអ្នកវិនិយោគ ឬអ្នករកស៊ីអចលនទ្រព្យចូលមក គេចង់វិនិយោគលើវិស័យអចលនទ្រព្យ ឬបង្កើតរោងចក្រសហគ្រាសផ្សេងៗ ក្នុងការផ្តល់ការងារជូនពលរដ្ឋ” ។ លោកបន្ថែមថា “ដូច្នេះយើងក៏ពិចារណាថាគួរលុប ឬទុក បើលុបហើយផ្តល់ចំណេញច្រើនជាងទុកឱ្យគេលុបទៅ” ៕
